ABP Majha Impact: दारू पिऊन वर्गातच झिंगलेल्या 'त्या' मद्यपी शिक्षकावर निलंबनाची कारवाई, गेल्या महिन्यापासून होता गैरहजर
Gondia: घनश्याम मरस्कोल्हे हा शिक्षक गेल्या महिन्यापासून सातत्याने गैरहजर असल्याची माहिती समोर आली आहे. आता त्याच्यावर निलंबनाची कारवाई करण्यात आलीय.
गोंदिया : मद्यप्राशन करून वर्ग खोलीतच लघुशंका करून तिथे ताणून झोपल्याचा घृणास्पद आणि संतापजनक प्रकार गुरुवारी गोंदिया जिल्ह्यातील गोरेगाव पंचायत समितीच्या निंबा येथील प्राथमिक शाळेत घडला होता. ही बातमी 'एबीपी माझा' वर सर्वप्रथम प्रसारित होताच प्रशासनात मोठी खळबळ उडाली. आता या बातमीची दखल घेत गोंदिया जिल्हा परिषदचे मुख्य कार्यकारी अधिकारी अनिल पाटील यांनी मद्यपी सहायक शिक्षक घनश्याम मरस्कोल्हे याच्यावर निलंबनाची कारवाई केली आहे. या प्रकरणाच्या चौकशीत (Gondia Teacher Viral Video) सदर मरस्कोल्हे हा शिक्षक 16 नोव्हेंबरपासून सातत्याने गैरहजर असल्याचीही गंभीर बाब समोर आली आहे.
Gondia Teacher Viral Video: झिंगलेला शिक्षक वर्गातच आडवा झाला
गोंदिया येथील निंबा प्राथमिक शाळेमध्ये गुरुवारी हा प्रकार घडला होता. घनश्याम मरस्कोल्हे या शिक्षकाने यथेच्छ मद्यप्राशन करून शाळेत प्रवेश केला. त्यानंतर त्याने वर्गातच लघुशंका केली. शिक्षकाने केलेल्या या प्रकाराने विद्यार्थी भयभीत झाले आणि त्यांनी हा प्रकार मुख्याद्यापक आणि पालकांच्या कानावर घातला. यावेळी हा झिंगलेला शिक्षक वर्गातच आडवा झाला होता.
या मद्यधुंद शिक्षकाला ग्रामीण रुग्णालयात दाखल करून त्यांची वैद्यकीय तपासणी केली होती. त्यानंतर शिक्षण विभागाने याची तात्काळ दखल घेत चौकशीचे आदेश दिले होते. आज त्याच्यावर निलंबनाची कारवाई करण्यात आली आहे.
Gondia Teacher Viral Video: व्हिडीओ व्हायरल
या घटनेची परिसरात चांगलीच चर्चा रंगली होती. अनेकांनी तर या घटनेचा व्हिडीओ काढला होता, तो सोशल मीडियावर व्हायरल झाला. या शिक्षकाला दारूची नशा इतकी चढली होती, की आपल्या आजूबाजूला काय होत आहे याचं भानदेखील त्याला नव्हतं.
विद्येच्या मंदिरातच हे झिंगाट शिक्षक झोपले असल्याबाबत शाळेतील विद्यार्थ्यांनी आपल्या पालकांना शाळेत बोलावलं. हा प्रकार पाहताच पालकांनाही धक्का बसला. पालकांनी यांची तक्रार वरिष्ठ अधिकाऱ्यांकडे केली. नंतर शिक्षण विभागाने याची तात्काळ दखल घेत चौकशीचे आदेश दिले.
ऑगस्ट महिन्यात असाच एक प्रकार अमरावती जिल्ह्यातून समोर आला होता. मेळघाटमधील एका जिल्हा परिषद शाळेतील शिक्षकाचा मद्यधुंद अवस्थेतील व्हिडrओ चांगलाच व्हायरल झाला होता.
ही बातमी वाचा:
महत्त्वाच्या बातम्या
