Ajit Pawar: पवार कुटुंबीय दिवाळीला एकत्र दिसतील का? अजित पवार म्हणाले आपल्याला दिसेलचं, पण सुप्रिया ताईंसोबत भाऊबीज, दादांनी बोलणं टाळलं
Ajit Pawar: आज राष्ट्रवादी काँग्रेस अजित पवारांना याबाबत विचारलं असता आपल्याला दिसेलचं, असं म्हणत त्यांनी स्पष्टपणे बोलणं टाळल्याचं दिसून आलं.
पुणे: दिवाळी म्हटलं की, बारामतीत पवार कुटुंबीय एकत्रित येण्याचा क्षण असतो. मात्र आधी लोकसभा आणि आता विधानसभेत पवार कुटुंबियांत राजकीय कटुता निर्माण झाली आहे. त्यामुळं आता या दिवाळीत पवार कुटुंबीय एकत्रित येतील का? याकडे सर्वांचं लक्ष लागून राहिलं आहे. अशातच आज राष्ट्रवादी काँग्रेस अजित पवारांना याबाबत विचारलं असता आपल्याला दिसेलचं, असं म्हणत त्यांनी स्पष्टपणे बोलणं टाळल्याचं दिसून आलं.
आज राष्ट्रवादी काँग्रेसचे अध्यक्ष आणि राज्याचे उपमुख्यमंत्री अजित पवार स्वतः नाना काटे यांची मनधरणी करण्यासाठी त्यांच्या घरी पोहचले चर्चेनंतर जेव्हा ते जाण्यासाठी निघाले तेव्हा, माध्यमांशी अजित पवारांनी संवाद साधला त्यावेळी, सुप्रिया सुळे असं म्हणताच भाऊबीजबद्दल पत्रकार विचारतील हे हेरून दादांनी काढता पाय घेतला. पुरंदरमध्ये अजित पवारांनी उमेदवार दिल्यानं विजय शिवतारेंनी टीका केली. मला महायुतीत एकोपा ठेवायचा आहे, असं म्हणत त्यांच्यावर इतर नेते उत्तर देतील असं अजित पवार म्हणालेत. चिंचवडमधील तिढा सोडविण्याच्या दृष्टीने अजित पवारांनी नाना काटे यांची भेट घेतली. मात्र काटे माघार घेणार का? यावर ही चार तारखेला चित्र स्पष्ट होईल असं दादा म्हणाले.
दुसरीकडे मावळ विधानसभेत सुनील शेळकेंचा प्रचार करायला देवेंद्र फडणवीस आणि भाजपचे इतर नेते येतील असा दावा ही अजित पवारांनी केला आहे. मावळ पॅटर्न अडचणीचा ठरेल का? असं विचारलं असता, थोड्या दिवसांत तोडगा निघेल असा विश्वास ही त्यांनी व्यक्त केला.
अजित दादांच्या मनधरणी नंतर ही नाना काटे बंडखोरीवर ठाम
चिंचवड विधानसभेतील नाना काटे यांची बंडखोरी रोखण्यासाठी स्वतः अजित पवार यांच्या घरी पोहोचले. दोघांमध्ये जवळपास तासभर चर्चा ही झाली, मात्र त्यानंतर ही काटे बंडखोरीवर ठाम आहेत. भाजपचे शंकर जगताप आणि शरद पवार गटाचे राहुल कलाटे यांच्या विरोधात काटे यांनी अपक्ष अर्ज दाखल केला आहे.
नाना काटे अपक्ष लढणार
महायुतीकडून चिंचवडची जागा भाजपला सुटली, भाजपने शंकर जगतापांना उमेदवारी जाहीर केली. राष्ट्रवादी काँग्रेस (शरद पवार) पक्षाकडून उमेदवारी मिळावी यासाठी प्रयत्न करत असलेले नाना काटे यांना शेवटी शरद पवारांच्या पक्षाकडून उमेदवारी मिळाली नाही. उमेदवारी न मिळाल्यामुळे उपमुख्यमंत्री अजित पवार यांच्या राष्ट्रवादीचे माजी नगरसेवक नाना काटे यांनी अखेर अपक्ष लढण्याचं जाहीर केलं आहे. त्यांनी आपला उमेदवारी अर्ज देखील भरला आहे. त्यामुळे महायुतीकडून लढत असलेले भाजपचे उमेदवार शंकर जगताप यांना काही प्रमाणात फटका बसण्याची शक्यता आहे.
महत्त्वाच्या बातम्या
