Ulhasnagar Crime : भाड्याने खोली दिली नाही म्हणून वृद्ध महिला आणि तिच्या मुलावर जीवघेणा हल्ला

Ulhasnagar Crime : उल्हासनगरमध्ये भाड्याने खोली दिली नाही म्हणून वृद्ध महिला आणि तिच्या मुलावर जीवघेणा हल्ला केला. आरोपी अजय पवार आणि त्याच्या साथीदारांनी एका महिन्यात तीन वेळा त्यांच्यावर हल्ला केला.

Ulhasnagar Crime

उल्हासनगर : केवळ भाड्याने रुम द्यायला नकार दिला म्हणून एक वृद्ध महिला आणि तिच्या मुलावर तिघांनी जीवघेणा हल्ला केल्याची घटना उल्हासनगरमध्ये घडली आहे. या हल्ल्यात वृद्ध महिला आणि तिचा मुलगा जखमी झाला असून त्यांच्यावर शासकीय मध्यवर्ती रुग्णालयात उपचार सुरु आहेत. हल्लेखोर हे सराईत गुन्हेगार आहेत. उल्हासनगर पोलीस त्याचा शोध घेत आहेत.

उल्हासनगरच्या कॅम्प नंबर एक भागात ही घटना घडली आहे. उषा सिंह ही वृद्ध महिला आपल्या दोन मुलांसह साधूबेला हायस्कूल जवळील गिरधारी चाळ भागात राहते. तिच्या मालकीच्या असलेल्या एक रुम अजय आणि भरत पवार हे दोघे भाड्याने मागत होते. मात्र उषा यांनी त्यांना भाड्याने रुम देण्यास नकार दिला. घर भाड्याने देण्यास नकार देण्याचा कारणही तसंच आहे, हे दोघे भाऊ सराईत गुन्हेगार आहेत आणि या दोघांनी परिसरात दहशतीचे वातावरण निर्माण केले आहेत, या दोघांच्या गुंडगिरीला कंटाळून पीडित महिला आपल्या मालकीची खोली त्यांना भाड्याने देण्यास वारंवार नकार देत होती. शिवाय एकदा घर भाड्याने दिलं तर हे लोक आपल्याला दर महिन्याचं भाडे पण देणार नाही आणि घरावर ताबा पण घेणार, या भीतीपोटी पीडित महिला या दोघांना खोली भाड्याने देण्यास नकार देत होती.

याच रागातून या दोघांनी आपल्या इतर साथीदारांच्या मदतीने या वृद्ध महिलेवर हल्ला केला. तसंच तिच्या मुलावर आज चॉपरने हल्ला करुन त्याला जखमी केलं आहे. महिन्याभरात या वृद्ध महिला आणि तिच्या मुलांवर तीन वेळा हल्ले करण्यात आले आहेत. या प्रकरणी दोन्ही वेळा दोन उल्हासनगर पोलीस ठाण्यात अजय आणि भरत पवार यांच्यावर गुन्हा दाखल करण्यात आला आहे. मात्र आज पुन्हा त्यांनी उषा यांच्या मुलावर चॉपरने जीवघेणा हल्ला केला. सध्या दोघांवर उल्हासनगरच्या मध्यवर्ती रुग्णालयात उपचार सुरू आहेत. याप्रकरणी पोलिसांनी जखमींची चौकशी केली असून गुन्हा दाखल करुन आरोपींचा शोध सुरु केला आहे.

इतर बातम्या