Prasad Oak Manjiri Oak Daughter In Law: प्रसाद ओकची सूनबाई मारवाडी, साखरपुड्यात घडलेला प्रसंग सांगताना मंजिरी ओक म्हणाली...
Prasad Oak Manjiri Oak Daughter In Law: मंजिरी ओकनं तिची होणारी सून अमराठी असल्याचं सांगितलं. तसेच, साखरपुड्यात घडलेला एक प्रसंग सांगितला.
Prasad Oak Manjiri Oak Daughter In Law: मराठी सिनेसृष्टीतील (Marathi Film Industry) लोकप्रिय जोडपं म्हणजे, अभिनेता प्रसाद ओक (Prasad Oak) आणि त्याची पत्नी मंजिरी ओक (Manjiri Oak). हे चिरतरुण जोडपं नेहमीच त्यांच्या नात्यामुळे आणि केमिस्ट्रीमुळे चर्चेत असतं. आता लवकरच हे जोडपं आपल्या आयुष्याचा एक नवा टप्पा सुरू करणार आहेत. ही लोकप्रिय जोडी सासू-सासरे म्हणून मिरवणार आहे. काही दिवसांपूर्वीच मराठी अभिनेता प्रसाद ओक याच्या मुलाचा साखरपुडा पार पडला. याचे फोटो सोशल मीडियावर व्हायरल झालेत. त्यानंतर अभिनेत्याच्या मुलाच्या गपचूप उरकलेल्या साखरपुड्याच्या चर्चा रंगल्या. अशातच या चर्चांवर अभिनेत्याची पत्नी मंजिरी ओकनं भाष्य केलंय.
'अभिजात मराठी फिल्मी'ला दिलेल्या मुलाखतीत बोलताना प्रसाद ओकची पत्नी आणि निर्माती मंजिरी ओक हिनं आपल्या लेकाच्या साखरपुड्यावर भाष्य केलंय. तसेच, लेकाच्या साखरपुड्याचा कोणताही गाजावाजा करायचा नव्हता, असं बोलताना मंजिरी ओकनं सांगितलं. पण, अभिनेत्री अमृता खानविलकरनं केलेल्या पोस्टमुळे सर्वांना कळालं असंही ती म्हणाली. तसेच, पुढे बोलताना मंजिरी ओकनं तिची होणारी सून अमराठी असल्याचं सांगितलं. तसेच, साखरपुड्यात घडलेला एक प्रसंग सांगितला.
साखरपुड्यात घडलेला प्रसंग सांगताना मंजिरी ओक म्हणाली की, समाजात सासू-सुनेच्या नात्याबद्दल अनेक गोष्टी बोलल्या जातात. त्यावेळी तिची होणारी सून त्यांच्या जवळ येऊन म्हणाली की, काही लोक विचारत आहेत, "हीच तुझी सासू आहे का?" हे तिच्या आईच्या कानावर गेल्यावर त्यांनी तिला 'काकू' ऐवजी 'आई' म्हणायला सांगितलं. मात्र, यावर मंजिरी ओकनं लगेच तिच्या आईला रोखलं आणि तिथेच सांगितलं की, 'आई' हा शब्द खूप खास असतो आणि तो सहज वापरू नये. "आई एकच असते, जी आपल्याला जन्म देते... केवळ औपचारिकतेसाठी मला 'आई' म्हणण्याची गरज नाही. त्यापेक्षा मनापासून आदर आणि आपुलकी असेल तर तेच अधिक महत्त्वाचं आहे...", असं मंजिरी ओक म्हणाली.
सुनेविषयी बोलताना मंजिरी ओक म्हणाली की, "मी तिला पहिल्याच दिवशी सांगितलय की, मी काही परिपूर्ण स्त्री नाही. माझ्याकडूनही चुका होऊ शकतात. त्यामुळे असं धरून चालू नको की, चुका या तुझ्याकडून होतील. माझ्याकडूनही होऊ शकते... गेली 20-25 वर्ष मी एकटीनं संसार करतेय, त्यामुळे माझं घर, माझं स्वयंपाक घर हे सर्व माझं आहे... पण मी असं म्हणणार नाही की, तू त्यामध्ये काहीच बदलू नकोस... आपण हळूहळू पुढे जाऊयात. तुला माझ्याशी काही बोलावसं वाटलं तर बिनधास्त बोल आपण चर्चेतून मार्ग काढू..."
प्रसाद ओक, मंजिरी ओकची सून कोण?
प्रसाद ओक आणि मंजिरी ओक यांची होणारी सून ही फिजीओथेरपिस्ट आहे. मुलगा आणि सुनेच्या लव्हस्टोरीबाबत बोलताना मंजिकी ओक म्हणाली की, आमच्या मुलानं मला तिच्याबद्दल लगेच येऊन सांगितलं होतं. तेव्हा तो नुकताच कामाला लागलेला, त्यामुळे मी त्याला म्हटलं की, काही हरकत नाही आपण पुढे जाऊयात... पण सध्या कामावर लक्ष केंद्रीत कर. ती फिजिओथेरपिस्ट आहे, मेडिकलचा अभ्यास खूप असतो, त्यामुळे तिलाही वेळ हवा होता. ती घरी यायची जायची. जेव्हा आमचा मुलगा चांगलं कमवायला लागला तेव्हा आम्ही साखरपुड्याचा निर्णय घेतला.
महत्त्वाच्या इतर बातम्या :
महत्त्वाच्या बातम्या
