LIC चे 21 हजार कोटी बेवारस; विमा रक्कमेवर दावा न केलेल्या रक्कमेत वाढ
LIC IPO: एलआयसीकडे ग्राहकांचे 21 हजार 500 कोटी रुपये पडून असल्याचे समोर आले आहे. या रक्कमेवर ग्राहकांनी, त्यांच्या वारसदारांनी दावा केला नाही.
Life Insurance Corporation: भारतातील सर्वात मोठी विमा कंपनी LIC च्या विमा पॉलिसीच्या विक्रीत घट झाली असल्याचे समोर आले आहे. एलआयसीने दिलेल्या माहितीनुसार, वैयक्तिक आणि समूह विमा पॉलिसीच्या विक्रीत घट झाली आहे. वर्ष 2018-19 मध्ये 7.5 कोटी पॉलिसींची विक्री करण्यात आली होती. तर, आर्थिक वर्ष 2020-21 मध्ये 15.84 टक्के घट झाली. या आर्थिक वर्षात 5.25 कोटी पॉलिसीची विक्री करण्यात आली. त्याशिवाय एलआयसीकडे तब्बल 21 हजार कोटींची रक्कम बेवारसपणे पडून आहे.
लॉकडाऊनमध्ये 22.66 टक्के घट
कंपनीने सांगितले की, कोरोना महासाथीमुळे आणि महासाथीमुळे लागू करण्यात आलेल्या लॉकडाउनमुळे, वैयक्तिक पॉलिसींची विक्री 2019-20 च्या चौथ्या तिमाहीत 22.66 टक्क्यांनी घसरून 63.5 लाख झाली आहे. एका वर्षापूर्वी याच कालावधीत ही संख्या 82.1 लाख होती. त्याचा प्रभाव 2020-21 आणि 2021-22 च्या पहिल्या तिमाहीतही दिसून आला. या कालावधीत ते अनुक्रमे 46.20 टक्क्यांनी 19.1 लाख आणि नंतर 34.93 टक्क्यांनी घटून 23.1 लाखांवर आले.
एलआयसीकडे 21,539 कोटी 'बेवारस' अवस्थेत
एलआयसीकडे सप्टेंबर 2021 पर्यंत 21,539 कोटी रुपये पडून आहेत. या निधीवर कोणीही दावा केलेला नाही. LIC ने सिक्युरिटीज अँड एक्सचेंज बोर्ड ऑफ इंडिया (SEBI) कडे सादर केलेल्या प्रारंभिक सार्वजनिक ऑफरच्या (IPO) दस्तऐवजातून ही माहिती प्राप्त झाली आहे. या रक्कमेत दावा न केलेल्या रक्कमेवरील व्याजाचाही समावेश आहे. मार्च 2021 पर्यंत दावा न केलेली रक्कम 18,495 कोटी रुपये आणि मार्च 2020 अखेरीस 16,052.65 कोटी रुपये होता. त्याच वेळी, मार्च 2019 अखेरपर्यंत ही रक्कम 13,843.70 कोटी रुपये होती.
महिनाभरात एलआयसीचा आयपीओ
एलआयसीनं आयपीओ बाजारात आणण्यासाठी सेबीकडे अर्ज केला आहे. त्यामुळे आता एलआयसीचा आयपीओ महिन्याभरात येणार हे निश्चित झालं आहे. एलआयसीचा आयपीओ हा जवळपास 65 ते 75 हजार कोटींचा असू शकतो. सरकार एलआयसीतील 5 टक्के समभाग म्हणजेच शेअर विकणार आहेत. आणि यातून 65 ते 75 हजार कोटी उभारण्याचा मानस सरकारचा आहे. आतापर्यंत सर्वाधित मोठा आयपीओ हा नुकतीच लिस्टिंग झालेली पेटीएम कंपनी आहे. पेटीएम कंपनीचा आयपीओ हा 18 हजार 500 कोटी रुपयांचा होता. त्यामुळे एलआयसीच्या आयपीओला फादर ऑफ ऑल आयपीओ म्हटलं जातं आहे.
इतर महत्त्वाच्या बातम्या:
महत्त्वाच्या बातम्या
