GHMC Election Voting Live Updates: राज्यात विधानपरिषद शिक्षक-पदवीधर तर हैदराबादमध्ये महापालिकेसाठी आज मतदान

GHMC, Hyderabad Municipal Corporation Election Polling Live Updates: राज्यात विधानपरिषद शिक्षक-पदवीधर मतदारसंघातील पाच जागांसाठी मतदान होत आहे. तर तेलंगाणा राज्यात ग्रेटर हैदराबाद महानगरपालिकेसाठी निवडणूक घेण्यात येत आहे.

Background

मुंबई : राज्यात विधानपरिषदेच्या पदवीधर आणि शिक्षक मतदारसंघातील पाच जागांसाठी आज (1 डिसेंबर) मतदान होणार आहे. विधानसभा निवडणुकीनंतर महाविकास आघाडी आणि भाजप या निवडणुकीच्या निमित्ताने पहिल्यांदा समोरासमोर लढत आहेत. तर तिकडे तेलंगाणा राज्यात ग्रेटर हैदराबाद महानगरपालिका निवडणुकीसाठी आज मतदान होणार आहे.

 

राज्यात पुणे पदवीधर आणि शिक्षक मतदारसंघासह, नागपूर पदवीधर, औरंगाबाद पदवीधर आणि अमरावती शिक्षक मतदारसंघात ही निवडणूक होत आहे. आज सकाळी आठ वाजल्यापासून संध्याकाळी पाच वाजेपर्यंत मतदानाची प्रक्रिया पार पडेल. तर 3 डिसेंबर रोजी निवडणुकीचा निकाल जाहीर होणार आहे.

 

महाविकास आघाडीचे उमेदवार
महाविकास आघाडीकडून पदवीधर आणि शिक्षक मतदारसंघासाठी पाच उमेदवारांची यादी जाहीर केली आहे. यामध्ये काँग्रेस आणि राष्ट्रवादी काँग्रेसचे प्रत्येकी दोन तर शिवसेनेचा एक उमेदवार रिंगणात आहेत.

 

ग्रेटर हैदराबाद महानगरपालिका निवडणूक

 

ग्रेटर हैदराबाद महानगरपालिका निवडणुकीसाठी आज मतदान होणार आहे. सद्यस्थितीत 1122 उमेदवार रिंगणात आहेत, त्यात 150 नगरसेवक निवडून येणार आहेत. यावेळी भाजपने ही निवडणूक प्रतिष्ठेची केली आहे. हैदराबाद हा अखिल भारतीय मजलिस-ए-इत्तेहादुल मुसलमीन प्रमुख असदुद्दीन ओवैसी यांचा बालेकिल्ला मानला जातो. याच बालेकिल्ल्यात भाजप सुरुंग लावण्याची प्रयत्न करीत आहे. याची सुरुवात विधानसभा पोटनिवडणुकांमध्ये भाजपने आपला आधार मजबूत करून सुरूवात केली आहे. सकाळी 7 ते सायंकाळी 6 या वेळेत मतदान होणार असून 4 डिसेंबर रोजी निकाल जाहीर होईल.

 

मागील वेळी तेलंगणाचे मुख्यमंत्री के चंद्रशेखर राव यांच्या पक्ष तेलंगना राष्ट्र समितीने (टीआरएस) विजय मिळविला होता. टीआरएसने 99 जागा जिंकल्या. त्याच वेळी असदुद्दीन ओवैसी यांच्या पक्ष एआयएमआयएमलाही 44 जागा मिळाल्या. पण यावेळी भाजपने ही लढाई प्रतिष्ठेची केली आहे.

19:41 PM (IST)  •  03 Dec 2020

अमरावती विभाग शिक्षक मतदार संघ निवडणूक: अपक्ष उमेदवार अॅड. किरण सरनाईक 6 हजार 88 मतांनी आघाडीवर, महाविकास आघाडीचे उमेदवार श्रीकांत देशपांडे यांना 5 हजार 122 मतांनी द्वितीय क्रमांकावर. शिक्षक महासंघाचे उमेदवार शेखर भोयर 4889 मतांनी तृतीय क्रमांकावर.

19:39 PM (IST)  •  03 Dec 2020

पुणे पदवीधर मतदारसंघ : राष्ट्रवादी काँग्रेसच्या अरुण लाड यांची आघाडी कायम, प्रतिस्पर्धी भाजपचे संग्राम देशमुख यांच्या पेक्षा साधारण दहा हजार मतांनी पुढे, आतापर्यत 65 ते 70 हजार मतांची मोजणी शिक्षक मतदारसंघ - काँग्रेसचे जयंत आसगावकर यांची आघाडी कायम दत्तात्रय सावंत यांच्या पेक्षा चार हजार पाचशे मतांनी पुढे, साधारण साडे 36 हजार मतांची मोजणी

19:14 PM (IST)  •  03 Dec 2020

नागपूर पदवीधर निवडणूक : पहिल्या फेरीत काँग्रेसचे अभिजित वंजारी 4 हजार 850 मतांनी पुढे

23:34 PM (IST)  •  01 Dec 2020

आज झालेल्या पदवीधर मतदान प्रक्रियेत सोलापूरचे भाजप खासदार जय सिद्धेश्वर स्वामी यांनी पंढरपूर शहरातील द. ह. कवठेकर प्रशालेत एक मतदान केंद्रात गेल्याने राष्ट्रवादीने आक्षेप घेतला आहे . आज या मतदान केंद्रावर पदवीधर व शिक्षक मतदारसंघाचे मतदान सुरू असताना खासदार सिद्धेश्वर स्वामी थेट एक मतदान केंद्रात घुसल्याने आदर्श आचारसंहितेचा भंग झाल्याचा आक्षेप राष्ट्रवादीचे शहराध्यक्ष संदीप मांडवे यांनी घेतला आहे. वास्तविक आदर्श आचारसंहितेच्या नियमानुसार मतदान प्रक्रियेतील कर्मचारी, उमेदवार प्रतिनिधी , निवडणूक निरीक्षक व मतदार याशिवाय कोणालाही निवडणूक केंद्रात जाण्याची परवानगी नसताना भाजप खासदार थेट मतदान केंद्रात गेले होते . यावर आक्षेप घेताच आपणास मतदान केंद्रास भेट देऊन योग्य पद्धतीने मतदान सुरू आहे का हा पाहण्याचा अधिकार असल्याचा दावा खासदार जय सिद्धेश्वर स्वामी यांनी केला आहे. उद्या राष्ट्रवादीच्या वतीने सोलापूर येथे लेखी तक्रार दिली जाणार आहे.

22:17 PM (IST)  •  01 Dec 2020

पुणे पदवीधर मतदारसंघासाठी सांगली जिल्ह्यामध्ये चुरशीने मतदान. जिल्ह्यात पदवीधर मतदार संघासाठी 64.60 तरी शिक्षक मतदार संघासाठी 84.43 टक्के मतदानाची नोंद झाली आहे.