Goa Assembly Election 2022 : उत्पल पर्रिकरांचा भाजपकडून अपमान, गोव्याची जनता हे विसरणार नाही ; संजय राऊतांचा भाजपवर हल्लाबोल

मनोहर पर्रिकर यांनी गोव्याचं नाव देशात उंचावलं. परंतु, आज त्यांच्याच मुलाचा अपमान भाजपकडून करण्यात आला. गोव्याची जनता हा अपमान विसरणार नाही, अशी टीका शिवसेनेचे खासदार संजय राऊत यांनी भाजपवर केली. 

Sanjay Raut

Goa Assembly Election 2022  : गोव्याचे माजी मुख्यमंत्री दिवंगत मनोहर पर्रिकर यांचे पुत्र उत्पल पर्रिकर यांनी नुकताच भाजपच्या सदस्यत्वाचा राजीनामा दिला आहे. परंतु, उत्पल यांचा जन्म ज्या पक्षात झाला तो पक्ष सोडताना त्यांना खूप वेदना झाल्या. त्यांच्या वेदना मी समजू शकतो. उत्पल पर्रिकरांचा भाजपकडून अपमान करण्यात आला आहे. गोव्याची जनता हा अपमान विसरणार नाही, अशी टीका शिवसेनेचे खासदार संजय राऊत यांनी भाजपवर केली. 

संजय राऊत यांनी आज पत्रकारांसोबत संवाद साधला. त्यावेळी त्यांनी भाजपवर अनेक आरोप केले. संजय राऊत म्हणाले, मनोहर पर्रिकर यांनी गोव्याचं नाव देशात उंचावलं. परंतु, आज त्यांच्याच मुलाचा अपमान भाजपकडून करण्यात आला. मनोहर पर्रिकर यांनी ज्या जागेचं प्रतिनिधीत्व केलं त्या जागेवर आज अनेक आरोप असलेल्या उमेदवाराला भाजपकडून तिकीट  देण्यात आलं आहे. या उमेदवारावर भ्रष्ट्राचार, माफियासह बलात्काराचे आरोप आहेत". 

"गोव्यात भाजप वाढवण्यासाठी मनोहर पर्रिकर आणि लक्ष्मीकांत पार्सेकर यांनी खूप प्रयत्न केले. परंतु, आज मनोहर पर्रिकर यांच्या मुलाचा भाजपकडून अपमान करण्यात येत आहे तर लक्ष्मीकांत पार्सेकर यांना तिकीट नाकारलं आहे. पार्सेकर यांनी पहिल्यांदा निवडणूक लढवल्यानंतर त्यांचं डिपॉझिट जप्त झालं होतं पण ते लढत राहिले आणि गोव्यात भाजप वाढवत राहिले. परंतु, आज त्यांनाच भाजपने तिकीट नाकारले आहे. भाजपला हे परवडणारे नाही. 
 
कॉंग्रेसला एवढा आत्मविश्वास कोठून येतो? 
गोव्यात भाजपला रोखण्यासाठी कॉंग्रेसला अनेक बाजूंनी मदत करण्यासाठी प्रयत्न केले. परंतु, त्यांना ते समजले नाही. आघाडी न करता बहुमताचा आकडा गाठण्याचा कॉंग्रेसला एवढा आत्मविश्वास कोठून येतो? असा टोमणा संजय राऊत यांनी कॉंग्रेसला लगावला.