LPG Gas Shortage: गॅस सिलिंडर अचानक संपण्याची भीती? घरबसल्या 'या' 3 सोप्या ट्रिक्सने लगेच करा चेक

LPG Gas Shortage: दिल्लीपासून मुंबईपर्यंत सध्या अमेरिका-इस्त्रायल आणि इराण यांच्यात सुरू असलेल्या युद्धामुळे गॅसची टंचाई जाणवत आहे.

LPG Gas Shortage

Source : ABP Majha

LPG Gas Shortage: दिल्लीपासून मुंबईपर्यंत सध्या अमेरिका-इस्त्रायल आणि इराण यांच्यात सुरू असलेल्या युद्धामुळे गॅसची टंचाई जाणवत आहे. सतत वाढणारे गॅसचे दर, गॅसअभावी हॉटेल-ढाबे बंद होण्याची वेळ येणे, तसेच टपरीवरील चहाच्या किमतीतही वाढ झाल्याचे सातत्याने समोर येत आहेत. एलपीजी सिलेंडरच्या पुरवठ्याबाबत अनेकांना अडचणींचा सामना करावा लागत असल्याचे चित्र दिसत आहे.

अनेक ठिकाणी गॅस सिलेंडर मिळण्यास उशीर होत असल्याच्या तक्रारी समोर येत आहेत. अशा परिस्थितीत जर अचानक स्वयंपाकघरातील गॅस संपला, तर मोठी अडचण निर्माण होऊ शकते. विशेषतः घरात पाहुणे आले असतील किंवा घाईघाईत स्वयंपाक करायचा असेल, तर ही समस्या अधिकच त्रासदायक ठरते. अनेकदा लोकांना गॅस संपल्याचे तेव्हाच कळते, जेव्हा स्वयंपाक करताना अचानक चुलीची ज्वाळा बंद होते. मात्र, सिलेंडरमध्ये किती गॅस शिल्लक आहे हे आधीच समजले, तर वेळेत नवीन सिलेंडर बुक करता येते आणि अशा अडचणींपासून सहज बचाव करता येतो. यासाठी एखाद्या खास मीटर किंवा मशीनची गरज भासेल, असे अजिबात नाही. काही सोप्या घरगुती उपायांच्या मदतीने तुम्ही घरबसल्या सिलेंडर संपण्यापूर्वीच त्यामध्ये किती गॅस शिल्लक आहे हे सहज ओळखू शकतात.

1. पाण्याच्या मदतीने ओळखा गॅसचा स्तर

सिलेंडरमध्ये किती गॅस शिल्लक आहे हे जाणून घेण्याचा सर्वात सोपा मार्ग म्हणजे पाण्याची ट्रिक. यासाठी एका ग्लास किंवा मगमध्ये पाणी घ्या आणि सिलेंडरच्या वरपासून खालीपर्यंत हळूहळू ओता. त्यानंतर काही सेकंदांनी हाताने सिलेंडरला वरून खालीपर्यंत स्पर्श करून पाहा.

सिलेंडरला स्पर्श केल्यावर तुम्हाला जाणवेल की त्याचा काही भाग थंड आहे, तर काही भाग तुलनेने थोडा गरम आहे. ज्या भागापर्यंत सिलेंडर थंड वाटेल, त्या भागापर्यंत गॅस असल्याचे समजावे. असे होण्याचे कारण म्हणजे सिलेंडरच्या आत असलेली द्रवरूप एलपीजी उष्णता पटकन शोषून घेते, त्यामुळे त्या भागाच्या बाहेरील पृष्ठभाग थंड होते. जर थंड वाटणारा भाग खूप खालीपर्यंत असेल, तर समजून घ्या की गॅस लवकरच संपण्याच्या मार्गावर आहे.

2. सिलेंडरच्या वजनावरूनही लावता येतो अंदाज

तुम्हाला गॅस किती शिल्लक आहे याचा थोडा अधिक अचूक अंदाज घ्यायचा असेल, तर सिलेंडरचे वजन तपासण्याची पद्धतही उपयोगी ठरते. प्रत्येक एलपीजी सिलेंडरवर त्याचे रिकामे वजन (टॅर वेट) लिहिलेले असते. घरात वजन मोजण्याची मशीन असेल, तर सिलेंडर त्यावर ठेवून त्याचे एकूण वजन पाहू शकता. त्यानंतर एकूण वजनातून रिकामे वजन वजा करा. उदाहरणार्थ, सिलेंडरचे एकूण वजन 28.5 किलो आहे आणि त्यावर रिकामे वजन 15.5 किलो असे लिहिलेले आहे, तर त्यामध्ये सुमारे 13 किलो गॅस शिल्लक असल्याचा अंदाज लावता येतो.

3. गॅसच्या ज्वाळेवरूनही मिळू शकतो संकेत

सिलेंडरमधील गॅस कमी होऊ लागली की त्याचा परिणाम चुलीच्या ज्वाळेवरही दिसू लागतो. जर तुम्हाला आधीच्या तुलनेत गॅसची ज्वाळा कमी झाल्यासारखी वाटत असेल किंवा तिचा रंग निळ्या ऐवजी किंचित पिवळसर दिसत असेल, तर तो सिलेंडर लवकरच संपणार असल्याचा संकेत असू शकतो. अशा परिस्थितीत अनेकदा अन्न शिजण्यासाठीही जास्त वेळ लागतो. जर असे जाणवत असेल, तर तात्काळ नवीन सिलेंडर बुक करणेच योग्य ठरेल.

आणखी वाचा