'चरक'च्या टीझरने उडवली झोप; मृतदेह फाडून खाताना दिसतोय तांत्रिक; अंगावर काटा आणणारा थरार
चरक हा त्या भारताची कथा आहे, जिथे अनेकदा आस्था तर्कापेक्षा मोठी ठरते आणि विश्वास जीवन-मृत्यूसारख्या निर्णयांवरही प्रभाव टाकतो.
Charak Movie Teaser: बॉलीवूडचे दिग्दर्शक सुदीप्तो सेन यांच्या आगामी ‘चरक: आस्था का मेला’ या चित्रपटाचा टीझर सध्या सोशल मीडियावर तुफान चर्चेत आहे. अवघ्या 52 सेकंदांच्या या टीझरमध्ये अंधश्रद्धा, तांत्रिक प्रथा आणि अंधभक्तीचं भयावह चित्रण पाहायला मिळतं. विशेष म्हणजे एका दृश्यात तांत्रिक मृतदेहाला फाडून खाताना दाखवण्यात आलं आहे, ज्यामुळे प्रेक्षकांच्या अंगावर अक्षरशः काटा येतोय. हा चित्रपट येत्या 6 मार्च 2026 रोजी चित्रपटगृहात प्रदर्शित होणार आहे.
अंधश्रद्धेच्या काळ्या बाजूवर भाष्य
या चित्रपटाची कथा भारतातील ग्रामीण भागात पसरलेल्या अंधश्रद्धा आणि तांत्रिक मान्यतांभोवती फिरते. रहस्यमय ‘चरक मेळा’च्या पार्श्वभूमीवर उभी राहणारी ही गोष्ट अशा एका समुदायाची आहे, जो या उत्सवाला अपूर्ण इच्छा पूर्ण करण्याची अखेरची संधी मानतो. मेळ्यातील विधी आणि आस्थेचा उन्माद वाढत जातो तसं विश्वास, बळीआणि भक्तीबाबत अनेक अस्वस्थ करणारे प्रश्न पुढे येताना दिसतात.
“चरक में लाशों की भेंट क्यों चढ़ाते हैं?”
टीझरमध्ये सर्वाधिक चर्चेत असलेला संवाद आहे “चरक में लाशों की भेंट क्यों चढ़ाते हैं?” यावर दिलेलं उत्तर आणखी धक्कादायक आहे. याच दृश्यात तांत्रिकाचा भयावह अवतार दाखवण्यात आला आहे, ज्यामुळे टीझर पाहणारे हादरले आहेत. चित्रपट अंधश्रद्धा आणि भरकटलेल्या अध्यात्मावर तीक्ष्ण भाष्य करणार असल्याचं स्पष्ट होतं.
कलाकारांची दमदार फळी
या चित्रपटात अंजली पाटिल, सुब्रत दत्ता, नलनीश नील, शशिभूषण, शंखदीप आणि शौनक श्यामल महत्त्वाच्या भूमिकेत दिसणार आहेत. चित्रपटाचं दिग्दर्शन शिलादित्य मौलिक यांनी केलं असून सुदीप्तो सेन प्रोडक्शन्सच्या सहकार्याने सिपिंग टी स्टुडिओजने निर्मिती केली आहे. PEN Studios प्रस्तुत हा चित्रपट राजेश भट्ट यांच्या सहनिर्मितीत तयार झाला आहे. दिग्दर्शक सुदीप्तो सेन यांनी सांगितलं की, भारतीय रहस्यवादी आणि तांत्रिकांच्या जगाचा सिनेमॅटिक अनुभव म्हणून सादर करण्याची सर्जनशील प्रेरणा या चित्रपटामागे आहे. ही कथा मानवी मानसशास्त्राच्या खोल थरांपर्यंत पोहोचत साध्या माणसांना नैतिक द्वंद्वात अडकताना दाखावते असं ते म्हणाले.
चरक हा त्या भारताची कथा आहे, जिथे अनेकदा आस्था तर्कापेक्षा मोठी ठरते आणि विश्वास जीवन-मृत्यूसारख्या निर्णयांवरही प्रभाव टाकतो. हा चित्रपट आस्थेच्या अशा रूपाला दाखवतो, ज्यात बरे करण्याची ताकदही आहे, धैर्य देण्याची क्षमता आहे आणि नुकसान करण्याची शक्यताही आहे.असं या चित्रपटाचे दिग्दर्शक सुदिप्तो सेन म्हणाले होते. टे पुढे म्हणतात, चरक अशी वास्तव कथा मांडते, जिथे विश्वास आणि त्याचे परिणाम समोर येतात आणि माणसाच्या मानवतेची कसोटी लागते. हा चित्रपट आस्थेशी जोडलेल्या अशा कृती दाखवतो, ज्यामुळे कोणालाही स्वतःच्या विचारांवर प्रश्न पडू शकतात. हा सिनेमा कोणाला योग्य किंवा अयोग्य ठरवत नाही, तर सत्य जसं आहे तसं दाखवण्याचा प्रयत्न करतो. असही त्यांनी सांगितलं.
महत्त्वाच्या बातम्या
