Amravati : अमरावतीकरांना दिलासा; वाढलेल्या घरटॅक्सला स्थगिती देण्याचे उपमुख्यमंत्र्यांचे निर्देश

कुठल्याच विभागाचे अधिकारी अभ्यास करून आले नाही, ही पहिलीच बैठक आहे, म्हणून ठीक आहे. पण पुढच्या वेळेस असं चालणार नाही, असा दम फडणवीसांनी अधिकाऱ्यांना दिला.

Devendra Fadnavis file photo

Amravati News : उत्पन्नवाढीसाठी नुकतेच अमरावती शहरात महानगरपालिकेने (Amravati Municipal Corporation) 40 टक्के घरटॅक्स वाढीचा निर्णय घेतला. मात्र याला सर्वस्तरातून विरोध होत असून ही टॅक्सवाढ मागे घेण्यात यावी अशी मागणी जोर धरु लागली होती. यावर नागरिकांना दिलासा देत या टॅक्सवाढीला स्थगिती देण्याचे निर्देश राज्याचे उपमुख्यमंत्री आणि जिल्ह्याचे पालकमंत्री देवेंद्र फडणवीस (Devendra Fadnavis) यांनी दिले असल्याची माहिती पत्रकार परिषदेत दिली. यासोबतच चिखलदरा (CHIKHALDARA SKYWALK) येथील 'स्काय वॉक'चं काम लवकरच पूर्ण होईल आणि मेळघाटातील 24 गावात लवकरच विज पोहचविण्यासाठी प्रयत्न करू अशी ग्वाही यावेळी त्यांनी दिली.

अमरावती जिल्ह्याच्या नियोजन समितीच्या (Amravati District Planning Committee) बैठकीचे आयोजन करण्यात आले होते. यामध्ये अनेकांकडून अमरावतीत महानगरपालिकेने वाढविलेल्या घरटॅक्सवाढीचा मुद्दा उचलण्यात आला. यावर उत्तर देताना मनपा आयुक्त म्हणाले, 2002 पासून करवाढ केली नाही त्याअनुषंगाने ही मालमत्ता कर वाढविली आहे. 

एकत्र एवढा टॅक्स वाढवणे अयोग्य : फडणवीस

यावर पालकमंत्री देवेंद्र फडणवीस म्हणाले की, याला मी मुख्यमंत्री एकनाथ शिंदे यांच्याशी बोलून स्थगिती देतो, पण अशाने लोकांमध्ये रोष निर्माण होतो. 2002 पासून जर घरटॅक्स वाढवला नाहीतर थेट 2022 मध्ये जर इतका टॅक्स वाढवला तर लोकं कुठून भरणार. एकावेळी इतका टॅक्स वाढवण चुकीचं आहे. अमरावती शहरात 40 टक्के अशा मालमत्ता आहे, ज्याच्यावर अजूनही काहीच टॅक्स मिळत नाही, अशी माहिती अधिकाऱ्यांना देवेंद्र फडणवीस यांनी बैठकीत दिली. तसेच उत्पन्न वाढीसाठी या दिशेने प्रयत्न करण्याचे निर्देशही दिले.

बैठकीला गांभीर्याने घ्या

या बैठकीत उपमुख्यमंत्री तथा पालकमंत्री देवेंद्र फडणवीस यांनी अधिकाऱ्यांचे चांगलेच कान टोचले. फडणवीस म्हणाले की, कुठल्याच विभागाचे अधिकारी अभ्यास करून आले नाही, ही पहिलीच बैठक आहे, म्हणून ठीक आहे. पण पुढच्या वेळेस असं चालणार नाही, असा दम त्यांनी अधिकाऱ्यांना दिला. तसेच विकासासाठी निधीची कमी पडू देणार नाही अशी ग्वाही यावेळी त्यांनी दिली. यावेळी काँग्रेसच्या आमदार यशोमती ठाकूर (Yashomati Chandrakant Thakur) वगळता इतर सगळे आमदार, खासदार उपस्थित होते.

इतर महत्त्वाच्या बातम्या