Bhiwandi : लहान मुलांचा क्रिकेट खेळण्यावरून वाद, मोठ्यांनी फोडली एकमेकांची डोकी, भिवंडीत जबरदस्त राडा
Bhiwandi Crime : लहानांचा क्रिकेट खेळण्यावरुन सुरू झालेल्या वादाचे रुपांतर मोठ्यांच्या हाणामारीत झालं.
भिवंडी: आपल्याकडे अनेक ठिकाणी लहान मुलांच्या वादातून मोठ्यांची हाणामारी झाल्याचे प्रकार पाहायला मिळतात. असाच एक प्रकार भिवंडीमध्ये घडला आहे. शहरातील हंडी कंपाऊंड परिसरात लहान मुलांचा क्रिकेट खेळण्यावरुन वाद झाला आणि त्यांचे पर्यवसन मोठ्यांच्या हाणामारीत झालं, त्यातून जबरदस्त राडा झाल्याचं पाहायला मिळालं. या प्रकरणामध्ये तीन ते चार लोक जखमी झाले आहेत.
दोन कुटुंबात झालेल्या या मारहाणीचा व्हिडीओ सध्या सोशल मीडियावर चांगलाच व्हायरल होताना दिसत आहे.
काय घडलं?
हंडी कंपाउंड परिसरातील लहान मुले क्रिकेट खेळत असताना त्यांच्यामध्ये वाद विवाद झाला आणि त्यानंतर किरकोळ बाचाबाची झाली. मात्र यानंतर याबाबत जाब विचारण्यासाठी एका मुलाचे कुटुंब दुसऱ्या मुलाच्या कुटुंबीयांच्या घरी गेले आणि त्या ठिकाणी या दोन्ही कुटुंबांमध्ये जोरदार बाचाबाची झाली. या बाचाबाचीचे रूपांतर हाणामारीत झाले. लाकडी दांड्याने आणि लाथा बुक्क्याने जोरदार मारामारी झाली.
या मारहाणीत दोन्ही कुटुंबातील तीन ते चार जण जखमी झाले असून जखमींवर शासकीय रुग्णालयात उपचार सुरु आहे. मात्र या प्रकरणात एका स्थानिकांने त्याच्या मोबाईल कॅमेऱ्यात मारहाणीचे व्हिडीओ कैद केले आणि ते सोशल मीडियावर व्हायरल केलं. तर दुसरीकडे या प्रकरणी भोईवाडा पोलीस ठाण्यात परस्पर विरोधात मारहाणीचा गुन्हा दाखल करण्यात आला आहे. या प्रकरणामध्ये तिघांना अटक करण्यात आली आहे. पुढील तपास भोईवाडा पोलीस करत आहेत.
या अशा प्रकारच्या घटना आपल्या आजूबाजूला वारंवार घडताना दिसतात. लहान मुलांची खेळताना भांडणं सुरू होतात, आणि ती मुलं नंतर त्याची तक्रार घरी जाऊन करतात. मग त्या मुलाच्या घरचे पालक किंवा इतर नातेवाईक यावरुन एकमेकांच्या आमने-सामने येतात.
महत्त्वाच्या बातम्या:
महत्त्वाच्या बातम्या
