Weather Update: हवामान विभागाचा जून आणि जुलैमध्ये उष्णतेच्या लाटेचा इशारा; श्रीलंकेत मान्सून अडकल्याने अजूनही आठवड्याचीव प्रतीक्षा; यंदा 10 टक्के कमी पावसाचा अंदाज

मान्सून केरळच्या किनारपट्टीवर पोहोचण्याची सर्वसाधारण तारीख 1 जून आहे. यापूर्वी, हवामान विभागाने 26 मे पर्यंत मान्सूनच्या आगमनाचा अंदाज वर्तवला होता.

Weather Update

Source : Facebook

Weather Update: देशात मान्सूनच्या आगमनास विलंब झाला आहे. हवामान विभागाने दिलेल्या माहितीनुसार, श्रीलंकेवरील कमी दाबाचे क्षेत्र आणि वादळी वाऱ्यांमुळे मान्सून गेल्या पाच दिवसांपासून केरळच्या किनारपट्टीपासून 30-35 किलोमीटर अंतरावर अडकून पडला असून, पुढील दोन ते तीन दिवसांत त्याची पुढील वाटचाल होण्याची शक्यता कमी आहे.

उष्णतेची लाट येण्याची शक्यता 

मान्सून केरळच्या किनारपट्टीवर पोहोचण्याची सर्वसाधारण तारीख 1 जून आहे. यापूर्वी, हवामान विभागाने 26 मे पर्यंत मान्सूनच्या आगमनाचा अंदाज वर्तवला होता. ताज्या अंदाजानुसार, तो आता सात दिवसांनी उशिरा केरळच्या किनारपट्टीवर पोहोचेल. याचा अर्थ, मान्सून पूर्वीच्या अंदाजापेक्षा सुमारे 10 दिवसांनी उशिरा देशात दाखल होईल. भारतीय हवामान विभागाच्या (IMD) मते, जून आणि जुलैमध्ये उत्तर प्रदेश, हरियाणा, पंजाब, बिहार, ओडिशा, छत्तीसगड, गुजरात आणि आंध्र प्रदेशमध्ये उष्णतेची लाट येण्याची शक्यता आहे. या काळात तापमान साधारणपणे 30-35 अंश सेल्सिअसच्या आसपास असते. यावेळी तापमान 3 अंशांनी जास्त असेल.

यावर्षी पर्जन्यमान 10 टक्के कमी असेल

हवामान विभागाने सांगितले की, यावर्षी देशात सरासरी 78  सेंटिमीटर पावसाचा अंदाज आहे. हे सामान्य प्रमाणापेक्षा सुमारे 10 टक्के कमी आहे. 13 एप्रिल रोजी 80 सेंटिमीटर पावसाचा अंदाज वर्तवण्यात आला होता. 1971-2020 च्या आकडेवारीनुसार, देशातील सरासरी पर्जन्यमान 87 सेंटीमीटर मानले जाते.

जूनमध्ये मध्य प्रदेश, उत्तर प्रदेश आणि बिहारमध्ये कमी पाऊस

हवामान विभागाने दिलेल्या माहितीनुसार जून महिन्यात मध्य प्रदेश, उत्तर प्रदेश, बिहार आणि झारखंडमध्ये सामान्यपेक्षा कमी पाऊस पडेल. महाराष्ट्र, राजस्थान आणि गुजरातच्या काही भागांसाठी सामान्य पावसाचा अंदाज आहे. या प्रदेशातील शेती मोठ्या प्रमाणावर मान्सूनच्या पावसावर अवलंबून असते. याचा अर्थ पावसाचा थेट परिणाम पिकांवर आणि अन्न उत्पादनावर होतो.

कमी पावसाचा ग्रामीण अर्थव्यवस्थेवर परिणाम 

• कमी पावसामुळे खरीप हंगामातील पेरणी, पीक उत्पादन आणि एकूणच शेतीवर परिणाम होईल, ज्यामुळे शेतकऱ्यांचा खर्च आणि जोखीम दोन्ही वाढतील.
• कमी पावसामुळे उत्पादन घटू शकते, ज्यामुळे पुरवठ्यावर परिणाम होईल आणि भाजीपाला व कडधान्यांसह अन्नपदार्थांच्या किमती वाढतील.
• गावांमध्ये उत्पन्न कमी होऊ शकते, ज्यामुळे ग्रामीण बाजारातील खर्च आणि मागणी या दोन्हींवर परिणाम होईल.
• ग्रामीण भागातील मागणीत घट झाल्यामुळे ट्रॅक्टर आणि दुचाकींसारख्या वाहनांच्या विक्रीवरही परिणाम होण्याची शक्यता आहे.
• पाऊस कमी राहिल्यास, धरणे आणि जलाशयांमधील पाण्याची पातळी सामान्यपेक्षा कमी राहू शकते, ज्यामुळे पाण्याच्या उपलब्धतेवर आणखी परिणाम होईल.

इतर महत्वाच्या बातम्या