Palghar Crime : नेहरोलीमधील त्या तिघांची आत्महत्या नाही तर हत्याच, आरोपींचा शोध सुरू
Palghar Neharoli Murder : नेहरोलीतील एकाच कुटुंबातील आई, मुलगी आणि वडील यांची हत्या झाल्याचं समोर आलं आहे. पोलिस आता या प्रकरणाचा तपास करत आहेत.
पालघर : वाडा तालुक्यातील नेहरोली येथील एकाच कुटुंबातील त्या तिघांची आत्महत्या नव्हे तर हत्याच असल्याचं समोर आलं आहे. वाडा तालुक्यातील नेहरोली येथे एका घरामध्ये आई-वडील आणि मुलगी असे तिघांचे मृतदेह आढळून आले होते. हे मृतदेह कुजलेल्या अवस्थेत असल्याने ही हत्या की आत्महत्या याबाबत पोलिसांचा शोध सुरू होता. मात्र या तिघांनी आत्महत्या केली नसून तिघांचीही हत्याच झाल्याचं आता सिद्ध झालं आहे. या प्रकरणी पोलिसांकडून आरोपींचा शोध सुरू झाला आहे.
वाडा तालुक्यातील नेहरोली गावातली मुकुंद बेचरदास राठोड, कंचन मुकुंद राठोड आणि मुलगी संगीता मुकुंद राठोड या तिघांचा कुजलेल्या अवस्थेत मृतदेह आढळून आल्याने तालुक्यात खळबळ माजली होती. आई आणि तिच्या मुलीचा बंद पेटीत तर वडिलांचा बाथरूममध्ये मृतदेह आढळून आला होता.
जवळपास 12 दिवसांपासून ते संपर्कात नसल्याने त्यांचा बारा दिवसांपूर्वीच मृत्यू झाल्याचं स्पष्ट झालंय. त्यामुळे त्यांचे पूर्ण शरीर कुजलेल्या अवस्थेत होते. त्यामुळे त्यांची हत्या की आत्महत्या याबाबत शाशंकता निर्माण झाली होती. मात्र पोलिसांनी गोळा केलेल्या माहितीवरून वरील तिघांची ही हत्याच असल्याचे निष्पन्न झाले असल्याची माहिती वाडा पोलीस निरीक्षक दत्तात्रेय किंद्रे यांनी दिली. या प्रकरणातील आरोपी फरार असून अधिक तपास वाडा पोलीस करत आहेत.
नेमकं काय झालं?
मूळचे गुजरात येथील असलेले मुकुंद बेचरदास राठोड त्यांच्या कुटुंबीयांसह नेहरोली या गावात वीस वर्षांपासून राहत होते. 18 ऑगस्टपासून हे कुटुंब संपर्काच्या बाहेर असल्याने राजकोट येथे फॅब्रिकेशन व्यवसाय करत असलेला त्यांचा मुलगा सुहास शोध घेण्यासाठी नेहरोली येथे आला.
मुलाने कुलूप तोडले
नेहरोली येथील घराला बाहेरून कुलूप असल्याने कुटुंब आजारी तर नाही ना या आशेने आजूबाजूचे सर्व दवाखाने सुहास यांनी तपासून पाहिले. आपल्या कुटुंबाचा कुठेही शोध लागला नसल्याने अखेर घरातील काही कागदपत्रे काढण्याच्या उद्देशाने कुलूप फोडले व यावेळी घरातील दृश्य बघून त्यांच्या पायाखालची वाळू सरकली.
आई-मुलीचा मृतदेह बंद पेटीत सापडला
आई आणि मुलीचा मृतदेह एका बंद पेटीमध्ये आढळून आला तर वडिलांचा मृतदेह बाथरूम मध्ये पडलेला त्यांना दिसला. अनेक दिवसांपासून मृतदेह या ठिकाणी पडल्याने ते कुजलेल्या अवस्थेत होते. मृतदेहांचा बाहेर वास येऊ नये या उद्देशाने बहुदा मृतदेहांवर जाड गाद्या टाकण्यात आल्या होत्या. तात्काळ या घटनेची वाडा पोलिसांना माहिती दिल्यानंतर पोलिसांनी घटनास्थळी धाव घेतली. सध्या वाडा पोलीस घडलेल्या घटनेचा तपास करत आहेत.
ही बातमी वाचा:
महत्त्वाच्या बातम्या
ट्रेंडिंग न्यूज
