Election : विधान परिषदेसाठी भाजपकडून प्रवीण दरेकर यांचे नाव निश्चित, इतर तीन जागांवर कुणाला संधी मिळणार?

Vidhan Parishad Election : प्रवीण दरेकर यांचे नाव जवळपास निश्चित झालेले असताना माजी मंत्री पंकजा मुंडे, चित्रा वाघ, अनिल बोंडे, राम शिंदे, कृपा शंकर सिंग यांचीही नावे चर्चेत आहेत.

भाजप

मुंबई : राज्यसभेच्या निवडणुकीसाठी सध्या सर्वच पक्षाची धावपळ सुरू आहे. असं असताना आता भाजपमध्ये विधानपरिषदेसाठी देखील इच्छुकांनी हालचाली सुरू केल्या आहेत. भाजपमध्ये तर आतापासूनच इच्छुकांनी लॉबिंग करायला सुरुवात केली असून, याची यादी बरीच मोठी आहे. विधान परिषदेवर भाजपचे चार जण सहज निवडून जाणार असल्याने या चार जागासाठी जोरदार लॉबिंग सुरू आहेत. प्रवीण दरेकर यांचे नाव जवळपास निश्चित झालेले आहे अशी सूत्रांची माहिती आहे. 

भाजपकडून कुणाला संधी मिळणार?
विधान परिषदेवर जाण्यासाठी भाजपमध्ये बऱ्याच जणांची लॉबिंग सुरू असून, विधान परिषदेचे विरोधी पक्षनेते प्रवीण दरेकर यांना पुन्हा संधी मिळू शकते. तर प्रसाद लाड आणि सदाभाऊ खोत यांच्यापैकी कुणाला तरी एकाला पुन्हा विधान परिषदेची संधी मिळू शकते.

हे नेते देखील इच्छुक
एकीकडे प्रवीण दरेकर यांचे नाव जवळपास निश्चित झालेले असताना माजी मंत्री पंकजा मुंडे, चित्रा वाघ, अनिल बोंडे, राम शिंदे, कृपा शंकर सिंग यांचीही नावे चर्चेत आहेत. भाजपच्या वरिष्ठांकडून चार जागेसाठी कुणाला संधी मिळणार हे अद्याप स्पष्ट नाही. 

यांना संधी मिळण्याची शक्यता कमी
विधान परिषदेच्या चार जागांसाठी बऱ्याच नेत्यांची लाईन लागली असली तरी काही नेत्यांना या वेळी संधी मिळण्याची शक्यता नाही. यामध्ये शिवसंग्रामचे विनायक मेटे, सुरजित सिंह ठाकूर यांना विधान परिषदेत पुन्हा संधी मिळण्याची शक्यता नाही.

असे आहे जागाचे गणित
विधान परिषदेवर निवडून यायचे असेल तर 27 मतांची आवश्यकता आहे. भाजप आणि मित्रपक्ष मिळून संख्याबळ 113 होत आहे. त्यामुळे भाजपच्या सहज चार जागा निवडून येऊ शकतात. त्यामुळेच आता या चार जागांसाठी कुणाची वर्णी लागणार याची उत्सुकता आहे. 

भाजप राज्यसभेची तिसरी जागा लढवण्याची शक्यता
महाराष्ट्र विधानसभेतील सध्याच्या आमदारांचे संख्याबळ लक्षात घेता, राज्यसभेसाठी भाजप तिसरी जागा लढण्याची शक्यता असल्याचा माहिती सूत्रांनी दिली आहे. भाजपकडे सध्या 113 आमदारांचं संख्याबळ आहे. भाजपचे 106 आमदार, रासप 1, जनसुराज्य 1 आणि अपक्ष पाच आमदार असे एकूण 113 आमदार भाजपकडे आहेत. राज्यसभेच्या एका जागेसाठी 42 मतांची गरज आहे. भाजपला फक्त 13 मतांची गरज आहे. महाविकास आघाडीकडे 169 आमदार आणि भाजपकडे 113 आमदार आहेत. संख्याबळानुसार भाजप दोन, शिवसेना काँग्रेस आणि राष्ट्रवादीचा एक उमेदवार सहज राज्यसभेवर निवडून जाऊ शकतात.