Video | सुक्या बोंबलाचा अफलातून पदार्थ, स्पृहा जोशीनं शेअर केली रेसिपी

अलिबागमध्ये असताना अभिनेत्री स्प़ृहा जोशी हिनं तिच्या आवडीचा पदार्थ बवनला आणि सगळ्यांसमवेत त्याचा फडशाही पाडला...

सुक्या बोंबलाचा अफलातून पदार्थ, स्पृहा जोशीनं शेअर केली रेसिपी

मुंबई : खाण्यासाठी जन्म आपुला... असं म्हणत आपल्या खवय्येगिरीची पावती अनेक सेलिब्रिटी अगदी सर्रासपणे देत असतात. जिभेचे चोचले पुरवण्यासाठी सेलिब्रिटी मंडळी कायमच अनोख्या शकला लढवतात. कोण घरातूनच डबे नेतं, तर कोण चित्रीकरणाच्या ठिकाणी आपल्या आवडीच्या पदार्थांची सोय करतं. अभिनेत्री स्प़ृहा जोशी हिनंही असंच काहीसं केलं आहे. तेही अनोख्या पद्धतीनं. 

स्पृहानं नुकताच सोशल मीडियावर एक व्हिडीओ शेअर केला आहे. जिथं ती कोणा व्यासपीठावर किंवा कॅमेऱ्यापुढं टेक देताना दिसत नाहीये तर चक्क स्वयंपाकघरात स्वयंपाक करताना दिसत आहे. स्वयंपाक म्हणण्यापेक्षा एक खास पदार्थ तयार करण्यासाठी चित्रीकरणादरम्यानच तिनं थेट स्वयंपाकघराची वाट धरली आहे. 

इन्स्टाग्रामवर एक व्हिडीओ पोस्ट करत स्पृहानं तिचं पाककौशल्यंही दाखवलं आहे. मुळात या निमित्तानं तिनं अगदी झटपट होणारा एक पदार्थही सर्वांच्या भेटीला आणला आहे. मांसाहार प्रेमी आणि विशेषत: मासे खाणाऱ्यांसाठी हा आवडीचाच पदार्थ. हा पदार्थ म्हणजे भाजलेले कुरकुरीत सुके बोंबील. 

सुके बोंबील गॅसवर भाजून त्यावर तिखट, मीठ, लिंबू लावायचा आणि ते असेत कुरकुरीत असताना खायचे. अनेकांसाठी हा पदार्थ पूर्णपणे नवा असेल, काहींना त्याच्या वासानंही गरगरत असेल. पण, स्पृहाची मात्र बालपणीची आठवणच या पदार्थाशी जोडली गेली आहे. ज्याबाबत सांगताना ती लिहिते, 'माझ्या लहानपणी मी, आई, आणि क्षिप्रा दुपारी भूक लागली की असेच गॅस वर भाजून, तिखट, मीठ, लिंबू लावून बोंबील खायचो. आमच्या तिघींचं ते खास सिक्रेट होतं. आज कित्येक वर्षानी पुन्हा एकदा त्या सगळ्या आठवणी ताज्या झाल्या.'

 

 

 

 

 

View this post on Instagram

 

 

 

 

 

 

 

 

 

 

 

A post shared by Spruha Joshi (@spruhavarad)

स्पृहानं शेअर केलेली ही आठवण आणि नकळत शेअर केलेली एका सोप्या पदार्थाची रेसिपी तुम्हालाही आवडली असेल, तर एकदा करुन पाहाच.