Dombivli: रेकी करुन घरफोड्या करणारे दोन सराईत चोर अटकेत; चोरीच्या पैशांतून बारबालांवर करायचे उधळपट्टी

Dombivli Crime: डान्स बारमधील बारबालांवर पैसे उडवण्यासाठी जवळ पैसे हवे, यासाठी रेकी करुन घरफोड्या करणाऱ्या दोघांना मानपाडा पोलिसांनी ताब्यात घेतलं आहे.

Dombivli Crime

Dombivli Crime: रेकी करून घरफोड्या करणाऱ्या दोन सराईत चोरांना गजाआड करण्यात मानपाडा पोलिसांना यश आलं आहे. सीसीटीव्ही फुटेजच्या मदतीने पोलिसांनी चोरांना अटक केली आहे. खळबळजनक बाब म्हणजे हे चोर चोरी केलेल्या पैशांतून डान्स बारमधील (Dance Bar) बारबालांवर उधळपट्टी करत असल्याचं समोर आलं आहे. अटक करण्यात आलेल्या दोन्ही सराईत चोरट्यांनी आतापर्यंत 18 घरफोड्या केल्याची कबुली दिली असून त्यांच्याकडून लाखोंचा मुद्देमाल जप्त करण्यात आला आहे. 

यापूर्वीही या दोघांना 34 घरफोड्या केल्याप्रकरणी अटक करण्यात आल्याचं पोलीस तपासातून समोर आलं आहे. युसुफ रशिद शेख (वय 38, रा. घणसोली, नवी मुंबई), नौशाद मुस्ताक आलम उर्फ सागर (वय 25, रा. कामोठे, नवी मुंबई) अशी अटक केलेल्या सराईत चोरांची नावं आहेत.

पोलिसांनी दिलेल्या माहितीनुसार, गेल्या काही महिन्यांपासून डोंबिवलीतील मानपाडा पोलीस ठाण्यात घरफोड्यांच्या तक्रारींची प्रकरणं वाढत होती. दिवसा आणि रात्री बंद घरांच्या घरफोडीचं प्रमाण वाढल्याने हे गुन्हे उघडकीस आणण्यसाठी पोलिसांनी विशेष पथक तयार केलं. पोलीस उप-आयुक्त सचिन गुंजाळ आणि सहाय्यक पोलीस आयुक्त सुनिल कुराडे यांनी मानपाडा पोलीस ठाण्याच्या गुन्हे शाखेचे पोलीस निरीक्षक सुरेश मदने यांना विशेष पथक स्थापन करण्याचे निर्देश देण्यात आले.

साहाय्यक पोलीस निरीक्षक सुनील तारमळे, वणवे यांच्यासह पोलीस पथकाची चोरांचा शोध घेण्यासाठी नेमणूक करण्यात आली. या पथकाने घरफोड्या झालेल्या इमारती आणि परिसरातील सीसीटीव्ही फुटेज तपासून गुप्त बातमीदाकडून चोरा ओळख पटवली. त्यानंतर दोन्ही चोरांचा शोध सुरू झाला. दोघांनाही टिटवाळा नजीकच्या बल्याणी गावात सापळा रचून ताब्यात घेतलं. दोन्ही चोरांची पोलीस पथकाने कसून चौकशी केली असता त्यांनी मानपाडा हद्दीसह विविध पोलीस ठाण्यांच्या हद्दीत 18 घरफोड्या केल्याची कबुली दिली आहे.

अटकेत असलेल्या चोरांकडून पोलिसांनी 2 लाख 20 हजार 500 रुपये किमतीचे 200 ग्रॅम वजनाचे सोन्याचे दागिने आणि रोख रक्कम, 2 मोटारसायकल, 2 लॅपटॉप, 8 महागडे मोबाईल, 5 मनगटी घडयाळ, 1 कॅमेरा, 1 स्पिकर, 1 एटीएम कार्ड, प्लेट, 1 हेल्मेट आणि घरफोडी करण्यासाठी वापरले जाणारे दोन लोखंडी कटर, स्कु ड्रायव्हर, पक्कड आणि चाकू असा एकूण 20 लाख 15 हजार रुपयांचा मुद्देमाल हस्तगत करण्यात आल्याची माहिती मानपाडा पोलीस ठाण्याचे प्रभारी वरिष्ठ पोलीस निरीक्षक सुरेश मदने यांनी पत्रकार परिषदेत दिली आहे. 

दरम्यान, अटक करण्यात आलेले चोर हे सराईत गुन्हेगार असून यापुर्वी मुंबई, नवी मुंबई आणि ठाणे आयुक्तलयाच्या परिसरातील विविध पोलीस ठाण्यांत चोर युसूफ शेख याला 23 गुन्ह्यांत यापूर्वीही अटक करण्यात आली आहे, तर चोर  नौशाद आलम यालाही यापूर्वी 11 गुन्ह्यांत अटक करण्यात आली आहे.

हेही वाचा: