Gold Silver Price Today : सोन्याच्या दरात घसरण सुरुच, सोने 220 रुपयांनी घसरले तर चांदी 300 रुपयांनी वधारली

Gold Silver Price Today : आंतरराष्ट्रीय स्तरावर सोन्याच्या मागणीत मोठी घट झाल्याने सोन्याच्या दरात गेल्या आठड्यापासून घसरण सुरु आहे. चांदीच्या घसरणीला मात्र ब्रेक लागल्याचं दिसून आलं आहे.

Written By : एबीपी माझा वेब टीम | Updated at : 23 Jul 2021 07:36 AM (IST)

gold_

मुंबई : गेल्या आठवडाभरात केवळ एका दिवसाचा अपवाद वगळता सोन्याच्या किंमतीत घसरण सुरुच आहे. आजही सोन्याच्या किंमतीत 220 रुपयांची घसरण झाली असून मुंबई आणि पुण्यात आज 24 कॅरेट एक तोळा सोन्याचा भाव हा 47,900 रुपये इतका आहे तर 22 कॅरेट सोन्याचा भाव हा 46,900 रुपये इतका आहे. चांदीच्या घसरणीला मात्र ब्रेक लागला असून त्यामध्ये 300 रुपयांची वाढ झाली आहे. आता एक किलो चांदीसाठी 66,900 रुपये मोजावे लागणार आहे.

सोन्याच्या किंमतीचा विचार करता 16 जुलैला 130 रुपये, 17 जुलैला 150 रुपये, 18 जुलैला 10 रुपये तर मंगळवारी 150 रुपयांची घसरण झाली. सलग चार दिवस सुरु असलेल्या या किरकोळ घसरणीनंतर सोन्याच्या दरात काल 260 रुपयांची वाढ झाली होती तर आज त्यामध्ये पुन्हा 180 रुपयांची घसरण झाली.

गेल्या दोन महिन्यांपासून सोन्याच्या भावात घसरण झाल्याचं पहायला मिळतंय. पण येत्या काळात सोन्याची किंमत वाढण्याची शक्यता आहे असा अंदाज व्यक्त केला जातोय. त्यामुळे सध्या सोन्याच्या किंमती आवाक्यातील असून त्यामध्ये गुंतवणूक करण्याचा हाच योग्य काळ असल्याचं मत काही तज्ज्ञांनी व्यक्त केलंय.

गेल्या वर्षी ऑगस्ट 2020 मध्ये सोन्याच्या भावाने प्रती 10 ग्रॅमसाठी 56 हजार रुपयांचा विक्रमी आकडा गाठला होता. त्यामध्ये आता जवळपास आठ हजार रुपयांची घसरण झाल्याची पहायला मिळतंय. कोरोनाच्या प्रादुर्भावाचा सोन्याच्या दरावर चांगलाच परिणाम झाल्याचं दिसून आलंय. आंतरराष्ट्रीय स्तरावर सोन्यामध्ये गुंतवणूक कमी झाल्याने तसेच डॉलरचे बळकटीकरण झाल्याने सोन्याच्या किंमती तुलनेने कमीच राहिल्या आहेत.

गेल्या महिन्यात, 1 जून रोजी चांदीची किंमत ही 72,600 रुपये इतकी होती. त्यानंतर किंमतीत घट होऊन ती 70 हजारांच्या आत आली. 7 जुलै रोजी चांदीच्या किमतीने पुन्हा एकदा 70 हजार रुपयांचा टप्पा ओलांडला. गेल्या आठवड्याचा विचार करता चांदीच्या किंमतीत सातत्याने चढ-उतार होत असल्याचं दिसून आलं आहे. 14 जुलैला चांदीच्या किमतीत 200 रुपयांची घसरण, 15 जुलैला 300 रुपयांची वाढ, 16 जुलैला 200 रुपयांची वाढ झाली होती. 17 तारखेला 1300 रुपयांची घसरण झाली. मंगळवारी चांदीच्या किंमतीत 600 रुपयांची घसरण झाली तर बुधवारी पुन्हा एकदा 300 रुपयांची घसरण झाली. आज त्यात 900 रुपयांची घसरण झाली आहे.

महत्वाच्या बातम्या :