Maharashtra Assembly Election 2024 : अहमदनगरच्या शेवगाव-पाथर्डी मतदारसंघात इच्छुकांची रांग, आता 'या' मातब्बर महिला नेत्याने ठोकला विधानसभेसाठी शड्डू!
Vidhan Sabha Election 2024 : अहमदनगरच्या शेवगाव पाथर्डी विधानसभा मतदारसंघामध्ये इच्छुक उमेदवारांची संख्या दिवसेंदिवस वाढत आहे. आता एका मातब्बर महिला नेत्याने विधानसभेसाठी शड्डू ठोकला आहे.
अहमदनगर : लोकसभा निवडणुकीनंतर (Lok Sabha Election 2024) आता विधानसभा निवडणुकीचे (Maharashtra Assembly Election 2024) वारे वाहू लागले आहेत. विधानसभा निवडणूक जवळ येत आहे तशी इच्छुक उमेदवारांची संख्या देखील वाढत आहे. अहमदनगरच्या शेवगाव पाथर्डी विधानसभा मतदारसंघामध्ये (Shevgaon Pathardi Assembly Constituency) इच्छुक उमेदवारांची संख्या वाढत आहे. गोपीनाथ मुंडे (Gopinath Munde) यांच्या खंद्या समर्थक आणि माजी जिल्हा परिषद सदस्य हर्षदा काकडे यांनी कुठल्याही परिस्थितीत विधानसभा निवडणूक लढवण्याची तयारी दाखवली आहे.
हर्षदा काकडे (Harshada Kakade) यांच्या भूमिकेने भाजपच्या विद्यमान आमदार मोनिका राजळे यांना मोठा धक्का बसण्याची शक्यता आहे. एकेकाळी भाजपच्या जिल्हा परिषद सदस्य राहिलेल्या हर्षदा काकडे यांना 2014 आणि 2019 या दोन्ही निवडणुकांमध्ये भाजपकडून उमेदवारी मिळाली नाही, मात्र आता मिळेल त्या पक्षाकडून उमेदवारी करायची किंवा अपक्ष निवडणूक लढवायची असा निश्चय त्यांनी केला आहे.
40 वर्षांपासून जिल्हा परिषद सदस्य
हर्षदा काकडे आणि त्यांचे पती विद्याधर काकडे मागील 40 वर्षांपासून या मतदारसंघात जिल्हा परिषद सदस्य आहेत. यासोबतच शैक्षणिक संस्था आणि सामाजिक कामामुळे या दाम्पत्याची मतदारसंघात चांगली ओळखही आहे. हे सगळं असलं तरी शेवगाव पाथर्डी मतदारसंघात सध्या भाजपच्या मोनिका राजळे आमदार आहेत तर राष्ट्रवादी शरद पवार गटाकडून प्रताप ढाकणे निवडणुकीची तयारी करत आहेत.
कुठल्याही परिस्थितीत निवडणूक लढणार : हर्षदा काकडे
याबरोबरच राष्ट्रवादी अजित पवार गटाकडून चंद्रशेखर घुले देखील मतदार संघामध्ये चाचपणी करत आहेत. त्यातच हर्षदा काकडे यांनी देखील मतदार संघामध्ये चाचपणी केली असून कुठल्याही परिस्थितीत आपण ही निवडणूक लढणार असल्याचे स्पष्ट केले आहे. त्यामुळे या मतदारसंघामध्ये नेमके किती उमेदवार उभे राहतील आणि कोण कोणाला पाठिंबा देईल? हे पाहणे महत्त्वाचे ठरणार आहे.
संगमनेरमधून सुजय विखे इच्छुक
दरम्यान, अहमदनगर लोकसभा मतदारसंघाच्या निवडणुकीत निलेश लंके (Nilesh Lanke) यांनी पराभव केल्यानंतर माजी खासदार सुजय विखे पाटील (Sujay Vikhe Patil) यांनी आता विधानसभा निवडणुकीसाठी शड्डू ठोकला आहे. मला संगमनेरमधूनच विधानसभा लढवायला आवडेल. इतर मतदारसंघात नको. पक्षाने आदेश दिल्यास संगमनेर मधूनच उमेदवारी करणार आहे. मी संगमनेर मधूनच विधानसभा निवडणूक लढवण्यासाठी इच्छुक आहे, असे सुजय विखे पाटील यांनी म्हटले आहे. त्यामुळे संगमनेर विधानसभा मतदारसंघात आता बाळासाहेब थोरात विरुद्ध सुजय विखे लढत पाहायला मिळणार का? याकडे संगमनेरकरांचे लक्ष लागले आहे.
आणखी वाचा
महत्त्वाच्या बातम्या
ट्रेंडिंग न्यूज
