Attorney General : मुकुल रोहतगी भारताचे नवे अॅटर्नी जनरल, वेणुगोपाल यांच्या निवृत्तीनंतर पदभार स्विकारणार?
Mukul Rohatgi to Become Attorney General : ज्येष्ठ वकील मुकुल रोहतगी पुन्हा एकदा भारताचे अॅटर्नी जनरल म्हणून पदभार स्विकारणार असल्याची माहिती मिळत आहे.
Mukul Rohatgi to Become Attorney General : ज्येष्ठ वकील मुकुल रोहतगी (Mukul Rohatgi) पुन्हा एकदा भारताचे अॅटर्नी जनरल (Attorney General of India) बनू शकतात. यापूर्वी रोहतगी हे 2014 ते 2017 या काळात देशाचे अॅटर्नी जनरल होते. सध्याचे अॅटर्नी जनरल केके वेणुगोपाल (KK Venugopal) यांचा कार्यकाळ 30 सप्टेंबर रोजी संपणार आहे. 91 वर्षीय वेणुगोपाल आता या पदावर राहण्यास इच्छुक नसल्याचं सुत्रांकडून सांगितलं जात आहे. सूत्रांनी दिलेल्या माहितीनुसार, वेणुगोपाल यांच्यानंतर अॅटर्नी जनरल म्हणून मुकुल रोहतगी पदभार स्विकारणार आहेत. परंतु, रोहतगी यांच्या नियुक्तीसंदर्भात अद्याप कोणतीही अधिकृत माहिती समोर आलेली नाही.
2020 मध्ये त्यांचा तीन वर्षांचा कार्यकाळ पूर्ण केल्यानंतर, वेणुगोपाल यांनी त्यांचं वय लक्षात घेऊन त्यांना जबाबदारीतून मुक्त करण्याची विनंती सरकारला केली होती. परंतु, सरकारनं वेणुगोपाल यांना पुढील कार्यकाळासाठी काम करण्यास सांगितलं. सरकारच्या विनंतीनंतर वेणुगोपाल यांनी आणखी दोन वर्ष या पदावर राहण्याचं मान्य केलं. मुकुल रोहतगी 1 ऑक्टोबरपासून अॅटर्नी जनरल म्हणून त्यांचा दुसरा कार्यकाळ सुरू करतील, अशी माहिती सुत्रांनी दिली आहे. त्यांनी भारताचे अतिरिक्त सॉलिसिटर जनरल म्हणूनही काम केलं आहे. 2017 मध्ये रोहतगी यांच्या राजीनाम्यानंतरही सरकारनं जम्मू-काश्मीरमधून कलम 370 रद्द करण्यासह इतरही अनेक संवेदनशील मुद्द्यांवर त्यांचा सल्ला घेतल्याचंही सांगितलं जात आहे.
रोहतगी यांनी लढवले अनेक महत्त्वाचे खटले
2014 मध्ये भाजपनं एकहाती सत्ता स्थापन केली. त्यानंतर मुकुल रोहतगी यांची पहिल्या टर्मसाठी अॅटर्नी जनरल म्हणून नियुक्ती करण्यात आली होती. मुकुल रोहतगी हे भारतातील सर्वात प्रख्यात वकिलांपैकी एक. त्यांनी गुजरात दंगलीसह अनेक महत्त्वाचे खटले लढवले आहेत. गुजरात दंगल प्रकरणाच्या खटल्यात रोहतगी यांनी गुजरात सरकारच्या बाजूनं खटला लढवला होता.
राष्ट्रीय न्यायिक नियुक्ती आयोगाशी संबंधित खटलाही त्यांनी लढवला होता. अलिकडेच मुकुल रोहती यांनी देशभरात गाजलेल्या मुंबई क्रूझ ड्रग प्रकरणाचा खटला लढवला होता. या प्रकरणात बॉलिवूडचा किंग शाहरुख खानचा मुलगा आर्यन खानला एनसीबीनं अटक केली होती. या प्रकरणी त्यांनी आर्यन खानची बाजू मांडली होती.
महत्त्वाच्या बातम्या
