Yashika Anand : अभिनेत्री याशिका आनंद अपघातात गंभीर जखमी, मैत्रिणीचा जागीच मृत्यू
Yashika Anand News : अभिनेत्री याशिका आनंद महाबलीपुरममध्ये झालेल्या अपघातात गंभीर जखमी झाली आहे. या अपघातात तिच्यासोबत असलेल्या एका मैत्रिणीचा जागीच मृत्यू झाला आहे.
Yashika Anand News : अभिनेत्री आणि तामिळ बिग बॉसमधील स्पर्धक असलेली याशिका आनंद (Yashika Anand) महाबलीपुरममध्ये झालेल्या अपघातात गंभीर जखमी झाली आहे. (South Indian actor Yashika Aanand injured in accident, is critical, friend dies )कार अपघातात तिच्यासोबत असलेल्या एका मैत्रिणीचा जागीच मृत्यू झाला आहे. याशिका आपल्या मित्रांसह ट्रीपला निघाली होती. त्यांची कार रस्त्यामधील दुभाजकाला धडकली आणि त्यानंतर रस्त्याखाली खड्ड्यात जाऊन पडली. या याशिकाची मैत्रिण वल्लीचेट्टी भवानी हिचा जागीच मृत्यू झाला तर याशिका गंभीर जखमी झाली आहे.
पोलिसांच्या माहितीनुसार 'धुरुवंगल पथिनारु' फेम याशिका आनंदचा 25 जुलै रोजी रात्री एक वाजता अपघात झाला. या कारमध्ये याशिकासह चौघेजण होते. कार खड्ड्यात पडल्यानंतर तिथून जाणाऱ्या लोकांनी कारमध्ये अडकलेल्या तिघांना बाहेर काढले. तिघेही जखमी अवस्थेत होते. यातील याशिकासह आणखी दोघांना तात्काळ दवाखान्यात नेण्यात आले मात्र तिची मैत्रिण भवानी कारमध्येच अडकली होती. तिला वाचवण्यासाठी पोलिसांची मदत घ्यावी लागली. काही वेळांनी तिला बाहेर काढले मात्र तिचा आधीच मृत्यू झाला होता.
चारही जण दारूच्या नशेत, पोलिसांना संशय
अपघाताची माहिती मिळताच पोलिस अधिकाऱ्यांनी घटनास्थळी पाहणी केली. तसेच भवानीचा मृतदेह पोस्टमार्टमसाठी पाठवण्यात आला. पोलिसांना चारही जण दारूच्या नशेत असल्याचा संशय आहे. मात्र गुन्हा नोंद करण्यासाठी डॉक्टरांच्या रिपोर्टची पोलिस वाट पाहत असल्याची माहिती आहे. या प्रकरणाची अधिक चौकशी सुरु आहे. पोलिसांनी दिलेल्या माहितीनुसार गंभीर जखमी झालेल्या यशिकाला हॉस्‍पिटलमध्‍ये दाखल करण्‍यात आले. कार कोण चालवत होते आणि चालकाने मद्‍यपान केले होते का, याचा तपास पोलिस करीत आहेत.
कोण आहे याशिका आनंद
याशिका आनंद ही तामिळ बिग बॉसमुळे चांगलीच प्रसिद्ध झाली होती. याशिका ही तामिळनाडूमधील प्रसिद्ध मॉडेल आहे. अनेक चित्रपटांमध्‍ये तिने सहायक अभिनेत्रीच्‍या भूमिका साकारल्‍या आहेत. यामध्‍ये कवलई वेंदम, नोटा आणि ध्रुवांगल पथीनारु या चित्रपटांचा समावेश आहे.
महत्त्वाच्या बातम्या
ट्रेंडिंग न्यूज
