Birthday Special | क्रिकेटमध्ये फ्लॉप, राजकारणात सुपर हिट, 26 व्या वर्षी उपमुख्यमंत्री बनलेल्या तेजस्वी यादव यांची कहाणी

बिहार विधानसभा निवडणुकीचा निकाल उद्या जाहीर होणार आहे. सगळ्यांच्या नजरा तेजस्वी यादव यांच्याकडे लागल्या आहेत. क्रिकेटपटू ते बिहारचे उपमुख्यमंत्री असा प्रवास केलेला हा युवानेता आज (9 नोव्हेंबर) आपला 31 वा वाढदिवस साजरा करत आहे. तेजस्वी यादव इतिहास रचतील असा अंदाज सगळ्याच एक्झिट पोलमध्ये वर्तवला आहे. त्यामुळे बर्थ डे बॉय तेजस्वी यांना उद्या विजयाची भेट मिळणार का?

पाटणा : बिहारच्या राजकारणात सध्या सर्वाधिक चर्चेत जर कोणी असेल तर ते आहेत तेजस्वी यादव. क्रिकेटपटू ते बिहारचे उपमुख्यमंत्री असा प्रवास केलेला हा युवानेता आज (9 नोव्हेंबर) आपला 31 वा वाढदिवस साजरा करत आहे. बिहार निवडणुकीच्या बहुतांश एक्झिट पोलमध्ये महागठबंधनचे सरकार सत्ते येऊन, राजदचे नेते आणि महागठबंधनचे उमेदवार तेजस्वी यादव बिहारचे नवे मुख्यमंत्री बनू शकतील असा अंदाज वर्तवला जात आहे. एक्झिट पोलचा अंदाज खरा ठरला तर तेजस्वी यादव बिहारमध्येच नाही तर संपूर्ण देशात इतिहास रचू शकतात. तेजस्वी यादव बिहारचे मुख्यमंत्री बनले तर ते राज्याचे सर्वात तरुण मुख्यमंत्री ठरतील.

राजकारण येऊ आणि एवढ्या लवकर विक्रम बनवण्याच्या जवळ पोहोचतील याचा विचार तेजस्वी यादव यांनी कधीच केला नव्हता. पण काळाचं चक्र असं काही फिरलं की क्रिकेटच्या मैदानात चौकार-षटकार लगावणाऱ्या तेजस्वी यादव यांना बॅट आणि बॉल दूर सारुन राजकारणाच्या पीचवर नव्या इनिंगसाठी तयार व्हावं लागलं. यादरम्यान त्यांना अनेक अडचणींचा सामना करावा लागला. परिस्थिती अशीही आली की जम बसण्याआधी त्यांची इनिंग संपतेय की काय अशी शंका आली. पण यंदाच्या निवडणुकीत तेजस्वी विरोधकांवर भारी पडत असल्याचं दिसत आहेत.

विसाव्या वर्षी क्रिकेटपटू सव्वीसाव्या वर्षी उपमुख्यमंत्री तेजस्‍वी यादव यांनी एकेकाळी क्रिकेटची करिअर म्हणून निवड केली होती. यामध्ये त्यांना कुटुंबीयांचंही पाठबळ मिळालं होतं. त्यावेळी लालू प्रसाद यादव हे क्रिकेटशी संबंधित होते. तेजस्वी यादव 20 वर्षांचे असताना म्हणजेच 2009 मध्ये त्यांनी आपल्या क्रिकेट कारकीर्दीची सुरुवात केली होती. त्या वर्षी तेजस्‍वी यादव यांचा झारखंडच्या प्रथम श्रेणी क्रिकेटमध्ये समावेश झाला होता. तेजस्वी यादव यांनी क्रिकेट खेळण्यास सुरुवात केली खरी पण त्यांना म्हणावी कामगिरी तशी झाली नाही. तेजस्‍वी यांनी रणजीसह आयपीएलकडेही वळले. आयपीएलच्या अनेक मोसमात त्यांचा दिल्ली डेअरडेव्हिल्स संघात समावेश करण्यात आला होता. परंतु त्यांना एकाही सामन्यात खेळण्याची संधी मिळाली नाही. तेजस्‍वी संघात एक अष्टपैलू होते.

