Parbhani Crime : जातीतील मुलीशी प्रेमविवाह, तरीही बापाने मुलाला संपवले, परभणीतील धक्कादायक घटना
Parbhani Murder News :परभणीच्या पिंपरी देशमुख गावातील या घटनेमुळे एकच खळबळ उडाली असून यातील आरोपी बाप अन भावाला पोलिसांनी अटक केली आहे.
परभणी : जातीतील मुलीशी प्रेम विवाह (Love Marriage) केल्यानंतरही बापाने रागातून आपल्या मुलाला संपवल्याची धक्कादायक घटना परभणीच्या पिंपरी देशमुख गावात घडली आहे. यातील आरोपी बाप आणि भावाला पोलिसांनी अटक केली आहे.
परभणीच्या ताडकळस पोलिस ठाण्याच्या हद्दीतील पिंपरी देशमुख येथील माधव आवकाळे यांच्या गोविंद नावाच्या मोठ्या मुलाने स्वजातीतीलच एका तरुणीशी तीर्थक्षेत्र आळंदीस जावून प्रेम विवाह केला. दोन-अडीच महिन्यांपासून ते जोडपे पुण्यात राहत होते.
प्रेमविवाह केल्याचा घरच्यांना राग
एक तर मुलाने प्रेमविवाह केला, त्यातच घरात त्रास देत असल्याचा राग मनात होता. याच रागातून माधव अवकाळे याने स्वतःच्या मुलास बोलावून घेतले. शेतात झोपी गेलेल्या गोविंद या मुलावर माधव आवकाळे आणि त्याचा दुसरा मुलगा व्यंकटेश आवकाळे या दोघांनी धारदार शस्त्राने डोक्यावर, डोळ्यावर आणि मनगटावर वार केले. त्यात गोविंदचा जागीच मृत्यू झाला.
या घटनेची माहिती कळताच ताडकळस पोलिस ठाण्याचे सहाय्यक पोलिस निरीक्षक कपील शेळके, उपनिरीक्षक गजानन काठेवाड, शिवकांत नागरगोजे, आप्पाराव वराडे, अतूल टेहरे, संदीप साळवे आदींनी घटनास्थळी धाव घेवून लगेचच तपास सुरु केला. त्यात आरोपी हे घरातीलच सदस्य असल्याचे निदर्शनास आल्याबरोबर माधव आवकाळे आणि व्यंकटेश आवकाळे या दोघांना ताब्यात घेतले. या प्रकरणात आप्पाराव वराडे यांनी दिलेल्या तक्रारीच्या आधारे गुन्हा दाखल करण्यात आला असून आरोपी बाप आणइ भावाला अटक करण्यात आली आहे.
प्रेमाला विरोध करत आई-बापाने पोटच्या मुलीला संपवलं
काही दिवसांपूर्वी परभणीत अशीच एक घटना घडली होती. मुलीने दुसऱ्या जातीतील मुलासोबत लग्न केले होते. मात्र आईवडिलांचा याला विरोध होता. मुलीच्या प्रेमविवाहाला विरोध असल्याने आईवडिलांनी पोटच्या मुलीची निर्घृण हत्या केली आहे. परभणीच्या पालम तालुक्यामधील ही घटना समोर आली आहे.
मुलीने इतर जातीतील मुलावर प्रेम करून लग्न करण्याचा निर्धार केला. मात्र तिच्या घरच्यांना हा निर्णय मान्य नसल्याने तिची हत्या करून पुरावे नष्ट करण्याच्या उद्देशाने केवळ काही नातेवाईकांना बोलावून मृतदेहावर अंत्यसंस्कार करण्यात आले. हा ऑनर किलिंगचा प्रकार आता समोर आला आहे. परभणी जिल्ह्यातील पालम तालुक्यामधील नाव्हा या गावात घडला आहे. हा प्रकार उघडकीस आल्यानंतर एकूण आठ जणांवर हत्या, पुरावा नष्ट करणे या कलमाखाली पालम पोलिसात गुन्हा दाखल करण्यात आला.
ही बातमी वाचा:
महत्त्वाच्या बातम्या
ट्रेंडिंग न्यूज
