Harmonium Player Seema Shirodkar Passes Away: संगीत मैफलीतील सुरेल साथसंगत हरपली; सुप्रसिद्ध हार्मोनियमवादक सीमा शिरोडकर काळाच्या पडद्याआड
Harmonium Player Seema Shirodkar Passes Away: प्रसिद्ध हार्मोनियमवादक सीमा शिरोडकर यांचं हृदयविकारानं निधन झालं. त्या 60 वर्षांच्या होत्या.
Harmonium Player Seema Shirodkar Passes Away: प्रसिद्ध हार्मोनियमवादक (Harmonium Player) सीमा शिरोडकर (Seema Shirodkar) यांचं सोमवारी अबुधाबी इथे हृदयविकारानं निधन झालं. त्या 60 वर्षांच्या होत्या. त्यांच्या जाण्यानं संगीत मैफलीतील सुरेल साथसंगत हरपल्याची भावना व्यक्त होत आहे.
प्रसिद्ध तबलावादक पंडित विश्वनाथ शिरोडकर (Pandit Vishwanath) यांच्या त्या पत्नी. हिंदुस्थानी शास्त्रीय संगीतात सीमा शिरोडकर यांचे मोठे योगदान आहे. अनेक वर्षे सोलो हार्मोनियम वादन आणि ख्यातनाम कलावंतांना साथसंगत करताना त्यांनी आपल्या जादुई बोटांनी श्रोत्यांना अलौकिक स्वरसाजाची पर्वणी दिली. त्यांचे 'याद पिया की आये ही' ठुमरीचे सूर तर कधीच विसरता येणार नाहीत. सीमा यांनी देशविदेशात हार्मोनियमवादनाचे अनेक कार्यक्रम केले. अनेक शिष्यगण घडवले.
संवादिनीवादन क्षेत्रात महिलांचे प्रमाण कमी असताना सीमा शिरोडकर यांनी मात्र आपल्या प्रतिभेचा ठसा उमटवला. सीमा शिरोडकर यांच्या घरात संगीताचा वारसा होता. त्यांचे वडील पायपेटीवर भजने गात. त्यांनी सुरुवातीच्या काळात आतेभाऊ उमेश इन्सुलकर यांच्याकडून शिक्षण घेतले. त्यानंतर प्रसिद्ध हार्मोनियमवादक पंडित तुळशीदास बोरकर व पंडित विश्वनाथ पेंढारकर यांच्याकडे तालीम घेतली. प्रसिद्ध गायिका आरती अंकलीकर-टिकेकर, अश्विनी भिडे-देशपांडे, पद्मा तळवलकर, वीणा सहस्रबुद्धे, राशीद खान यांसारख्या दिग्गज कलाकारांच्या मैफलींना साथसंगत करण्याची संधी शिरोडकर यांना मिळाली. सहजसुंदर वादन, गायकाला डिस्टर्ब न करणारी खरी रंगतदार संगत, प्रचंड रियाज आणि आत्मविश्वास ही त्यांच्या वादनाची वैशिष्ट्ये होती.
दरम्यान, सीमा शिरोडकर यांचे पार्थिव डोंबिवली MIDC मधील त्यांच्या घरी अंत्यदर्शनासाठी ठेवण्यात आले होते. त्यानंतर त्यांच्यावर डोंबिवली दत्तनगर स्मशानभूमीत अत्यसंस्कार करण्यात आले. त्यांच्या अंत्यदर्शनासाठी संगीत विश्वातील अनेक दिग्गजांनी उपस्थिती लावली होती.
आशिष शेलार यांचं श्रद्धांजली वाहणारं ट्वीट
आशिष शेलार यांनी सीम शिरोडकर यांना श्रद्धांजली वाहणारं ट्वीट केलं होतं. आशिष शेलार यांनी ट्वीटमध्ये लिहिलंय की, "भावपूर्ण श्रद्धांजली... प्रसिद्ध हार्मोनियम वादक सीमा शिरोडकर यांच्या निधनाची बातमी अत्यंत दुःखद आहे. त्यांनी आपली प्रतिभा, सातत्य आणि कठोर साधनेच्या जोरावर स्वतंत्र ओळख निर्माण केली. सोलो हार्मोनियम वादन असो वा नामवंत कलाकारांना दिलेली साथ, प्रत्येक सादरीकरणातून त्यांची संगीतनिष्ठा आणि सौंदर्यदृष्टी प्रकट होत असे..."
"संगीताचा वारसा लाभलेल्या कुटुंबातून आलेल्या सीमा शिरोडकर यांनी गुरूंप्रती निष्ठा राखत परंपरा जपली आणि पुढे अनेक शिष्य घडवून ती पुढे नेली.त्यांच्या जाण्याने एक प्रतिभावान कलाकार, एक संवेदनशील संगीतसाधिका आणि अनेकांसाठी प्रेरणास्थान हरपले आहे. ईश्वर त्यांच्या आत्म्यास शांती देवो... ॐ शांती", असं आशिष शेलारांनी लिहिलेलं.
महत्त्वाच्या बातम्या
