Bengal Elections : ममता बॅनर्जी आज दाखल करणार उमेदवारी अर्ज, भाजपच्या शुभेन्दू अधिकारींचा नंदीग्राममध्ये रोड शो

तृणमूलच्या ममता बँनर्जी आज नंदीग्राममधून आपला उमेदवारी अर्ज दाखल  करणार आहेत तर त्यांच्या विरोधातले  भाजपचे उमेदवार शुभेन्दू अधिकारी हे आज रोड शो करणार आहेत. 

West Bengal election

Bengal Elections : पश्चिम बंगालमध्ये राजकारणातील हाय होल्टेज ड्रामा बघायला मिळणार आहे. पश्चिम बंगालच्या मुख्यमंत्री ममता बॅनर्जी आज नंदीग्राममधून आपला उमेदवारी अर्ज दाखल करणार आहेत तर त्यांचे विरोधक उमेदवार शुभेन्दू अधिकारी आज नंदीग्राममध्ये एक रोज शो करणार आहेत. त्यामुळे पश्चिम बंगालचे राजकारण आज ढवळून निघण्याची शक्यता व्यक्त केली जात आहे.

ममता बॅनर्जी आज नंदीग्राममधून आपला उमेदवारी अर्ज दाखल करणार आहेत. उमेदवारी अर्ज दाखल केल्यानंतर त्या नंदीग्राममधील प्रसिद्ध शिव मंदिरात दर्शनासाठी जाणार आहेत. त्यानंतर त्या पक्षाच्या महत्वाच्या नेत्यांची आणि कार्यकर्त्यांची भेट घेणार आहेत. 

त्याच वेळी दुसऱ्या बाजूला त्यांचे विरोधक उमेदवार आणि भाजपचे उमेदवार शुभेन्दू अधिकारी आज सकाळी दहा वाजता नंदीग्राममध्ये रोड शो करणार आहेत. टेंगूवा रस्त्यापासून सुरु होणारा हा रोड शो जानकीनाथ मंदिरापर्यंत जाणार आहे. त्यानंतर शुभेन्दू अधिकारील त्यांच्या नव्या निवडणूक कार्यालयाचे उद्धाटन करणार आहेत. शुभेन्दू अधिकारी त्यांचा उमेदवारी अर्ज 12 मार्चला भरणार असल्याची माहिती आहे. 

गेली अनेक वर्षे नंदीग्रामचं प्रतिनिधित्व करणारे शुभेन्दू अधिकारी हे नुकतेच ममतांची साथ सोडून भाजपमध्ये गेलेले आहेत. ममतांच्या कॅबिनेटमध्ये नंबर दोनचे मंत्री असा त्यांचा उल्लेख होत होता. मात्र ऐन विधानसभा निवडणुकीच्या तोंडावर शुभेन्दू हे भाजपमध्ये सामील झालेले आहेत. 

''माझं अंतर्मन मला सांगत आलेलं आहे नंदीग्राम हे नेहमीच माझ्यासाठी लकी स्थान राहिलेलं आहे. माझ्यासाठी ते कायम पवित्र आहे. त्यामुळे मी नंदीग्राममधून लढलं पाहिजे. मी आमचे प्रदेशाध्यक्ष सुब्रतो बक्षी यांना विनंती करते की त्यांनी नंदीग्राममधून माझ्या उमेदवारीला परवानगी द्यावी." असं ममता नंदीग्रामच्या जाहीर सभेत म्हणाल्या होत्या. ममता बॅनर्जी या सध्या कोलकात्याच्या भवानीपूर मतदारसंघातून विधानसभेवर निवडून येतात. हाच त्यांचा पारपंरिक मतदारसंघ आहे.

ममतांना नंदीग्राममधून हरवूनच दाखवेन अन्यथा राजकारण सोडून देईन अशी गर्जना शुभेन्दू यांनी केली आहे. 2006 पासून शुभेन्दू इथे आमदार म्हणून निवडून येत आहेत. त्यांचे वडील हे या मतदारसंघाचे विद्यमान खासदार आहेत. तसेच शुभेन्दू यांचे दोन भाऊही राजकारणात असून त्यांचीही या भागात पकड आहे.

पश्चिम बंगाल निवडणुका 8 टप्प्यात होणार आहेत. पहिल्या टप्प्यातील मतदान 27 मार्च रोजी होईल. त्यानंतर 1 एप्रिल, 6 एप्रिल, 10 एप्रिल, 17 एप्रिल, 22 एप्रिल, 26 एप्रिल आणि 29 एप्रिल रोजी मतदान होईल.