एक्स्प्लोर

देशातील 12 राज्य भाजपमय, काँग्रेसचं अस्तित्व नगण्य

By : एबीपी माझा वेब टीम | Updated at : 11 Mar 2017 07:07 PM (IST)

मुंबई : देशातील एकेकाळचा सर्वात मोठा पक्ष असलेल्या काँग्रेसचं देशातील फक्त पाच राज्यात अस्तित्व उरलं आहे. तर देशातील बारा राज्य भाजपमय झाली आहेत. तीन राज्यात मित्रपक्षांसोबत तर नऊ राज्यात भाजप स्वबळावर सत्तेत आहे. शिवाय गोवा आणि मणिपूर या दोन राज्यातही सत्ता स्थापन करण्याचे भाजपचे प्रयत्न असतील. 2014 लोकसभेनंतरची मोदी लाट पाच राज्यांच्या निवडणुकांमध्येही कायम दिसली. याच लाटेवर सवार होत भाजपने देशातील सर्वात मोठं राज्य असलेल्या उत्तर प्रदेशमध्ये त्रिशतक केलं. तर काँग्रेसकडून उत्तराखंड हिसकावून घेतलं. अकाली दलसोबत युती असलेल्या पंजाबमध्ये भाजपला पराभवाचा सामना करावा लागला. तिथे काँग्रेसने सत्ता काबीज करण्यात यश मिळवलं. तर गेल्या 15 वर्षांपासून सत्ता असलेल्या मणिपूरमध्ये भाजपने खातं उघडत जोरदार मुसंडी मारली आहे. मणिपूर आणि गोव्यात भाजप आणि काँग्रेसमध्ये अटीतटीची लढत झाली. सध्या भाजप कुठे-कुठे? उत्तर प्रदेश, उत्तराखंड, गोवा, मणिपूर आणि पंजाब राज्याच्या विधानसभा निवडणुकीनंतर देशातील 12 राज्यांमध्ये भाजप सत्तेत आहे. मणिपूर आणि गोव्यात सत्ता स्थापन करण्यास भाजपला यश मिळाल्यास हा आकडा 14 होईल. अरुणाचल प्रदेश, जम्मू काश्मीर आणि आंध्र प्रदेश या राज्यात भाजप मित्रपक्षांसोबत सत्तेत सहभागी आहे. तर इतर 9 राज्यांमध्ये भाजप स्वबळावर सत्तेत आहे. bjp_web

काँग्रेसची सत्ता कुठे-कुठे?

पंजाब
हिमाचल प्रदेश
कर्नाटक
मेघालय
मिझोराम

काँग्रेसची सत्ता असलेल्या कर्नाटकमध्ये मे 2018 पूर्वी निवडणूक होणार आहे. तर हिमाचल प्रदेशमध्ये जानेवारी 2018 पूर्वी, मेघालयमध्ये मार्च 2018 पूर्वी आणि मिझोराममध्ये डिसेंबर 2018 मध्ये विधानसभा निवडणूक होणार आहे. भाजपची सत्ता असलेल्या आणि पंतप्रधान नरेंद्र मोदी यांच्या गुजरात विधानसभेची निवडणूकही जानेवारी 2018 पूर्वी होईल. 2019 च्या लोकसभा निवडणुकीपूर्वी होणाऱ्या या निवडणुकांमध्ये भाजप आणि काँग्रेसमध्ये जोरदार टक्कर होईल. लोकसभा निवडणुकीची रंगीत तालिम म्हणून या राज्यांच्या निवडणुका होतील. त्यामुळे काँग्रेसची या पाच राज्यातील सत्ता वाचवण्यासाठी प्रतिष्ठा पणाला लागणार आहे. संबंधित बातम्या :