Vande Bharat : पुणेकरांसाठी गुड न्यूज, चार नव्या वंदे भारत एक्स्प्रेस सुरु होणार, शेगाव, सिकंदराबाद, बेळगाव अन् बडोदा प्रवास वेगवान होणार

Vande Bharat : पुणे जंक्शनवरुन येत्या काळात चार नव्या वंदे भारत एक्स्प्रेस सुरु होणार असल्याची माहिती आहे. वंदे भारत एक्सप्रेस पुण्यातून शेगाव, सिकंदराबाद, बेळगाव आणि बडोदा या दरम्यान धावतील.

पुण्यातून चार नव्या वंदे भारत एक्स्प्रेस धावणार

Source : PTI

पुणे : पुणे जंक्शनवरुन कर्नाटक, तेलंगणा, गुजरात आणि महाराष्ट्रातील विदर्भात जाणाऱ्या प्रवाशांसाठी गुड न्यूज आहे. पुणे स्टेशनवरुन लवकरच चार नव्या वंदे भारत सुरु होण्याची शक्यता आहे. सध्या पुणे स्टेशनवरुन पुणे कोल्हापूर आणि पुणे हुबळी या दोन वंदे भारत एक्स्प्रेस धावतात. सध्या सुरु असलेल्या दोन आणि नव्यानं सुरु होणाऱ्या 4 वंदे भारत एक्स्प्रेस अशा एकूण सहा वंदे भारत एक्स्प्रेस पुणे जंक्शनवरुन सुटतील.

पुणे जंक्शनवरुन ज्या चार नव्या वंदे भारत एक्स्प्रेस सुरु होणार आहेत. त्या पुणे-शेगाव, पुणे- बेळगाव, पुणे-बडोदा आणि पुणे-सिकंदराबाद या चार वंदे भारत एक्स्प्रेस नव्यानं सुरु होणार आहेत. या चार वंदे भारत एक्स्प्रेस सुरु झाल्यास या मार्गांवरुन रेल्वेनं प्रवास करणाऱ्या प्रवाशांचा प्रवासाचा वेळ कमी होईल.

पुणे-शेगांव वंदे भारत एक्सप्रेस : या मार्गावरील वंदे भारत एक्स्प्रेसला दौंड, अहमदनगर (अहिल्यानगर), छत्रपती संभाजीनगर आणि जालना या स्थानकांवर थांबा असेल.

पुणे-बडोदा वंदे भारत एक्सप्रेस: या एक्स्प्रेसला लोणावळा, पनवेल, वापी आणि सूरत या चार स्थानकांवर थांबा असणार आहे. ही एक्स्प्रेस महाराष्ट्र आणि गुजरात या राज्यातून धावेल.

पुणे-सिंकदराबाद वंदे भारत एक्सप्रेस : या वंदे भारत एक्स्प्रेसला दौंड, सोलापूर, गुलबर्गा या स्थानकांवर थांबा असेल. या मार्गावर वंदे भारत एक्सप्रेस सुरु झाल्यानंतर प्रवासाचा दोन ते तीन तासांचा वेळ वाचेल. ही एक्स्प्रेस महाराष्ट्र, कर्नाटक आणि तेलंगणा या तीन राज्यांमधून धावेल.

पुणे-बेळगाव वंदे भारत एक्सप्रेस : ही एक्स्प्रेस पुणे जंक्शन ते बेळगाव या दरम्यान धावेल. वंदे भारत एक्स्प्रेसला सातारा, सांगली आणि मिरज या स्थानकांवर थांबा मिळण्याची शक्यता आहे.

पुणे जंक्शन वरुन नव्यानं या चार वंदे भारत एक्स्प्रेस सुरु झाल्यास या शहरांदरम्यानं प्रवास करण्यासाठी लागणाऱ्या वेळेची बचत होणार आहे. प्रवासाचा वेळ साधारणपणे 2 तासांनी कमी होऊ शकतो.

याशिवाय आगामी काळात भारतीय रेल्वेकडून पुणे आणि नागपूर दरम्यान वंदे भारत स्लीपर ट्रेन सुरु केली जाण्याची शक्यता आहे. 

दरम्यान, पुणे जंक्शनवरुन चार नव्या वंदे भारत एक्स्प्रेस सुरु झाल्यास रेल्वेनं प्रवास करणं आरामदायी आणि आल्हाददायक होईल.