Ashok Kharat : अशोक खरातच्या मुलाला पोलिसांनी ताब्यात घेतलं, चौकशीतून मोठी माहिती बाहेर येण्याची शक्यता
Ashok Kharat Case : अशोक खरातची पत्नी फरार झाली असून तिच्या शोधासाठी पोलिसांची दोन पथकं नाशिक आणि शिर्डीच्या दिशेने रवाना झाल्याची माहिती आहे.
नाशिक : भोंदू अशोक खरातच्या पत्नीची चौकशी करायला गेलेल्या नाशिक पोलिसांनी अशोक खरातच्या (Ashok Kharat) मुलाला ताब्यात घेतलं आहे. या प्रकरणात पोलिसांनी जलदगतीने हालचाली करत ही कारवाई केली आहे. अशोक खरातची पत्नी कल्पना खरातवर फसवणुकीचा गुन्हा दाखल केल्यानंतर ती फरार झाल्याची माहिती समोर आली. आता पोलिसांनी अशोक खरातच्या मुलाला चौकशीसाठी ताब्यात घेतल्याची माहिती समोर आली.
अशोक खरातसोबत त्याची पत्नी कल्पना खरातवर शिर्डी पोलीस ठाण्यात फसवणुकीचा गुन्हा दाखल करण्यात आला आहे. त्यानंतर नाशिक पोलीस कल्पना खरातची चौकशी करण्यासाठी खरातच्या निवासस्थानी गेले. मात्र, कल्पना खरात आधीच फरार झाल्याची माहिती समोर आली. दरम्यान, यावेळी घरात असलेल्या अशोक खरातच्या मुलाला पोलिसांनी ताब्यात घेतल्याची माहिती आहे. तर कल्पना खरातच्या शोधासाठी पोलिसांची दोन पथकं नाशिक आणि शिर्डीच्या दिशेने रवाना झाली आहेत.
Kalpana Kharat : शिर्डीत कल्पना खरातवर गुन्हा दाखल
शिर्डीतील 4 एकर भूखंड खरेदीप्रकरणी अशोक खरातसह 5 जणांवर गुन्हा दाखल झालाय. मूळ जमीन मालक रावसाहेब गोंदकर यांच्या फिर्यादीवरून हा गुन्हा दाखल झाला आहे. जमीन खरेदी व्यवहारात फसवणूक केल्याप्रकरणी अशोक खरात, त्याची पत्नी कल्पना खरात, शिर्डीतला मध्यस्थ अरविंद बावके, किरण सोनावणे, अशोक तांबे यांच्यावर गुन्हा दाखल झाला आहे.
दरम्यान, शिर्डीमध्ये गुन्हा दाखल झाल्यावर खरातची पत्नी फरार झाल्याची माहिती आहे. अरविंद बावके आणि किरण सोनावणे यांना ताब्यात घेण्यात आलं आहे. फसवणूक आणि सावकारी अधिनियमांतर्गत शिर्डी पोलीस ठाण्यात हा गुन्हा दाखल झाला आहे. कर्ज फेडण्यासाठी व्याजाने पैसे देत जमीन बळकावल्याचा आरोप आहे. शिर्डीत भोंदू खरातची कोट्यवधींची मालमत्ता आहे. या सर्व व्यवहारांची एसआयटी चौकशी करत आहे.
आपलं सावज हेरण्यासाठी भोंदू खरात वेगवेगळ्या सीमकार्डचा वापर करत असल्याचं समोर आलं आहे. त्यातला एक नंबर खरात केवळ महिलांसाठी तर दुसरा नंबर केवळ व्हीआयपी भक्तांसाठी वापरत होता. या नंबरवरून त्याचा काही राजकीय नेते व प्रभावशाली व्यक्तींशी संवाद होत असावा असा संशय आहे.
तिसऱ्या मोबाईल क्रमांकावरून अशोक खरात आपले आर्थिक व्यवहार पाहत होता. तर चौथा मोबाईल क्रमांक हा सर्वसामान्य लोकांशी संपर्क साधण्यासाठी वापरत होता. विशेष तपास पथक या चारही मोबाईल क्रमांकांवरून झालेल्या संभाषणाची माहिती मिळवते आहे. अशोक खरातची बुधवारी पोलीस कोठडी संपणार असून, त्याला कोर्टात हजर करण्यात येणार आहे. त्याची पुन्हा पोलीस कोठडी मिळावी यासाठी अधिकाधिक पुरावे गोळा करण्याचं काम एसआयटी करत आहे.
ही बातमी वाचा:
महत्त्वाच्या बातम्या
