Ajmer Dargah : अजमेर दर्ग्यात पीएम मोदी चादर चढवणार; दर्ग्याचे वेब पोर्टल अन् यात्रेकरूंसाठी 'गरीब नवाज' ॲपही लॉन्च केलं जाणार
Ajmer Dargah : या विशेष प्रसंगी मंत्री रिजिजू दर्गाहचे वेब पोर्टल आणि यात्रेकरूंसाठी 'गरीब नवाज' ॲप लॉन्च करतील. याशिवाय उर्ससाठी ऑपरेशन मॅन्युअलही जारी करण्यात येणार आहे.
Ajmer Dargah : अजमेर दर्गा वादाच्या पार्श्वभूमीवर पंतप्रधान नरेंद्र मोदी यांच्या हस्ते आज (शनिवारी) येथे चादर देण्यात येणार आहे. केंद्रीय अल्पसंख्याक कार्य मंत्री आणि संसदीय कार्य मंत्री किरेन रिजिजू चादर घेऊन अजमेरला येणार आहेत. या विशेष प्रसंगी मंत्री रिजिजू दर्गाहचे वेब पोर्टल आणि यात्रेकरूंसाठी 'गरीब नवाज' ॲप लॉन्च करतील. याशिवाय उर्ससाठी ऑपरेशन मॅन्युअलही जारी करण्यात येणार आहे. शहर काझी मौलाना तौसिफ अहमद सिद्दीकी व समितीच्या सदस्यांनी बुधवारी रात्री (1 जानेवारी) रजब चा चंद्र पाहून उर्स जाहीर केला होता. यानंतर बडे पीर साहेबांच्या टेकडीवरून तोफांचे गोळे डागण्यात आले. याच दिवशी पहाटे यात्रेकरूंसाठी जन्नती दरवाजा उघडण्यात आले. दुसऱ्या दिवशी 2 जानेवारीला सकाळी केंद्रीय मंत्री चिराग पासवान, मुस्लिम राष्ट्रीय मंचचे संरक्षक इंद्रेश कुमार आणि बॉलीवूडने चादर सादर केली.
गरीब नवाज यांचे चरित्र वेब पोर्टलवर असेल
मंत्री रिजिजू विमानाने जयपूर विमानतळावर पोहोचतील. तेथून रस्त्याने अजमेरला येतील. सकाळी 11 च्या सुमारास दर्गा शरीफ येथे चादर चढवतील. दर्गा शरीफच्या वेब पोर्टलवर भक्तांना ख्वाजा साहेब यांच्या चरित्रासह संपूर्ण माहिती मिळणार आहे. दर्ग्याशी संबंधित प्रत्येक लहान-मोठ्या सुविधा जाणून घेण्यासाठी तुम्हाला भटकावे लागणार नाही. या पोर्टलवर तुम्ही गेस्ट हाऊस बुकिंग आणि इतर सुविधांबद्दल जाणून घेऊ शकाल. तुम्ही ऑनलाइन बुकिंगही करू शकता. याशिवाय देश-विदेशात बसलेल्या लोकांना दर्गा शरीफचे थेट प्रक्षेपणही पाहता येणार आहे.
ओमर अब्दुल्ला म्हणाले होते, पंतप्रधानांनी दबावात येऊ नये
जम्मू-काश्मीरचे मुख्यमंत्री ओमर अब्दुल्ला म्हणाले होते की, ख्वाजा गरीब नवाज यांच्याशी अनेक समुदायांच्या भावना जोडल्या गेल्या आहेत. आशा आहे की, पंतप्रधान नरेंद्र मोदी कोणत्याही दबावाला बळी पडणार नाहीत आणि अजमेर दर्ग्याला चादर पाठवण्याची परंपरा कायम ठेवतील. अजमेर दर्ग्याला फक्त एकाच धर्माचे लोक येत नाहीत.
दर्गा वादावर 24 जानेवारीला सुनावणी
हिंदू सेनेचे राष्ट्रीय अध्यक्ष विष्णू गुप्ता यांनी अजमेर येथील ख्वाजा मोईनुद्दीन चिश्ती यांची दर्गा हे संकटमोचन महादेव मंदिर असल्याचा दावा करणारी याचिका दाखल केली होती. अजमेर दिवाणी न्यायालयात दाखल केलेली याचिका सुनावणीस योग्य असल्याचे लक्षात घेऊन न्यायालयाने 20 डिसेंबर 2024 ही पुढील सुनावणीची तारीख निश्चित केली होती. यामध्ये न्यायदंडाधिकारी मनमोहन चंदेल यांनी याचिकाकर्ता आणि इतर पक्षांच्या वकिलांचा युक्तिवाद ऐकून घेतल्यानंतर पुढील सुनावणीची तारीख 24 जानेवारी 2025 निश्चित केली आहे. गुप्ता यांनी पंतप्रधानांच्या वतीने अजमेर शरीफ दर्ग्यात चादर पाठवण्याविरोधात न्यायालयात अर्जही दाखल केला असून त्यावर तातडीने बंदी घालण्याची मागणी केली आहे.
याचिकाकर्त्याचा दावा, पूर्वी दर्ग्याच्या जागी मंदिर होते
हिंदू सेनेचे राष्ट्रीय अध्यक्ष विष्णू गुप्ता म्हणाले की, दोन वर्षांच्या संशोधन आणि निवृत्त न्यायाधीश हरबिलास शारदा यांच्या पुस्तकात दिलेल्या तथ्यांच्या आधारे ही याचिका दाखल करण्यात आली आहे. या पुस्तकात एक ब्राह्मण जोडपे येथे राहत होते आणि दर्गास्थळी बांधलेल्या महादेव मंदिरात पूजा करत होते असा उल्लेख आहे. याशिवाय इतरही अनेक तथ्ये आहेत, ज्यावरून हे सिद्ध होते की, दर्ग्याच्या आधी येथे शिवमंदिर होते.
गेहलोत यांनी भाजप, आरएसएस आणि पंतप्रधानांवर प्रश्न उपस्थित केले
अजमेर दर्गा संकुलात शिवमंदिर असल्याच्या दाव्यावरून निर्माण झालेल्या वादावर राजस्थानचे माजी मुख्यमंत्री अशोक गेहलोत यांनी भाजप, आरएसएस आणि पंतप्रधान नरेंद्र मोदींवर प्रश्न उपस्थित केले होते. गेहलोत म्हणाले होते- १५ ऑगस्ट 1947 पर्यंत जी काही धार्मिक स्थळे बांधली गेली, ती त्याच स्थितीत राहतील, हा कायदा आहे. त्यांना प्रश्न विचारणे चुकीचे आहे.
इतर महत्वाच्या बातम्या
महत्त्वाच्या बातम्या
