Sangharsh Yoddha Manoj Jarange Patil Movie : अंतरवालीत लाठीचार्ज कोणाच्या आदेशाने झाला? "संघर्षयोद्धा मनोज जरांगे पाटील" चित्रपटात समोर येणार सत्य?

Maratha Reservation Protest : अंतरवाली सराटीमधील उपोषण आंदोलनावर झालेल्या लाठीचार्जनंतर राज्यात मराठा आरक्षण आंदोलन पुन्हा जोमाने पेटले. "संघर्षयोद्धा मनोज जरांगे पाटील" चित्रपटात या लाठीचार्जचे चित्रण आहे. या लाठीचार्जचा आदेश कोणी दिला, याचा दावा चित्रपटातून होण्याची शक्यता आहे.

Sangharsh Yoddha Manoj Jarange Patil Movie

Sangharsh Yoddha Manoj Jarange Patil Movie :    मराठा आरक्षण (Maratha Reservation) आंदोलक मनोज जरांगे पाटील (Manoj Jarange Patil) यांचा जीवनपट उलगडून दाखवणारा "संघर्षयोद्धा मनोज जरांगे पाटील" ( Sangharsh Yoddha Manoj Jarange Patil ) चित्रपट पु्न्हा एकदा चर्चेत आला आहे. या चित्रपटाचा ट्रेलर आज लाँच करण्यात आला. अंतरवाली सराटीमधील उपोषण आंदोलनावर झालेल्या लाठीचार्जनंतर राज्यात मराठा आरक्षण आंदोलन पुन्हा जोमाने पेटले. "संघर्षयोद्धा मनोज जरांगे पाटील"  चित्रपटात या लाठीचार्जचे चित्रण आहे. या लाठीचार्जचा आदेश कोणी दिला, याचा दावा चित्रपटातून होण्याची शक्यता आहे. 

मनोज जरांगे पाटील यांच्या हस्ते अंतरवाली सराटी येथे या चित्रपटाचा ट्रेलर लाँच करण्यात आला. चित्रपटाच्या धमाकेदार ट्रेलरमुळे  चित्रपटाविषयी आता कमालीची उत्सुकता निर्माण झाली आहे. मराठ्यांचं वादळ धडकणार चित्रपटसृष्टीत घडवणार नवा इतिहास ,अभी नही तो कभी नही, मराठा आरक्षणासाठी संघर्ष करणारे मनोज जरांगे पाटील यांची जीवनकहाणी असलेला "संघर्षयोद्धा मनोज जरांगे पाटील" हा चित्रपट आता 14 जून 2024 ला प्रदर्शित होत आहे. अख्खा महाराष्ट्र या चित्रपटाच्या टीमने प्रमोशनसाठी पिंजून काढला असून रसिक प्रेक्षकांकडूनही या चित्रपटला उत्तम प्रतिसाद मिळत आहे. मराठा आरक्षणासाठीच्या आंदोलनाचे नेते मनोज जरांगे पाटील यांच्या जीवनपटाचा वेध "संघर्षयोद्धा मनोज जरांगे पाटील" या चित्रपटातून घेतला जाणार आहे. 

मनोज जरांगे यांनी मराठा आरक्षणासाठी मागील काही वर्षांपासून आंदोलन केले.  धरणे आंदोलनापासून विविध मार्गाने मनोज जरांगे यांनी आरक्षणासाठीचा लढा उभारला. अंतरवाली सराटीमध्ये मनोज जरांगे यांनी उपोषण आंदोलन सुरू केले. या उपोषण आंदोलनावर  पोलिसांचा लाठीचार्ज झाला. गोळीबारही करण्यात आला. या घटनेचे राज्यात मोठे पडसाद उमटले. या चित्रपटाच्या ट्रेलरमध्ये लाठीचार्जचे दृष्य दाखवण्यात आले आहे. त्यामुळे चर्चांना उधाण आहे. 

धारदार संवाद...

चित्रपटाच्या ट्रेलरमध्ये धारदार संवाद असल्याचे दिसले आहे.  लाठीचार्ज आणि गोळीबाराचा आदेश कोणी दिला? हे देशाला समजलेच पाहिजे, मराठ्यांना आरक्षण तात्काळ जाहीर झालेच पाहिजे एवढच आम्हाला समजतं यासह शिवाजी महाराजांचा मावळा आहे मी ! तलवारबाज मावळ्याच्या घोड्याचा अन कुणब्याच्या बैलजोड्याचा नाद करायचा नाही! यासारखे संवाद आहेत. 

चित्रपटात कोणते कलाकार?

या चित्रपटात मनोज जरांगे पाटील यांची भूमिका अभिनेता रोहन पाटील यांनी साकारली आहे. या चित्रपटात अभिनेते मोहन जोशी,  संदीप पाठक, सागर कारंडे, अरबाज शेख, श्रीनिवास पोकळे, संजय कुलकर्णी, अभिनेत्री सुरभी हांडे,  माधवी जुवेकर, विजय मिश्रा, विनीत भोंडे, सुनील गोडबोले, माधव अभ्यंकर, सोमनाथ अवघडे, किशोर चौगुले, सिद्धेश्वर झाडबुके, उर्मिला डांगे, श्रीकृष्ण शिंगणे यांच्या ही प्रमुख भूमिका आहेत.

शिवाजी दोलताडे यांनी दिग्दर्शनाची जबाबदारी निभावलेली असून सोनाई फिल्म क्रिएशन या निर्मिती संस्थेच्या गोवर्धन दोलताडे यांनी चित्रपटाच्या निर्मितीसह चित्रपटाचं लेखनही केलं आहे. सहनिर्माते रामदास मेदगे, विठ्ठल अर्जुन पचपिंड ,जान्हवी मनोज तांबे, दत्तात्रय लोहकरे कार्तिक दोलताडे पाटील, नर्मदा सिनेव्हिजन्स हे आहेत. तर डॉ.सुधीर निकम यांनी संवाद आणि पटकथा लिहिली आहे. 

पाहा ट्रेलर : Sangharsh Yoddha Manoj Jarange Patil - Trailer | Rohan Patil | Shhivaji Doltade | 14th June 2024