Vasai Girl Death: क्यों किया ऐसा मेरे साथ? लोखंडी पान्याचे 15 घाव घालून प्रेयसीला संपवलं, नागरिक मोबाईल शुटिंगमध्ये बिझी

Crime News: आरती रस्त्यावर बेशुद्ध अवस्थेत होती. तरीही रोहित तिच्या डोक्यात लोखंडी पान्याने घाव घालत होता. पोलिसांनी वेळीच कारवाई केली असती तर आरतीचा जीव वाचला असता, असा आरोप आरतीच्या कुटुंबीयांनी केला आहे

Vasai girl deth attack boyfriend ( Image Source :Vasai girl deth attack boyfriend \ ABP Majha )

वसई: मुंबईपासून काही अंतरावर असलेला वसई परिसर मंगळवारी एका हत्येच्या घटनेने हादरला. वसईच्या (Vasai) गौराईपाडा येथे सकाळी साडेआठच्या सुमारास हा प्रकार घडला. रोहित रामनिवास यादव (वय 29) या तरुणाने आरती रामदुलार यादव (वय 22) हिची निर्घृणपणे हत्या (Vasai Girl Murder) केली. रोहितने एका भल्यामोठ्या लोखंडी पान्याने आरतीच्या शरीरावर 15 जोरदार घाव घातले. यामध्ये तिचा जागीच मृत्यू झाला. हा सगळा प्रकार सुरु असताना आजुबाजूचे नागरिक बघ्याच्या भूमिकेत राहिले. अनेकांनी या घटनेचे व्हीडिओ शुटिंग केले. मात्र, कोणीही आरतीच्या मदतीला धावून गेले नाही. आरतीचा मृत्यू झाल्यानंतरही रोहित तिच्या मृतदेहावर एकापाठोपाठ पान्याने घाव घालत होता. 

आरतीवर हल्ला करण्यापूर्वी रोहित , "क्यों किया ऐसा मेरे साथ?", असे ओरडत होता. यानंतर त्याने आरतीवर लोखंडी पान्याने हल्ला केला. आरती रक्ताच्या थारोळ्यात पडली होती तेव्हादेखील तिला उपचारासाठी रुग्णालयात नेण्यात आले नाही. यावेळी काहीजणांनी रोहितला रोखण्याचा प्रयत्न केला. मात्र, रोहित त्यांच्याच अंगावर लोखंडी पाना घेऊन धावून गेला. तो शेवटपर्यंत शेजारीच असलेल्या दुकानाच्या पायरीवर बसून आरतीच्या मृतदेहाकडे बघत राहिला.  

आरतीच्या बहिणीचा पोलिसांवर आरोप

आरती आणि रोहित यांच्यात गेल्या सहा वर्षांपासून प्रेमसंबंध होते. मात्र, गेल्या काही काळापासून दोघांमध्ये बिनसल्याने आरती रोहितला टाळत होती. याचाच राग रोहित यादवच्या मनात होता. आरती वसई पूर्वेकडील एका खासगी कंपनीत कामाला होती. 8 जूनलाही रोहितने आरतीला मारहाण केली होती. त्याने आरतीचा मोबाईल फोडला होता. यानंतर आरतीने आचोळा पोलीस ठाण्यात तक्रार केली होती. मात्र, पोलिसांनी रोहितला केवळ समज देऊन सोडून दिले. पोलिसांनी वेळीच कारवाई केली असती तर माझी बहीण वाचली असती, असा आरोप आरतीच्या बहिणीने केला.

मात्र, पोलिसांनी हे आरोप फेटाळून लावले आहेत. आरतीने आम्हाला रोहित आणि तिच्यातील प्रेमप्रकरणाविषयी सांगितले नव्हते. आम्ही रोहित विरोधात गुन्हा दाखल करुन घेतला होता. 9 जूनला रोहितला पोलीस ठाण्यात बोलवण्यात आले. त्यावेळी रोहितांनी पोलिसांनी आपल्या भाषेत समज दिली. पोलिसी खाक्या दाखवताच आरतीने पोलिसांना थांबवले. आमचे आम्ही मिटवून घेऊ, असे तिने पोलिसांनी सांगितले. तरीही आम्ही 149 ची नोटीस देऊन रोहित यादव विरोधात कारवाई सुरु केली होती, अशी बाजू पोलिसांनी मांडली.

आणखी वाचा