सरसंघचालकांना ध्वजारोहणापासून रोखणाऱ्या जिल्हाधिकाऱ्याची बदली

केरळमधील पल्लकडचे जिल्हाधिकारी पी.मेरीकुथी यांनी मोहन भागवतांना ध्वजारोहणापासून रोखलं होतं.

तिरुअनंतपूरम (केरळ): राष्ट्रीय स्वयंसेवक संघाचे सरसंघचालक मोहन भागवत यांना ध्वजारोहणापासून रोखणाऱ्या जिल्हाधिकाऱ्यांची बदली करण्यात आली आहे. केरळमधील पल्लकडचे जिल्हाधिकारी पी.मेरीकुथी यांनी मोहन भागवतांना ध्वजारोहणापासून रोखलं होतं. राजकीय व्यक्ती शाळेतील ध्वजारोहण करु शकत नाही, असं जिल्हाधिकाऱ्यांचं म्हणणं होतं. मात्र 15 ऑगस्टच्या ध्वजारोहणासाठी स्वत: शाळेनेच मोहन भागवतांना आमंत्रित केलं होतं. त्यामुळे मोहन भागवतांनी वादानंतरही ध्वजारोहण केलं होतं. दरम्यान, मोहन भागवत यांनी झेंडा फडकल्यानंतर मेरीकुथी यांनी सरकारला अहवाल सादर केला होता. त्या अहवालात मोहन भागवत यांच्यावर गुन्हा दाखल करण्याची शिफारस केली होती. त्यांनी पोलिसांना तसे आदेशही दिले होते. या सर्व वादाच्या पार्श्वभूमीवर जिल्हाधिकारी पी.मेरीकुथी यांची बदली झाल्याने, तर्क-वितर्क लढवणं साहजिकच आहे. मात्र ही बदली नियमित असल्याचा केरळ सरकारचा दावा आहे. केवळ मेरीकुथी यांचीच नव्हे तर अन्य चार जिल्हाधिकाऱ्यांचीही बदली झाल्याचं केरळ सरकारने म्हटलं आहे. मेरीकुथी यांच्या जागी सुरेश बाबू यांची पल्लकडचे नवे जिल्हाधिकारी म्हणून नियुक्ती करण्यात आली आहे.