Rakesh Chaurasia: बासरीच्या सुरांना मिळाला प्रतिष्ठेचा सन्मान! ग्रॅमी विजेते राकेश चौरसिया यांना संगीत नाटक अकादमी पुरस्कार जाहीर
भारतीय शास्त्रीय संगीत क्षेत्रातील उल्लेखनीय योगदान तसेच भारतीय बासरीवादनाची समृद्ध परंपरा जगभरातील रसिकांपर्यंत पोहोचविण्यासाठी केलेल्या असामान्य कार्याची दखल घेत हा पुरस्कार त्यांना प्रदान करण्यात आला आहे.
Mumbai: भारतीय शास्त्रीय संगीत क्षेत्रासाठी अभिमानाची बातमी समोर आली आहे. ग्रॅमी पुरस्कार विजेते आणि आंतरराष्ट्रीय स्तरावर भारतीय बासरीवादनाचा ठसा उमटवणारे प्रसिद्ध बासरीवादक राकेश चौरसिया यांना प्रतिष्ठेचा संगीत नाटक अकादमी पुरस्कार जाहीर झाला आहे. भारत सरकारच्या संगीत नाटक अकादमीकडून विविध कला क्षेत्रातील मान्यवर कलाकारांचा गौरव करण्यात आला असून त्यामध्ये राकेश चौरसिया यांच्या नावाचाही समावेश आहे.भारतीय शास्त्रीय संगीत क्षेत्रातील उल्लेखनीय योगदान तसेच भारतीय बासरीवादनाची समृद्ध परंपरा जगभरातील रसिकांपर्यंत पोहोचविण्यासाठी केलेल्या असामान्य कार्याची दखल घेत हा पुरस्कार त्यांना प्रदान करण्यात आला आहे.
दोन वेळा ग्रॅमी पुरस्कार
आपल्या अप्रतिम वादनकौशल्य, नावीन्यपूर्ण दृष्टिकोन आणि कलेप्रती असलेल्या निष्ठेमुळे राकेश चौरसिया यांनी जागतिक संगीतविश्वात स्वतंत्र आणि मानाचे स्थान निर्माण केले आहे.जागतिक कीर्तीचे बासरीवादक पंडित हरिप्रसाद चौरसिया यांचे पुतणे आणि शिष्य असलेल्या राकेश चौरसिया यांनी आपल्या मैफिली, विविध कलाकारांसोबतच्या सहयोगी उपक्रम आणि ध्वनिमुद्रणांमधून आंतरराष्ट्रीय स्तरावर विशेष ओळख निर्माण केली आहे.त्यांच्या ग्रॅमी पुरस्कार विजेत्या कामगिरीमुळे जागतिक संगीत क्षेत्रात भारताचा गौरव अधिक उंचावला असून भारतीय शास्त्रीय संगीताला व्यापक मान्यता मिळाली आहे.
राकेश चौरसिया म्हणाले
हा सन्मान जाहीर झाल्यानंतर आनंद व्यक्त करताना राकेश चौरसिया म्हणाले, “२०२४-२५ या वर्षाचा प्रतिष्ठेचा संगीत नाटक अकादमी पुरस्कार मिळाल्यामुळे मी स्वतःला अत्यंत भाग्यवान समजतो. या सन्मानासाठी माझी निवड केल्याबद्दल मी परीक्षक मंडळातील सर्व सदस्यांचा मनःपूर्वक आभारी आहे. माझ्या कारकिर्दीतील हा पहिलाच शासकीय पुरस्कार असल्याने हा आनंद अधिक विशेष आहे. हा सन्मान स्वीकारताना मला अत्यंत अभिमान आणि कृतज्ञता वाटत आहे. जय हिंद.”भारताची राष्ट्रीय संगीत, नृत्य आणि नाट्य अकादमी असलेल्या संगीत नाटक अकादमीतर्फे देशाच्या सांस्कृतिक वारशासाठी अपवादात्मक योगदान देणाऱ्या कलाकारांना हा पुरस्कार प्रदान केला जातो.
संगीत नाटक अकादमी पुरस्कार जाहीर होताच संगीत क्षेत्रातील मान्यवर, कलाकार आणि चाहत्यांकडून राकेश चौरसिया यांच्यावर शुभेच्छांचा वर्षाव होत आहे. भारतीय संगीत परंपरा जपण्यासाठी आणि ती जगभर पोहोचवण्यासाठी त्यांनी केलेल्या योगदानाचा हा सन्मान असल्याची भावना अनेकांनी व्यक्त केली आहे.भारतीय शास्त्रीय संगीत क्षेत्रात सातत्याने उल्लेखनीय कामगिरी करणाऱ्या राकेश चौरसिया यांच्यासाठी हा पुरस्कार आणखी एका मानाच्या शिखरावर पोहोचल्याचे मानले जात आहे.
महत्त्वाच्या बातम्या