क्रिकेटमध्ये 'फ्लॉप' पण राजकारणात 'हिट' फलंदाजी किंवा गोलंदाजीमध्ये अपेक्षित कामगिरी करु न शकल्याने तेजस्वी यादव यांचं क्रिकेटपटू बनण्याचं स्वप्न अधुरं राहिलं. आपल्या छोट्याशा क्रिकेट कारकीर्दीत तेजस्वी यादव एकमेव प्रथम श्रेणी सामना, दोन 'ए' श्रेणी आणि चार ट्वण्टी-20 सामन्यात खेळले आहेत. फलंदाजीमध्ये त्यांच्या सर्वाधिक धावा 19 होत्या. तर गोलंदाजीमध्ये त्यांनी 10 षटकात केवळ एकच विकेट घेतली होती. परंतु आपल्या दोन वर्षांच्या राजकीय कारकीर्दीत तेजस्वी आतापर्यंत हिट ठरले आहेत. हेच कारण आहे की विरोधकांवर त्यांच्या टीकेचे बाण निशाण्यावर लागतात. तरुण त्यांना युथ आयकॉनच म्हणतात.

राजदच्या भविष्याचा चेहरा तेजस्‍वी यादव यांचा राजकीय प्रवास सात वर्षांपूर्वी सुरु झाला. पण आता ते आपल्या पक्षासाठी म्हणजेच राजदसाठी भविष्याचा चेहरा बनले आहेत. जर एक्झिट पोलचे अंदाज खरे ठरले तर ते केवळ बिहारचेच नाही तर संपूर्ण देशातील सर्वात तरुण मुख्यमंत्रीही ठरतील. तेजस्वी यादव यांनी स्वत:ची ओळख 2015 च्या बिहार विधानसभा निवडणुकीत निर्माण केली होती. 2010 मध्ये त्यांचे वडील लालू प्रसाद यादव त्यांना आपल्या सभांमध्ये सहभागी करायचे आणि लोकांना त्यांची ओळख करुन द्यायचे. परंतु 2015 च्या निवडणुकीत तेजस्‍वी यादव आपल्या पक्षाचे स्टार बनले. आपल्याच पक्षाचा बालेकिल्ला समजल्या जाणाऱ्या वैशाली जिल्ह्यातील राघोपुर मतदारसंघातून तेजस्वी यादव पहिल्यांदा आमदार बनले आणि त्यानंतर उपमुख्यमंत्रीपदाची माळ त्यांच्या गळ्यात पडली.

मोठ्या भावाची साथ तेजस्वी वयाने तेजप्रताप यांच्यापेक्षा लहान असले तरी लोक तेजस्वी यांनाच मोठे समजतात. त्याचं कारण म्हणजे तेजस्वी यादव यांची राजकारणातील सक्रियता. घोटाळ्याच्या आरोपांनंतरही तेजस्वी यांना मोठे बंधू तेजप्रताप यांची सातत्याने साथ मिळते. दोन्ही भाऊ सभागृहात सोबतच दिसतात. तर सोशल मीडियावरही दोघेही सक्रिय असतात.

तरुणींमध्ये तेजस्वी यादव यांची जबरस्त क्रेझ लालू प्रसाद यादव यांच्या दोन्ही मुलांमध्ये तेजस्वी धाकटे आहेत, परंत मीडियापासून सोशल मीडियापर्यंत ते कायमच आपले मोठे बंधू तेजप्रताप यांच्यापेक्षा पुढे आहेत. तेजस्वी यांनी बिहाराची धुरा सांभळण्याआधी सोशल मीडियावर आपली सक्रियता दाखवली आणि निवडणुकीच्या वेळी त्यांनी वॉर रुम बनवला. ते आपल्या फेसबुक पेजपासून ट्विटर हॅण्डलवर फारच सक्रिय असतात. तरुणाईमध्ये तेजस्वी यादव यांची क्रेझ आहेच, पण तरुणींमध्ये ते जास्त लोकप्रिय आहेत. याची प्रचिती ते बिहारचे उपमुख्यमंत्री आणि रस्ते निर्माण मंत्री असताना पाहायला मिळाली. त्यांच्या विभागाच्या हेल्पलाईन नंबरवर तक्रारी आणि सल्ल्यांपेक्षा त्यांना लग्नाचे प्रस्तावच जास्त मिळायचे. तेव्हा तेजस्वी यादव यांना जवळपास 40 हजारांपेक्षा जास्त तरुणींनी लग्नासाठी प्रस्ताव ठेवण्याचं म्हटलं जातं. पण 'माझ्या लग्नाचा निर्णय कुटुंबीयच घेतील', असं तेजस्वी यादव यांनी सांगितलं होतं.

संबंधित बातम्या