मिथिला पालकरचा 'असा' अवतार कधीच पाहिला नसेल; क्राईम थ्रिलरचा टीझर पाहिलात?
प्रत्येक पात्राची झलक थोडक्यात दाखवण्यात आली असली, तरी कथेत या सगळ्यांच्याच भूमिका महत्त्वाच्या असणार आहेत.
Mithila Palkar Movie: मराठमोळी अभिनेत्री मिथिला पालकर पुन्हा एकदा एका नव्या भूमिकेत झळकणार आहे. मात्र यावेळी तिची भूमिका अंगावर काटा आणणारी आहे. मिथिलाच्या आगामी 'इकरूप' या क्राइम थ्रिलर चित्रपटाचा टीझर प्रदर्शित झाला असून, त्यातील काही दृश्यांनी प्रेक्षकांची उत्सुकता चांगलीच वाढवली आहे. एका कवयित्रीच्या आयुष्यात घडलेल्या एका घटनेनंतर तिचं संपूर्ण आयुष्य कसं बदलतं, याची झलक या टीझरमधून पाहायला मिळते.
नेमकं काय आहे ट्रेलरमध्ये?
टीझरची सुरुवात मिथिला पालकरच्या व्हॉइसओव्हरने होते. शांत आयुष्य जगणाऱ्या 'इकरूप'च्या आयुष्यात अचानक अपहरण आणि अत्याचाराची भीषण घटना घडते. त्यानंतर तिच्या आयुष्यातील प्रत्येक नातं, प्रत्येक क्षण सगळंच बदलून जातं. या घटनेचा परिणाम केवळ तिच्यावरच नाही, तर तिच्या कुटुंबावरही होतो. या टीझरमध्ये निर्मात्यांनी रहस्य कायम ठेवत प्रेक्षकांना विचार करायला भाग पाडलं आहे.
चित्रपटात मिथिला पालकरसोबत गौहर खान, ताहा शाह बदुश्शा, स्वानंद किरकिरे आणि कुमुद मिश्रा यांसारख्या दमदार कलाकारांच्या भूमिका आहेत. प्रत्येक पात्राची झलक थोडक्यात दाखवण्यात आली असली, तरी कथेत या सगळ्यांच्याच भूमिका महत्त्वाच्या असणार आहेत.
दिग्दर्शनात नवं नाव, निर्मितीत मोठी टीम
'इकरूप' हा अक्रम खान यांचा दिग्दर्शनातील पहिलाच चित्रपट आहे. जिओ स्टुडिओजच्या बॅनरखाली ज्योती देशपांडे यांनी चित्रपटाची निर्मिती केली असून, हिमांशू किशन मेहरा आणि 'सुलतान' फेम अली अब्बास झफर हेही निर्मितीशी जोडले गेले आहेत. त्यामुळे या चित्रपटाकडून प्रेक्षकांच्या अपेक्षा वाढल्या आहेत.
मिथिलाच्या कारकिर्दीतील वेगळी भूमिका
मिथिला पालकर नुकतीच 'हॅपी पटेल: खतरनाक जासूस' आणि अक्षय कुमारच्या 'भूत बंगला' या चित्रपटांमध्ये झळकली होती. मात्र 'इकरूप'मधील तिची भूमिका आतापर्यंतच्या कारकिर्दीतील सर्वात गंभीर आणि आव्हानात्मक मानली जात आहे. झी5वर प्रदर्शित होणाऱ्या या चित्रपटाच्या प्रदर्शनाची तारीख अद्याप जाहीर करण्यात आलेली नसली, तरी टीझरने सोशल मीडियावर चर्चा रंगलीय.
महत्त्वाच्या बातम्या
