Nashik Crime News: वाढदिवशीच दहावीचा विद्यार्थी कुणालाही न सांगता आश्रमशाळेतून निघून गेला, शोधाशोध केली असता भयानक प्रकार उघड; नाशिकमध्ये खळबळ
Nashik Crime News: आश्रमशाळेतील दहावीचा विद्यार्थी कुणालाही न सांगता अचानक बेपत्ता झाला होता. गेल्या दोन दिवसांपासून त्याचा शोध घेतला जात होता.
Nashik Crime News: नाशिक (Nashik) जिल्ह्याच्या त्र्यंबकेश्वर (Trimbakeshwar) तालुक्यातील पिंप्री येथील माध्यमिक आश्रमशाळेतील दहावीचा विद्यार्थी कुणालाही न सांगता अचानक बेपत्ता झाल्यानंतर दोन दिवसांनी त्याचा मृतदेह झाडाला गळफास घेतलेल्या अवस्थेत आढळून आल्याने परिसरात मोठी खळबळ उडाली आहे. संजय सदू नडगे (वय 17) असे मृत विद्यार्थ्याचे नाव असून त्याच्या मृत्यूमागे आत्महत्या की अन्य काही कारण आहे, याचा शोध आता पोलीस (Police) घेत आहेत. (Nashik Crime News)
याबाबत मिळालेल्या माहितीनुसार, संजय नडगे हा त्र्यंबकेश्वर तालुक्यातील पिंप्री माध्यमिक आश्रमशाळेत दहावीत शिक्षण घेत होता. गुरुवारी (दि. 12) दुपारी सुमारे तीनच्या सुमारास तो कोणालाही काहीही न सांगता आश्रमशाळेतून निघून गेला. त्यानंतर तो परत न आल्याने शाळा प्रशासनाला संशय आला. बराच शोध घेतल्यानंतरही तो सापडला नाही. अखेर आश्रमशाळेचे मुख्याध्यापक सुनील विठ्ठल जाधव यांनी शुक्रवारी (दि. 13) त्र्यंबकेश्वर पोलीस ठाण्यात विद्यार्थ्याच्या बेपत्ता झाल्याची तक्रार दाखल केली.
Nashik Crime News : झाडाला लटकलेल्या अवस्थेत आढळला मृतदेह
दरम्यान, रविवारी (दि. १५) दुपारच्या सुमारास आश्रमशाळेच्या मागील बाजूस सुमारे दोन किलोमीटर अंतरावर असलेल्या डोंगरावरील झाडीत गुरे चारण्यासाठी गेलेल्या काही मुलांना एका झाडाला लटकलेल्या अवस्थेत मृतदेह दिसून आला. त्यांनी ही माहिती तातडीने आश्रमशाळेत दिली. त्यानंतर घटनेची माहिती पोलिसांना कळवण्यात आली. माहिती मिळताच त्र्यंबकेश्वर पोलीस ठाण्याचे पोलीस उपनिरीक्षक अशोक बोडके व त्यांच्या पथकाने घटनास्थळी धाव घेतली. पोलिसांनी पंचनामा करून मृतदेह ताब्यात घेतला. पंचनामा पूर्ण होईपर्यंत सायंकाळ झाली होती. त्यानंतर संजयच्या आई-वडिलांना घटनास्थळी बोलावून घेण्यात आले.
Nashik Crime News : वाढदिवशीच आश्रमशाळेतून गेला निघून
विशेष म्हणजे, संजय नडगे याचा 12 मार्च रोजी वाढदिवस होता. शाळेच्या नोंदीनुसार त्याची जन्मतारीख 12 मार्च 2009 अशी आहे. वाढदिवसाच्या दिवशीच तो आश्रमशाळेतून निघून गेल्याची बाब समोर आली आहे. त्यामुळे त्याने हे टोकाचे पाऊल का उचलले, याबाबत अनेक प्रश्न उपस्थित होत आहेत. संजय नडगे हा त्र्यंबकेश्वर तालुक्यातील गुजरात सीमेवर असलेल्या बुरूडपाडा गावातील रहिवासी होता. त्याचे आई-वडील मोलमजुरी करून कुटुंबाचा उदरनिर्वाह करतात. रोजंदारीसाठी स्थलांतर करावे लागत असल्याने संजयला शिक्षणासाठी आश्रमशाळेत ठेवण्यात आले होते. तो काही वर्षांपासून या आश्रमशाळेत निवासी विद्यार्थी म्हणून राहत होता. त्याचे दोन भाऊदेखील याच शाळेत शिक्षण घेत असल्याची माहिती समोर आली आहे.
Nashik Crime News: आई-वडीलही घेत होते शोध
दरम्यान, संजय बेपत्ता झाल्यापासून त्याचे आई-वडीलही त्याचा शोध घेत होते. आश्रमशाळेच्या मागील डोंगरावरील झाडीत विद्यार्थी अभ्यासासाठी जात असल्याची चर्चा स्थानिकांमध्ये आहे. तसेच विद्यार्थी शाळेबाहेर गेला असल्यास त्याची नोंद ठेवणे आवश्यक असते. या प्रकरणात अशी नोंद ठेवली होती की नाही, याबाबतही प्रश्न उपस्थित केले जात आहेत. या घटनेमुळे आश्रमशाळेच्या कार्यपद्धतीवरही प्रश्नचिन्ह निर्माण झाले आहे. संजयच्या मृत्यूमागे नेमके काय कारण आहे, तो आत्महत्येचा प्रकार आहे की अन्य काही घडले आहे, याचा सखोल तपास पोलिसांकडून सुरू आहे. दरम्यान, या घटनेने संपूर्ण त्र्यंबकेश्वर तालुक्यात हळहळ व्यक्त केली जात असून संजयच्या मृत्यूचे गूढ उलगडण्याची मागणी होत आहे.
आणखी वाचा
महत्त्वाच्या बातम्या
