कुरबुरीतून वाद विकोपाला, मुलाचे आईवर विळ्यानं सपासप वार, नंतर आत्महत्या
Beed Crime : बीडमध्ये एका पोटच्या गोळ्यानंच आईवर सपासप वार केलेत. या हल्ल्यात आई गंभीर जखमी झाली आहे. तर त्यानंतर घाबरलेल्या मुलानं आत्महत्या करत स्वतःचं जीवन संपवलं आहे.
Beed Crime : घरगुती वादातून मुलानेच आपल्या जन्मदात्या आईच्या मानेवर वार करून स्वतः आत्महत्या केली. ही घटना बीडच्या माजलगाव तालुक्यातील मालीपारगाव येथे घडली. या घटनेमुळं परिसरात भितीचं वातावरण निर्माण झालं आहे. या घटनेत गंभीर जखमी झालेल्या आईची तब्येत अत्यंत गंभीर असून त्यांच्यावर बीडच्या शासकीय रुग्णालयामध्ये उपचार सुरु आहेत.
बीडच्या मालीपार गावात राहणाऱ्या पारूबाई मच्छिंद्र कदम वय (50) आणि त्यांचा मुलगा बापू मच्छिंद्र कदम वय (30) वर्षे यांच्यात नेहमी घरगुती कारणावरून कुरबुरी होत असत. आज दुपारी पुन्हा या मुलामध्ये आणि आईमध्ये वाद झाला. काही वेळातच वाद विकोपाला गेला. त्यावेळी राग अनावर न झालेल्या मुलानं विळा घेऊन जन्मदात्या आईच्या मानेवर सपासप वार केले आणि त्यानंतर स्वतः आत्महत्या करत आपलं जीवन संपवलं.
आज दुपारी दीड वाजता मायलेकरात भांडणाची सुरुवात झाली. यावेळी चिडलेल्या मुलानं विळा घेऊन आईच्या मानेवर वार केले. घाव वर्मी लागल्यानं आई गंभीर जखमी झाली. त्यांना माजलगावच्या ग्रामीण रुग्णालयात उपचारासाठी दाखल करण्यात आलं आहे. त्यांची प्रकृती चिंताजनक असल्यानं डॉक्टरांनी त्यांना बीड येथील शासकीय रुग्णालयात अधिक उपचारासाठी रवाना केलं.
दरम्यान, या घटनेनं मुलगा प्रचंड घाबरला. त्याच अवस्थेत तो मालीपारगाव शिवारात पोहचला. घाबरलेल्या मुलानं शेतात एका झाडाला गळफास घेऊन आत्महत्या केली. यात जखमी आईची तब्येत गंभीर असून त्यांच्यावर बीडच्या शासकीय रुग्णालयामध्ये उपचार सुरु आहेत.
महत्त्वाच्या इतर बातम्या :
महत्त्वाच्या बातम्या
ट्रेंडिंग न्यूज
