Raja SHivaji Box Office Collection: 'राजा शिवाजी'च्या गर्जनेनं सह्याद्री दणाणला; विजयध्वज उंचावला, हिंदीपेक्षा मराठीतून सर्वाधिक कमाई; बजेट वसुल केलं की नाही?
ओपनिंग डेलाच तब्बल 11.35 कोटी रुपयांचं नेट कलेक्शन करत मराठी चित्रपटसृष्टीत नवा विक्रम निर्माण करणारा हा पहिलाच चित्रपट ठरला.
Raja Shivaji Box Office Collection: महाराष्ट्र दिनी प्रदर्शित झालेल्या ‘राजा शिवाजी’ (Raja Shivaji) या भव्य ऐतिहासिक चित्रपटाने प्रेक्षकांच्या मनावर अक्षरशः राज्य केलं असून बॉक्स ऑफिसच्या रणांगणातही (Box Office Collection) विजयध्वज दिमाखात फडकवला आहे. बॉलिवूडच्या दिग्गज कलाकारांची फौज असूनही या चित्रपटाला सर्वाधिक प्रेम मराठी प्रेक्षकांकडून मिळालं. हिंदीपेक्षा मराठी आवृत्तीमधूनच ‘राजा शिवाजी’ने मोठी कमाई करत मराठी सिनेसृष्टीसाठी नवा इतिहास रचला आहे. या सिनेमाने पहिल्याच दिवसापासून इतिहास रचण्यास सुरुवात केली. ओपनिंग डेलाच तब्बल 11.35 कोटी रुपयांचं नेट कलेक्शन करत मराठी चित्रपटसृष्टीत नवा विक्रम निर्माण करणारा हा पहिलाच चित्रपट ठरला.
चित्रपटाचे नेट कलेक्शन किती?
रितेश देशमुख दिग्दर्शित आणि प्रमुख भूमिकेत असलेल्या या ऐतिहासिक चित्रपटाने अवघ्या तीन दिवसांत 33.9 कोटी रुपयांची धडाकेबाज कमाई केली होती. मराठी सिनेमांसाठी अशक्य मानली जाणारी आकड्यांची मर्यादा ‘राजा शिवाजी’ने सहज ओलांडत आता दुसऱ्या आठवड्यातही आपला विजयध्वज फडकवला आहे. देशभरातून या चित्रपटाचे नेट कलेक्शन आता 73.15 कोटी रुपयांवर पोहोचले असून ग्रॉस कमाई 86.65 कोटींवर गेली आहे.
हिंदीपेक्षा मराठी आवृत्तीची सरशी
विशेष म्हणजे, बॉलिवूडमधील दिग्गज कलाकारांची मांदियाळी असतानाही या चित्रपटाला सर्वाधिक प्रतिसाद मराठी प्रेक्षकांकडून मिळाला आहे. संजय दत्त, अभिषेक बच्चन, विद्या बालन, बोमन इराणी, भाग्यश्री, फरदीन खान यांसारख्या हिंदी कलाकारांसोबत महेश मांजरेकर, सचिन खेडेकर, जितेंद्र जोशी, अमोल गुप्ते, जेनेलिया आणि रितेश देशमुख अशी तगडी स्टारकास्ट या चित्रपटात आहे.
तरीही ‘राजा शिवाजी’च्या मराठी आवृत्तीने हिंदी आवृत्तीपेक्षा मोठी मुसंडी मारली आहे. 12व्या दिवसापर्यंत चित्रपटाने मराठी आवृत्तीतून 51.75 कोटी रुपयांचं नेट कलेक्शन केलं, तर हिंदी आवृत्तीची कमाई 21.40 कोटी रुपयांवर पोहोचली आहे.
‘सैराट’च्या विक्रमावर नजर
मराठी चित्रपटसृष्टीत आजही ‘सैराट’चा दबदबा कायम असला, तरी कमी बजेटमध्ये बनलेल्या त्या चित्रपटाने 90 कोटींचा टप्पा गाठला होता. आता जवळपास 100 कोटींच्या बजेटमध्ये साकारलेल्या ‘राजा शिवाजी’ने अवघ्या दोन आठवड्यांतच त्या विक्रमाच्या दिशेने झेप घेतली आहे. मनोरंजनविश्वात सध्या एकच चर्चा रंगली आहे.
महत्त्वाच्या बातम्या
