एक्स्प्लोर

निवडणूक निकाल २०२४

(Source: ECI/ABP News/ABP Majha)

कोल्हापुरात राजेंद्र पाटील यड्रावकर, राहुल आवाडे, अशोकराव मानेंना मोठी आघाडी, कागलमध्ये चुरशीची लढत! कोल्हापूर जिल्ह्यात महाविकास आघाडीची पिछाडी

Kolhapur District Assembly Constituency Election : कोल्हापूर जिल्ह्यामध्ये विधानसभा निवडणुकीमध्ये धक्कादायक निकालांची नोंद होण्याची शक्यता आहे.

By : विजय केसरकर, एबीपी माझा | Edited By: परशराम पाटील | Updated at : 23 Nov 2024 10:23 AM (IST)

kolhapur district assembly constituency

Kolhapur District Assembly Constituency Election : कोल्हापूर जिल्ह्यामध्ये विधानसभा निवडणुकीमध्ये धक्कादायक निकालांची नोंद होण्याची शक्यता आहे. शिरोळ विधानसभा मतदारसंघातून अपक्ष उमेदवार राजेंद्र पाटील यड्रावकर 15781 मतांनी पुढे चालले असून त्यांनी मोठ्या आघाडीच्या दिशेने वाटचाल सुरू केली आहे. राजेंद्र पाटील यड्रावकर यांना शिवसेना शिंदे गटाकडून पाठिंबा देण्यात आला आहे. हातकणंगलेमधून जनसुराज्यच्या अशोकराव माने यांनी 8200 मतांची आघाडी घेतली आहे. अशोकराव माने यांच्या विरोधात काँग्रेसचे राजू बाबा आवळे विद्यमान आमदार आहेत. त्यामुळे ते पिछाडीवर असल्याचे चित्र आहे.

करवीरमधून तिसऱ्या फेरीत चंद्रदीप नरके यांना 6 हजार 500 मतांनी आघाडी मिळाली आहे. या ठिकाणी काँग्रेसचे राहुल पाटील यांची लढत होत आहे. चंदगडमध्ये बहुरंगी लढतीमध्ये भाजपचे बंडखोर शिवाजी पाटील यांनी आघाडी घेतली असन चौथ्या फेरी अखेर 3500 मतांनी आघाडी घेतली आहे. शाहूवाडीमध्ये धक्कादायक निकालाची नोंद होण्याची शक्यता असून चौथ्या फेरी अखेर सत्यजित पाटील यांनी घेतलेली आघाडी कायम राखली आहे. त्यांनी 1651 मतांची आघाडी घेतली आहे. कोल्हापूर दक्षिणमध्ये शहरी मतदानामध्ये अमल महाडिक यांनी आघाडी घेतली असून पाचव्या फेरी अखेर महाडिक 5975 मताने आघाडीवर आहेत. इचलकरंजीमध्येही भाजप उमेदवार राहुल आवाडे यांनी मोठी आघाडी घेतली असून 11,977 मतांनी आघाडी घेतली आहे. चौथ्या फेरी अखेर राहुल आवाडे यांनी मोठी आघाडी घेतली आहे. कागलमध्ये चुरशीची लढत होत असून सातव्या फेरीअखेर हसन मुश्रीफ यांच्याकडे अवघ्या 2104 मतांची आघाडी आहे. त्यामुळे कागलमध्ये हसन मुश्रीफ समरजीत घाटगे यांच्यामध्ये मोठी चुरस असल्याचे दिसून येत आहे. राधानगरीमध्ये प्रकाश आंबेडकर यांची सुद्धा घेतलेली आघाडी कायम आहे.