एक्स्प्लोर

एअर इंडियाने खा. गायकवाड यांचं तिकीट पुन्हा रद्द केलं!

By : एबीपी माझा वेब टीम | Updated at : 28 Mar 2017 04:29 PM (IST)

नवी दिल्ली : एअर इंडियाच्या अधिकाऱ्याला मारहाण केल्याप्रकरणी वादात सापडलेले शिवसेना खासदार रवींद्र गायकवाड यांच्या अडचणी थांबायचं नाव घेत नाही. रवींद्र गायकवाड यांनी बुक केलेलं तिकीट एअर इंडियाने पुन्हा रद्द केलं. खासदार गायकवाड यांनी एअर इंडियाचं मुंबईहून दिल्लीचं तिकीट बुक केलं होतं. परंतु एअर इंडियाने ते रद्द केलं. एअर इंडियाने खासदार रवींद्र गायकवाड यांचं तिकीट रद्द करण्याची ही दुसरी वेळ आहे. अधिकाऱ्याला मारहाण केल्याने एअर इंडियाने खासदार गायकवाड यांना ब्लॅक लिस्टमध्ये टाकलं होतं. त्यानंतर त्यांचं तिकीटही रद्द केलं होतं. संसदेत विमान कंपन्यांविरोधात हक्कभंग दाखल केल्यानंतरही एअर इंडियाच्या भूमिकेत कोणतीही नरमाई आलेली नाही. एअर इंडियासह सात एअरलाईन्स कंपन्यांनी रवींद्र गायकवाड यांच्या विमान प्रवासावर बंदी घातली आहे. दरम्यान, उस्मानाबादचे खासदार रवींद्र गायकवाड सध्या कुठे आहेत, याबाबत अद्याप कोणतीही माहिती मिळालेली नाही. काय आहे प्रकरण? उस्मानाबादचे शिवसेना खासदार रवींद्र गायकवाड हे पुण्याहून दिल्लीला जात होते. बिझनेस क्लासचं तिकीट असताना आपल्याला इकॉनॉमिक क्लासमध्ये बसायला सांगितलं, असा दावा गायकवाड यांनी केला. रवींद्र गायकवाड त्याची तक्रार दिल्लीत गेल्यावर करणार होते. दिल्लीत विमान पोहोचल्यानंतर त्यांनी तक्रार पुस्तिका मागवली, पण एअर इंडियाच्या कर्मचाऱ्यांनी त्यासाठी नकार दिला, असा दावा गायकवाड यांनी केला. VIDEO: खा. रवींद्र गायकवाडांची गुंडगिरी विमानातल्या कॅमेऱ्यात कैद विमानातून सर्व कर्मचारी उतरुन गेल्यानंतरही रवींद्र गायकवाड बसून राहिले. तक्रार करण्याचा त्यांचा हट्ट होता. त्यानतंर क्रू मेंबरने एअर इंडियाच्या कर्मचाऱ्याला बोलावलं. मात्र त्या कर्मचाऱ्याने अरेरावीची भाषा केली, असं रवींद्र गायकवाड यांचं म्हणणं आहे. … म्हणून मी एअर इंडियाच्या कर्मचाऱ्याला 25 सँडल मारले : रवींद्र गायकवाड ‘मी शिवसेनेचा खासदार आहे, भाजपचा नाही, मला तक्रार करायची आहे, असं मी म्हणालो. पण कोण खासदार, मी पंतप्रधान नरेंद्र मोदींना सांगतो, अशा भाषेत संबंधित कर्मचाऱ्याने उद्धट भाषा वापरली. त्यानंतर मी उठून त्याची कॉलर धरली आणि 25 सँडल मारले’’, अशी कबुली रवींद्र गायकवाड यांनी दिली.