Crime: तासाभराचा थरार आणि हड्डी गजाआड, विविध पोलीस ठाण्यात दाखल होते 12 गुन्हे

Mumbai Crime News: मारामारी चोरी सारखे डझनभर गुन्हे दाखल असलेल्या इब्राहिम इस्माईल माजिद उर्फ पापा हड्डी याला कल्याणच्या बाजारपेठ पोलिसांनी सापळा रचून अटक केली आहे.

mumbai_crime

Mumbai Crime News: मारामारी चोरी सारखे डझनभर गुन्हे दाखल असलेल्या इब्राहिम इस्माईल माजिद उर्फ पापा हड्डी याला कल्याणच्या बाजारपेठ पोलिसांनी सापळा रचून अटक केली आहे. आठ महिने फरार असलेल्या पापा हड्डीच्या अटकेचा थरार तब्बल तासभर चालला हड्डीने पळून जाण्यासाठी नाना शक्कल लढवली. मात्र पोलिसांनी त्याचे सगळे मनसुबे उधळून लावत त्याला अखेर पकडले.

कुख्यात गुन्हेगार असलेला पापा हड्डी हा त्याच्या राहत्या घरी आला असल्याची माहिती बाजारपेठ पोलिसांना मिळाली होती. या माहितीच्या आधारे पोलिसांनी त्याच्या अटकेसाठी सापळा रचला. पोलिसानी त्याचा घराला घेरले. पोलिसांची चाहूल लागताच पापा हड्डी घराच्या टेरेसवर जाऊन लपला. टेरेसवरील कठड्याच्या पलीकडे तो लपून बसला. टेरेसच्या पत्र्यावर पोलिसांना दिसू नये यासाठी त्याने अंगावरील कपडे काढून तेथे लपला होता. काही वेळ पोलीस आणि हड्डी याच्यात लपाछपीचा खेळ सुरु होता. टेरेसवर हड्डीच्या पायाचे ठसे दिसले. त्यावरुन पोलिसांना तो इथेच लपून बसल्याची खात्री पटली. पोलिस टेरेसवरुन हटत नाही हे पाहून हड्डीने टेरेसवरुन उडी मारली. तो पळून जाण्याचा प्रयत्न करीत होता. 

त्यावेळी खाली दबा धरुन बसलेला पोलीस नेमका त्याच्या समोर आला. त्याने पोलिसांना झटका देत तिथूनही पळ काढण्याचा प्रयत्न केला. इतकेच नाही त्याला पकडण्यासाठी त्याचा पाठलाग करणाऱ्या पोलिसांच्या अंगावर त्याने रस्त्यातील उभी असलेली बाईक ढकलण्याचा प्रयत्न केला. मात्र पोलिसांनी त्याचे सगळे मनसुबे उधळून लावत त्याला अखेर पकडले. हड्डी याच्या विरोधात विविध पोलीस ठाण्यात 12 गुन्हे दाखल आहेत. आठ महिन्यांपासून हड्डी पोलिसांना चकवा देत होता. अखेर कल्याणच्या बाजारपेठ पोलिसांना त्याला जेरबंद करण्यात यश आलंय. 

इतर बातम्या