Balu Dhanorkar : ज्या दिवशी वडिलांवर अंत्यसंस्कार, त्याच दिवशी रुग्णालयात, बाप-लेकाचा तीन दिवसात मृत्यू; धानोरकर कुटुंबावर दु:खाचा डोंगर कोसळला!

Balu Dhanorkar News : तीनच दिवसांपूर्वी बाळू धानोरकर यांचे वडील नारायण धानोरकर यांचं निधन झालं होतं. त्यानंतर आज बाळू धानोरकर यांचं अकाली निधन झालं. अवघ्या तीन दिवसात पिता पुत्राच्या निधनामुळे धानोरकर कुटुंबावर दुखाचा डोंगर कोसळला आहे.

Narayan Dhanorkar Balu Dhanorkar

Balu Dhanorkar News : चंद्रपूरचे (Chandrapur) काँग्रेसचे खासदार बाळू उर्फ सुरेश धानोरकर (Balu Dhanorkar) यांचं आज (30 मे) निधन झालं. दिल्ली इथल्या मेदांता रुग्णालयात (Medanta Hospital) वयाच्या 47 व्या वर्षी त्यांनी अखेरचा श्वास घेतला. दरम्यान धानोरकर कुटुंबावर मोठा आघात झाला आहे. तीनच दिवसांपूर्वी बाळू धानोरकर यांचे वडील नारायण धानोरकर यांचं निधन झालं होतं. त्यानंतर आज बाळू धानोरकर यांचं अकाली निधन झालं. अवघ्या तीन दिवसात पिता पुत्राच्या निधनामुळे धानोरकर कुटुंबावर दुखाचा डोंगर कोसळला आहे.

आधी पित्याचं निधन

बाळू धानोरकर यांचे वडील नारायण आत्माराम धानोरकर यांचं शनिवारी 28 मे रोजी संध्याकाळी साडेपाच वाजता नागपूर इथे दीर्घ आजाराने निधन झालं होतं. वयाच्या 80 व्या वर्षी त्यांची प्राणज्योत मालवली. त्यांच्यामागे दोन मुले खासदार बाळू धानोरकर आणि भद्रावतीचे नगराध्यक्ष अनिल धानोरकर, मुलगी अनिता बोबडे, सून आमदार प्रतिभा धानोरकर यांच्यासह पत्नी वत्सला धानोरकर, नातवंडे असा बराच मोठा आप्त परिवार होता. नारायण धानोरकर हे पेशाने शिक्षक होते. त्यानंतर भद्रावती इथल्या घुटकाळा वॉर्डातील निवासस्थानी 27 मे रात्री आठ ते 28 मे सकाळी आठ वाजेपर्यंत पार्थिव अंत्यदर्शनासाठी ठेवण्यात आले होते. त्यांच्या पार्थिवावर रविवारी 28 मे रोजी सकाळी 9 वाजता भद्रावती इथल्या जैन मंदिर स्मशानभूमी इथे अंत्यसंस्कार करण्यात आले. 

मग पुत्राचा अखेरचा श्वास

परंतु ज्या दिवशी नारायण धानोरकर यांच्यावर अंत्यसंस्कार करण्यात आले, त्याच दिवशी म्हणजे 28 मे रोजी बाळू धानोरकर यांची प्रकृती बिघडल्याने त्यांना नागपुरातील अरिहंत या खासगी रुग्णालयात दाखल करण्यात आलं. परंतु प्रकृतीत फारशी सुधारणा न झाल्याने एअर अॅम्ब्युलन्सने त्यांना दिल्लीतील मेदांता रुग्णालयात दाखल करण्यात आलं. इथे त्यांच्यावर उपचार सुरु होते. परंतु प्रकृती खालावल्याने आज सकाळी त्यांनी अखेरचा श्वास घेतला. एअर अॅम्ब्युलन्सने त्यांचं पार्थिव चंद्रपुरात आणण्यात येईल. तर उद्या (31 मे) संध्याकाळी 5 वाजता वरोरा इथे त्यांच्यावर अंत्यसंस्कार होणार आहेत. बाळू धानोरकर यांचे बंधू अनिल धानोरकर यांनी ही माहिती दिली. त्यामुळे अवघ्या तीन दिवसात धानोरकर कुटुंबाने पिता पुत्राला गमावलं. 

महाराष्ट्रातील काँग्रेसचे एकमेव खासदार

लोकसभेतील काँग्रेसचे महाराष्ट्रातील एकमेव खासदार असलेले बाळू धानोरकर हे अनेक वर्षे शिवसेनेत होते. शिवसेनेचे जिल्हाध्यक्ष म्हणून त्यांनी अनेक वर्ष काम पाहिलं. 2014 ते 2019 दरम्यान ते वरोरा मतदारसंघाचे शिवसेना आमदार होते. विधानसभा निवडणुकीत माजी मंत्री संजय देवतळे यांचा त्यांनी पराभव केला होता. यानंतर 2019 च्या लोकसभा निवडणुकीत बाळू धानोरकर काँग्रेसच्या तिकीटावर लढले आणि माजी केंद्रीय मंत्री हंसराज अहिर यांना पराभूत करुन खासदार झाले होते. 

संबंधित बातमी