PM Imran Khan : पंतप्रधानपद वाचवण्याचा इम्रान खान यांचा अखेरचा प्रयत्न! एका मुख्यमंत्र्यांचा त्याग, दुसऱ्या पक्षाला ऑफर
PM Imran Khan : इम्रान खान यांनी आपल्या पक्षाच्या नेत्याला पंजाब प्रांताच्या मुख्यमंत्रिपदाच्या खुर्चीवरून बदलून मित्रपक्षाला बसवले आहे.
PM Imran Khan : पाकिस्तानचे पंतप्रधान इम्रान खान यांनी आपली खुर्ची वाचवण्यासाठी आता राजकीय सौदेबाजी केली आहे. पाकिस्तानी (Pakistani Assembly) संसदेत अविश्वास प्रस्तावाला सामोरे जाणाऱ्या इम्रान खान यांनी आपल्या पक्षाच्या नेत्याला पंजाब प्रांताच्या मुख्यमंत्रिपदाच्या खुर्चीवरून बदलून मित्रपक्षाला बसवले आहे. त्यामुळे आता पंजाब प्रांताचे मुख्यमंत्री परवेझ इलाही (Parvez Elahi) असतील. इलाही हे पाकिस्तान मुस्लिम लीग-कायदा (पीएमएल-क्यू) या पक्षाचे नेते आहेत. पीएमएल-क्यू हा इम्रानच्या पक्ष पाकिस्तान तेहरीक-ए-इन्साफ (पीटीआय)चा महत्त्वाचा मित्रपक्ष आहे. त्यामुळे संसदेत आता पीएमएल-क्यूचे 5 खासदार आहेत. इलाहीपूर्वी पंजाबचे मुख्यमंत्री उस्मान बजदार होते. उस्मान बजदार यांनी सोमवारी संध्याकाळी राजीनामा दिला. उस्मान बजदार यांच्या राजीनाम्यानंतर पीएमएल-क्यूच्या नेत्यांनी संध्याकाळी उशिरा पंतप्रधान इम्रान खान यांची भेट घेतली आणि संसदेत पाठिंबा जाहीर केला.
(MQM-P) एमक्यूएम-पीला एकत्र आणण्याचा प्रयत्न
इम्रानने नाराज झालेल्या मुत्ताहिदा क्वामी मूव्हमेंट-पाकिस्तान (MQM-P) पक्षाला एकत्र आणण्यासाठी प्रयत्नही केले आहेत. पाकिस्तानी मीडियानुसार, सोमवारी पीटीआय आणि एमक्यूएम-पीच्या नेत्यांमध्ये बैठक झाली. या बैठकीत इम्रानच्या पाठिंब्याचा मुद्दा जवळपास निश्चित झाला आहे. एमक्यूएम-पीकडे सागरी मंत्रालय सोपवण्यास इम्रानने सहमती दर्शवल्याचे सांगण्यात येत आहे. सिंध प्रांताचे गव्हर्नर इम्रान इस्माईल यांनी स्थानिक मीडियाला सांगितले की, एमक्यूएमची सरकारशी चर्चा झाली असून यातून एक निष्कर्षही निघाला आहे. एमक्यूएम-पीच्या सर्व अटी मान्य करण्यास सरकार तयार असल्याचे त्यांनी सांगितले. त्यानुसार पीटीआयच्या बंडखोर खासदारांचे मन वळवण्याचे प्रयत्न सुरू झाले आहेत. नॅशनल असेंब्लीमध्ये MQM-P चे 9 खासदार आहेत.
महिला नेत्या नवाजच्या पार्टीत जाण्यासाठी प्रयत्न
पाकिस्तानमध्ये सध्या राजकीय पेचप्रसंगात सट्टा आणि अफवांचा बाजारही तापला आहे. सोमवारी, इम्रान यांच्या पक्षाच्या पीटीआय नेत्या डॉ. फिरदौस आशिक अवान माजी पंतप्रधान नवाझ शरीफ यांच्या पीएमएल-एनमध्ये सामील झाल्याच्याही अफवा पसरल्या होत्या. डॉक्टर फिरदौस यांनी नवाझ शरीफ यांच्या पक्षात जाण्याची इच्छा व्यक्त केल्याचे वृत्त होते. मात्र, नंतर त्यांनी यावर नकार दिला आणि ही अफवा असल्याचे म्हटले.
पंतप्रधानांची खुर्ची अजूनही धोक्यात
इम्रान खान कितीही प्रयत्न करत असले, तरी त्यांच्या खुर्चीवरील धोका अजूनही टळलेला नाही. सोमवारी पाकिस्तानी संसदेत इम्रान यांच्याविरोधात अविश्वास प्रस्ताव मांडण्यात आला. संसदेचे पुढील अधिवेशन आता 31 मार्च रोजी होणार आहे. नॅशनल असेंब्लीमध्ये 342 जागा असून इम्रान यांचे सरकार वाचवण्यासाठी 172 मतांची गरज आहे. इम्रान यांच्या पक्षाचे 155 सदस्य असले तरी 24 खासदार बंडखोर झाले आहेत. त्याचबरोबर इम्रानचे मित्रपक्षही संतापले आहेत.
महत्त्वाच्या बातम्या
ट्रेंडिंग न्यूज
