Mhada Mumbai Lottery 2024 : म्हाडाच्या मुंबईतील 2030 घरांसाठी किती अर्ज आले? किती जणांनी अनामत रक्कम भरली? आकडेवारी समोर
Mhada Mumbai Lottery 2024 : म्हाडानं मुंबईतील 2030 घरांसाठी लॉटरी जाहीर केली असून अर्ज दाखल करण्यासाठी मुदतवाढ देण्यात आली आहे.
मुंबई : महाराष्ट्र गृहनिर्माण आणि क्षेत्रविकास प्राधिकरण (Mhada) म्हणजेच म्हाडाच्या मुंबई मंडळाच्या 2023 घरांची (Mhada Mumbai Lottery 2024) सोडत 8 ऑक्टोबरला जाहीर होणार आहे. म्हाडानं मुंबईतील या घरांसाठी सोडत जाहीर करत ऑगस्ट महिन्यात जाहिरात प्रसिद्ध केली होती. 9 ऑगस्टपासून ते 4 सप्टेंबर अशी अर्ज दाखल करण्याची मुदत होती. मात्र, म्हाडानं नंतर अर्ज दाखल करण्यास मुदतवाढ दिली होती. या मुदतवाढीचा फायदा झाल्याचं चित्र पाहायला मिळत आहे. मुंबईतील या घरांसाठी अर्ज करणाऱ्यांच्या संख्येत वाढ झाली आहे.
म्हाडाच्या पोर्टलवर कालपर्यंत 68651 व्यक्तींनी ऑनलाईन अर्ज केले आहेत. तर, अनामत रक्कम जमा करणाऱ्यांची संख्या 49286 वर पोहोचली आहे. यासंदर्भात नवभारत टाइम्सनं वृत्त दिलं आहे.
ऑनलाईन अर्ज सादर करण्यासाठी शेवटचे 7 दिवस
म्हाडानं मुंबईतील या घरांसाठी पहिल्यांदा केवळ 26 दिवसांची मुदत दिली होती. मात्र, कागदपत्र जमा करण्यात येणाऱ्या अडचणी आणि इतर गोष्टींचा विचार करुन अर्ज सादर करण्यास मुदतवाढ देण्यात आली होती. अर्ज सादर करण्यास मुदतवाढ दिल्यानं सोडतीची तारीख देखील बदलण्यात आली होती. जुन्या वेळापत्रकानुसार म्हाडाकडून सोडत 13 सप्टेंबर रोजी जाहीर करण्यात येणार होती. आता नव्या वेळापत्रकानुसार 8 ऑक्टोबरला घरांची सोडत जाहीर केली जाईल.
मुंबई बोर्डाच्या या लॉटरीत गोरेगाव पश्चिम, पवई, कन्नमवार नगर-विक्रोळी, अँटॉप हिल वडाळा, शिवधाम कॉम्प्लेक्स मालाड, दादर, लोअर परेल, कुर्ला, बोरिवली, मुलुंड, ओशिवरा, वडाळा, माझगाव, घाटकोपर, माहिम, कांदिवली यासह अन्य ठिकाणच्या घरांसाठी अर्ज मागवण्यात आले आहेत.
म्हाडानं जाहीर केलेल्या घरांमध्ये अत्यल्प गटासाठी 359 घरं, अल्प उत्पन्न गटातील घरांसाठी 627, मध्यम उत्पन्न गटासाठी 768 आणि उच्च उत्पन्न गटासाठी 276 घरं निश्चित करण्यात आलेली आहेत.
म्हाडानं खासगी विकासकांकडून मिळालेल्या 370 घरांच्या किंमती कमी केल्या होत्या. या घरांच्या किंमती 12 लाख ते 75 लाख रुपयांनी कमी केल्या आहेत. म्हाडानं विकासकांकडून मिळालेल्या घरांच्या किंमती 10 ते 25 टक्के कमी केल्या आहेत. मुदतवाढ आणि घरांच्या किंमती केल्यानं अर्ज सादर करणाऱ्यांच्या संख्येत वाढ झाली आहे. म्हाडानं मुदतवाढ दिल्यानंतर या घरांच्यासाठी अर्ज करण्याची संख्या 46 हजारांनी वाढली आहे.
दरम्यान, म्हाडानं गेल्यावर्षी 4082 घरांसाठी लॉटरी जाहीर केली होती. यंदाच्या लॉटरीत अर्ज करण्यासाठी 19 सप्टेंबर पर्यंत मुदतवाढ देण्यात आली आहे. म्हाडाच्या अधिकृत वेबसाईट आणि अॅपवर नोंदणी करुन अर्ज करता येईल.
इतर बातम्या :
महत्त्वाच्या बातम्या
ट्रेंडिंग न्यूज
