अनैतिक संबंधाचे ब्लॅकमेलिंग ठरलं 'त्या' विधवेच्या निर्घृण हत्येचे कारण, विवाहित प्रियकर गजाआड

ब्युटी पार्लर चालवणाऱ्या विधवा महिलेच्या हत्येचा अखेर उलगडा झाला आहे.अनैतिक संबंधाचे ब्लॅकमेलिंग विधवेच्या निर्घृण हत्येचे कारण ठरलं आहे.

भिवंडी : ब्युटी पार्लरचा व्यवसाय करणाऱ्या विधवा महिलेची तिच्या राहत्या घरात कोणी नसताना पाच दिवसांपूर्वी अज्ञात मारेकऱ्याने धारधार शस्त्राने निर्घृण हत्या केल्याची धक्कादायक घटना समोर आली होती. ही घटना भिवंडी शहरातील तीनबत्ती परिसरात असलेल्या हाफसनआळी परिसरात असलेल्या एका इमारतीच्या दुसऱ्या मजल्यावर घडली होती. या घटनेचा उलगडा झाला असून आरोपीला अटक करण्यात आली आहे.

लक्ष्मीबाई भुरला (वय 38) असे निर्घृण हत्या झालेल्या विधवा महिलेचे नाव आहे. मोबाईल लोकेशनच्या आधारे हत्येप्रकरणी तिच्या विवाहित प्रियकराला भिवंडी शहर पोलिसांनी गजाआड केले आहे. प्रकाश पाटील (वय 59, रा. खारेगाव, ठाणे) असे अटक केलेल्या प्रियकराचे नाव आहे.

आरोपी प्रकाश पाटील हा भिवंडीतील एका बँकेत अकाउंटंट म्हणून तीन वर्षांपूर्वी कार्यरत असताना मृत लक्ष्मीबाईशी त्याच्याशी ओळख झाली. त्यांनतर काही दिवसांत या दोघांमध्ये अनैतिक संबध निर्माण झाले होते. आरोपी प्रकाश सेवानिवृत्त झाल्याने त्याच्याकडे मृत विधवा ब्लॅकमेल करून आपले अनैतिक संबंधाची माहिती तुझ्या घरच्यांना देईल अशी धमकी देऊन घर घेण्यासाठी 9 लाख रुपयांची मागणी करत होती. यामुळे आरोपीला राग येऊन 5 दिवसांपूर्वी घरात कोणी नसताना धारधार शस्त्राने लक्ष्मीबाईच्या शरीरावर 9 ते 10 वार करत गळा चिरून निर्घृण हत्या केली.

घटनेच्या दिवशी घराचा दरवाजा आतून उघडण्यात आला असल्याने व घरातील वस्तूंची चोरी झाली नसल्याने ही हत्या ओळखीच्या एखाद्या व्यक्तीने केली असल्याचा प्राथमिक अंदाज त्यावेळी पोलिसांकडून व्यक्त केला होता. पोलिसांनी याच दिशेने तपास करीत प्रकाश पाटील याला खारबांव मधून ताब्यात घेतले होते. त्याच्याकडे अधिक चौकशी केली असता त्याने हत्येची कबुली दिल्याची माहिती पोलिसांनी दिली आहे.

संबंधित बातमी : अल्पवयीन मुलाच्या हातात वाहनाचे स्टेरिंग देणं भोवलं, वडिलांना घडली तुरुंगवारी