स्नॅपचॅटवर ॲसिड अटॅकची धमकी, मॉडेलच्या अंगावर थेट कार घातली, फरफटत नेलं; मुंबईतील लोखंडवाल्यात थरार, CCTV समोर
या घटनेदरम्यान आरोपीने कारचा जोरदार धक्का दिल्याने मॉडेल कारच्या बोनटवर आदळली आणि काही अंतरापर्यंत फरफटत गेली.
Mumbai Crime: मुंबईच्या जोगेश्वरी पश्चिमेकडील लोखंडवाला परिसरात एक धक्कादायक घटना घडली आहे. एका व्यक्तीने थेट मॉडेलच्या अंगावर कार घालण्याचा प्रयत्न केल्याचा प्रकार समोर आला असून, ही संपूर्ण घटना सीसीटीव्ही कॅमेऱ्यात कैद झाली आहे. या घटनेमुळे परिसरात एकच खळबळ उडाली आहे. आरोपी मोहम्मद शकील शेखकडून मॉडेलचा मैत्रिणीच्या स्नॅपचॅटवर ॲसिड अटॅक करण्याची धमकी देण्यात आली होती.त्यानंतर हा प्रकार घडलाय. (Mumbai Crime)
नेमकं घडलं काय?
सोमवारी रात्री साडेनऊच्या सुमारास लोखंडवाला परिसरातील अरीना बिल्डिंगच्या गेटजवळ ही घटना घडली. संबंधित मॉडेल इमारतीच्या गेटजवळ उभी असताना आरोपीने अचानक स्कोडा कार तिच्या अंगावर घालण्याचा प्रयत्न केला. हा प्रकार लक्षात येताच तिच्या मदतीसाठी दोन जण धावून गेले. मात्र आरोपीने त्या तिघांवरही पुन्हा कार घालण्याचा प्रयत्न केल्याची माहिती समोर आली आहे. डायना सईद डेबस्तानी असे या मॉडेल तरुणीचे नाव आहे. या घटनेदरम्यान आरोपीने कारचा जोरदार धक्का दिल्याने मॉडेल कारच्या बोनटवर आदळली आणि काही अंतरापर्यंत फरफटत गेली. या घटनेत मॉडेल किरकोळ जखमी झाली आहे. या घटनेत कोणतीही जीवितहानी झाली नाही.
या प्रकरणी मॉडेलने ओशिवरा पोलीस ठाण्यात तक्रार दाखल केली आहे. त्यानुसार आरोपीचे नाव मोहम्मद शकील शेख (वय 29) असे असून, त्याच्याविरोधात गुन्हा दाखल करण्यात आला आहे. पोलिसांच्या माहितीनुसार, आरोपीने यापूर्वी मॉडेलच्या मैत्रिणीच्या स्नॅपचॅट अकाउंटवरून ऍसिड अटॅकची धमकी दिली होती. या धमकीबाबत विचारणा केली असता आरोपीला राग आला आणि त्यातूनच त्याने हा टोकाचा प्रकार केल्याचा आरोप तक्रारीत करण्यात आला आहे. घटनेनंतर पोलिसांनी सीसीटीव्ही फुटेज ताब्यात घेतले असून, आरोपीविरोधात भारतीय दंड विधानानुसार गुन्हा दाखल करून पुढील तपास सुरू आहे. ओशिवरा पोलीस या संपूर्ण प्रकरणाचा सखोल तपास करत आहेत.
घटनेचा CCTV समोर
मॉडेल तरुणीने दाखल केलेल्या तक्रारीनुसार, गेल्या नऊ महिन्यांपासून आरोपी मॉडेल तरुणीविषयी मित्रांमध्ये, कुटुंबामध्ये अफवा पसरवण्याचे काम करत आहे. त्यावरून त्यांच्यात गेल्या अनेक दिवसांपासून वाद आहेत. काल (३ फेब्रुवारी) आरोपीला जाब विचारण्यासाठी पीडित तरुणी आणि तिची मैत्रीण गेल्या. आरोपी समोर येत नसल्याने मोठ्याने त्याला बोलवत होत्या. नंतर दुसऱ्या दिवशी मैत्रिणीच्या स्नॅपचॅटवर मेसेज आला. ऍसिड अटॅकचा मेसेज आला. बिल्डींगच्या खाली आरोपी समोर आला. बिल्डींगच्या गेटमधुन आत गाडी घेवुन येण्याचा प्रयत्न करू लागला. माझ्यावर गाडी घालण्याचा प्रयत्न केला. त्यामुळे त्याने पुन्हा गाडी मागे घेतली व पुन्हा गाडी अंगावर घातली. मला दुखापत होईल अशा पद्धतीने बेदरकारपणे गाडी अंगावर घालण्याचा प्रयत्न केला. असा आरोप मॉडेल तरुणीने केला आहे. या घटनेचा cctvही समोर आला असून ओशिवरा पोलिसांनी आरोपीवर गुन्हा दाखल केला आहे
महत्त्वाच्या बातम्या
