Risod Assembly Election : काँग्रेसच्या अमित झनक यांची हॅट्रिक, रिसोडमधून शिंदे गटाच्या भावना गवळी पराभूत

Risod Assembly Election : रिसोडमधून शिवसेना शिंदे गटाच्या नेत्या भावना गवळी यांना पराभवाला सामोरं जावं लागलं.  

Risod Assembly Election Result

Source : abp majha

वाशिम : विदर्भातील लक्षवेधी असलेल्या लढतींपैकी एक लढत म्हणजे रिसोड मतदारसंघ. काँग्रेसचा गड मानला जाणाऱ्या या मतदारसंघात अमित झनक यांनी हॅट्रिक केली. त्यांनी शिंदे गटाच्या भावना गवळी यांचा 6,615 मतांनी पराभव केला. काँग्रेसचे आमदार अमित झनक यांच्यासमोर यंदा शिंदे गटाच्या विधानपरिषदेच्या आमदार भावना गवळी आणि भाजपचे बंडखोर अपक्ष उमेदवार अनंतराव देशमुख यांचं आव्हान होतं.

रिसोड मतदारसंघाची पार्श्वभूमी

जिल्ह्यातील रिसोड विधानसभा मतदारसंघ  हा  काँग्रेसचा  गड मानला जातो. या मतदार संघात नेहमी झनक कुटुंबाचं वजन असल्याचं दिसतंय. मात्र त्यांच्या याच मतदारसंघात गेल्या अनेक वर्षांपासून काँग्रेस नेते असलेले आणि काँग्रेस सरकारच्या काळात राज्यमंत्री असलेले अनंतराव देशमुख हे झनक कुटुंबीयांचे कट्टर राजकीय वैरी म्हणून ओळखले जातात. कारण काँग्रेसच्या उमेदवारांना पाडण्यासाठी अनंतराव यांनी मोठे प्रयत्न केले असल्याचं अनेक वेळा उघड झालं असून पक्षाने त्यांचं निलंबनसुद्धा केलं होतं. त्यामुळे झनक देशमुखांचं विळ्या-भोपळ्याचं वैर  समजलं जातंय. 

एकाच पक्षात राहून दोन्ही कुटुंबीयांचं केव्हाच जमलं नाही. त्याची उघड सुरवात झाली ती 2009 च्या निवडणुकीपासून. काँग्रेसचे माजी दिवंगत आमदार सुभाष झनक यांच्या विरोधात बंड पुकारून अनंतराव देशमुख यांनी अपक्ष निवडणूक लढवली होती. मात्र या निवडणुकीत देशमुख यांचा पराभव झाला. हे वैर  इथंच संपलं नाही तर हे वैर 2019 च्या निवडणुकीत पुन्हा पहायला मिळालं. अमित झनक यांच्या विरोधात अनंतराव देशमुख यांनी अपक्ष निवडणूक  लढवण्याचा निर्णय घेतला. यामध्ये अमित झनक यांचा अवघ्या 2100 मतांनी निसटता विजय झाला. 

काँग्रेसला कायमचा रामराम करत देशमुख पिता-पुत्रांनी 2022 भाजपमध्ये पिता-पुत्रांनी प्रवेश केला. त्यांना 2024 च्या विधानसभा निवडणुकीत भाजपकडून उमेदवारी मिळेल असं वाटत होतं. मात्र तसं इथेही झालं नाही. महायुतीमध्ये ही रिसोड विधानसभा मतदारसंघाची जागा शिंदे गटाच्या शिवसेनेकडे केली आणि ऐनवेळी भावना गवळी यांना उमेदवारी जाहीर झाली.

देशमुखांनी कोणतेही संविधानिक पद नसताना उपमुख्यमंत्री देवेंद्र फडणवीस यांच्या मार्फत मोठा निधी मतदारसंघात आणला आणि नियम ढाब्यावर ठेऊन  स्वतः भूमिपूजन केले. त्यामुळे स्थानिक लोकप्रतिनिधींची नाराजी असल्याचं बोललं जातं होतं. 

सन 2009 साली मतदारसंघाची पुनर्रचना झाली आणि नव्याने रिसोड मतदारसंघ अस्तित्वात आला. रिसोड विधानसभा मतदारसंघात सुभाष झनक हे 51,234 मतांनी विजयी झाले. या निवडणुकीनंतर  सुभाष झनक यांना राज्याच्या  मंत्रिमंडळात  स्थान मिळालं. त्यांना महिला व बालकल्याणमंत्री पद मिळालं. .मात्र आदर्श घोटाळा उघड झाला आणि  तत्कालीन मुख्यमंत्री अशोक चव्हाण यांना पायउतार व्हावं लागल. यानंतर  काहीच  महिन्यानंतर सुभाष झनक याचं निधन झालं.

लोकसभा निवडणुकीबरोबर पोटनिवडणूक झाली होती आणि त्यामध्ये अमित झनक यांनी 73,016 मते घेत विजयी झाले. 2014 साली काँग्रेसने  मोदी लाटेत पण अस्तित्व टिकवत आपला गड कायम ठेवला आणि अमित झनक 70,939  मतं मिळवत विजयी झाले. 

तिरंगी लढत

सन 2019 साली रिसोड विधानसभा मतदारसंघात  काँग्रेसने  मोदी लाटेतदेखील अस्तित्व टिकवत आपला गड कायम ठेवला.  इथं अमित झनक 69875 मतं  मिळवत विजयी झाले. मात्र 2019 च्या तुलनेत आता मोठे बदल झाले. भावना गवळी या प्रथमच त्यांची जन्मभूमी असलेल्या रिसोड  मतदारसंघात विधानसभा लढवत आहेत. तर भाजपचे बंडखोर अनंतराव देशमुख वयाच्या 76 व्या वर्षी निवडणूक रिंगणात उतरले आहेत. काँग्रेसची पकड आणि जातीय फॅक्टरमुळे अमित झनक याना पसंती दिसते. त्यामुळे काट्याची लढत असलेल्या या मतदारसंघात मतदारांनी यावेळीही अमित झनक यांनाच कौल दिला.  

ही बातमी वाचा: