मनी लाँड्रिंगप्रकरणी रॉबर्ट वाड्रांची पाच दिवसात तिसऱ्यांदा चौकशी

याआधी 6 फेब्रुवारी आणि 7 फेब्रुवारीला वाड्रा यांची जवळपास 15 तास ईडीने चौकशी केली होती. 6 फेब्रुवारीला प्रियांका गांधी स्वत: रॉबर्ड वाड्रा यांना ईडी कार्यालयात सोडायला आल्या होत्या.

नवी दिल्ली : मनी लाँड्रिंगप्रकरणी काँग्रेसच्या सरचिटणीस प्रियंका गांधींचे पती रॉबर्ट वाड्रा यांची ईडीकडून आज तिसऱ्यांदा चौकशी होत आहे. रॉबर्ट वाड्रा ईडी कार्यालयाता पोहोचले आहेत. सूत्रांच्या माहितीनुसार, वाड्रा यांनी चौकशी दरम्यान काही कागदपत्र ईडीला दिले आहेत.

आज वाड्रा यांना जवळपास 40 प्रश्न विचारले जाण्याची शक्यता आहे. याआधी 6 फेब्रुवारी आणि 7 फेब्रुवारीला वाड्रा यांची जवळपास 15 तास ईडीने चौकशी केली होती. 6 फेब्रुवारीला प्रियांका गांधी स्वत: रॉबर्ड वाड्रा यांना ईडी कार्यालयात सोडायला आल्या होत्या. तर 7 फेब्रुवारीला प्रियांका गांधी रॉबर्ट वाड्रा यांना ईडी कार्यालयात घ्यायला आल्या होत्या.

6 फेब्रुवारी

6 फेब्रुवारीला वाड्रा यांची 2010 साली लंडनहून सुमीत चड्डा नावाच्या व्यक्तीनं पाठवलेल्या मेलवर चौकशी झाली. त्या मेलमध्ये लंडनमधील संपत्तीच्या नूतनीकरणाचा उल्लेख होता. सुमीत चड्डा हे आर्म्स डीलर संजय भंडारी यांचा चुलत भाऊ आहे. तरी, डीलमध्ये सहभागी असणाऱ्या कोणालाही ओळखत नसल्याचं काल वाड्रा यांनी ईडीच्या अधिकाऱ्यांना सांगितल्याची माहिती आहे. दरम्यान, सुमीत चड्डा यांच्या 2010 सालच्या मेलवर आज ईडीकडून 40 प्रश्न वाड्रांना विचारले गेल्याची माहिती आहे.

7 फेब्रुवारी

7 फेब्रुवारी रॉबर्ड वाड्रा यांची अमलबजावणी संचलनालय म्हणजेच ईडीनं 6 तास कसून चौकशी केली होती. या चौकशीदरम्यान वाड्रा यांना 36 प्रश्न ईडीकडून विचारण्यात आले होते. याशिवाय ईमेल आणि कागदपत्रांची विचारणा वाड्रा यांना केली गेली. वाड्रांनी ईडीच्या सर्व प्रश्नांची उत्तर देत आरोप फेटाळून लावले होते. लंडनमधील ब्रायनस्टन स्क्वेअरजवळ कोट्यवधींची मालमत्ता खरेदी केल्याचा आरोप त्यांच्यावर आहे. या व्यवहारामध्ये मनी लाँड्रिंग झाल्याचा आरोप ठेवण्यात आला आहेत.

मनोज अरोरा स्कायलाइट हॉस्पिटॅलिटी प्रा. लि. कंपनीचा माजी कर्मचारी आहे. वड्रा यांच्याशी संबंधित या कंपनीने 2008 मध्ये ओंकारेश्वर प्रॉपर्टीजकडून 3.5 एकर जमीन 7.50 कोटी रुपयांना खरेदी केली. त्यानंतर स्कायलाइटने डीएलएफला हीच जमीन 58 कोटी रुपयांना विकली आणि 509 कोटी रुपये नफा कमाविला, अशी नोंद एफआयआरमध्ये आहे. आपण मनोज अरोराला ओळखत असलो तरी त्याने आपल्यासाठी काही ई-मेल लिहिले नसल्याचं रॉबर्ट वाड्रा यांनी काल सांगितलं होतं.

काय आहे प्रकरण ?

शस्त्रास्त्रांची विक्री करणाऱ्या दलालाकडून लंडनमध्ये बेहिशोबी मालमत्ता खरेदी केल्याचा आरोप वाड्रांवर करण्यात आला आहे. मीडिया रिपोर्टनुसार, 2009 साली झालेल्या एका शस्त्रास्त्रांच्या व्यवहारात शस्त्रास्त्रांचा पुरवठा करणाऱ्या दलालाकडून वाड्रा यांनी लंडनमध्ये बेहिशोबी मालमत्ता खरेदी केली, असा आरोप त्यांच्यावर करण्यात आला आहे. या खरेदी केलेल्या घराचा पत्ता 12, एलरटन हाउस, ब्रायनस्टन स्क्वेअर, लंडन असा देण्यात आला आहे.

रॉबर्ट वाड्रा आणि त्यांचे सहाय्यक मनोज आरोरा यांच्याकडून पाठवण्यात आलेल्या मेलमध्ये अर्थिक देवाण-घेवाण आणि लंडनमधील घराच्या नुतनीकरणाचा उल्लेख करण्यात आला आहे. यासाठी तब्बल 19 पाउंड म्हणजे म्हणजे 19 कोटी रूपये खर्च करण्यात आले आहेत. हा व्यवहार ऑक्टोबर 2009 मध्ये करण्यात आला असून जून 2010 मध्ये याची विक्री करण्यात आली. दरम्यान, रॉबर्ट वाड्रा यांच्या वकिलांनी हे सगळे आरोप फेटाळून लावले आहेत. तर काँग्रेस नेते अभिषेक मनु सिंघवी यांनी हे सर्व आरोप तथ्यहिन असल्याचे सांगितले होते.