Gold Rates & Silver Rates Today : मोठी बातमी: गुढीपाढव्याला सोने, चांदीच्या दरात घसरण; मुंबई, पुण्यात आजचा भाव किती?
Gold Rates & Silver Rates Today : अमेरिकन फेडरल रिझर्व्हचा व्याजादरांबाबतचा निर्णय आणि मध्यपूर्वेतील (मिडल ईस्ट) वाढता तणाव यांदरम्यान गुरुवारी सोने आणि चांदीच्या किमतीत पुन्हा घसरण नोंदवण्यात आली.
मुंबई : आठवड्याच्या चौथ्या व्यापारी दिवशी म्हणजेच गुरुवारी, एकीकडे इराणशी संबंधित युद्धजन्य परिस्थितीमुळे शेअर बाजारात मोठी घसरण पाहायला मिळाली आणि सेन्सेक्स सुमारे १८०० अंकांनी कोसळला. मात्र, दुसरीकडे सोने-चांदी खरेदी करणाऱ्यांसाठी दिलासादायक बातमी समोर आली आहे. अमेरिकन फेडरल रिझर्व्हचा व्याजादरांबाबतचा निर्णय आणि मध्यपूर्वेतील (मिडल ईस्ट) वाढता तणाव यांदरम्यान गुरुवारी सोने आणि चांदीच्या किमतीत पुन्हा घसरण नोंदवण्यात आली.(Gold Rates & Silver Rates Today)
गुढीपाढव्यानिमित्त सोने आणि चांदी खरेदी करणाऱ्यांसाठी मोठी बातमी आहे. सोने आणि चांदीच्या दरात मोठी घसरण झाली आहे.
सोन्याच्या दरात प्रति तोळा ४ हजार रुपये तर चांदीच्या दरात प्रति किलो १४ हजारांची घसरण झाली आहे. मुंबईत सोन्याचे दर आज १ लाख ५६ हजार १८६ रुपये प्रति तोळा आहेत. काल सोन्याचा दर मुंबईत प्रति १० ग्राम १ लाख ६० हजार १९० रुपये होता.अशात, आज सोन्याचा दरात ४ हजार रुपयांनी घसरला आहे. तिकडे, चांदीच्या दरात प्रति किलो जवळपास १४ हजारांची घसरण दिसते आहे. चांदीचा आज मुंबईत २ लाख ४३ हजार ९१३ रुपये प्रति किलोचा दर आहे. काल चांदीचा दर मुंबईत २ लाख ५७ हजार ६६७ रुपये प्रति किलो होता. अशात, आज चांदीच्या दरात १३ हजार ७५४ रुपयांची घसरण पाहायला मिळते आहे.(Gold Rates & Silver Rates Today)
सोने-चांदीच्या दरात मोठी घसरण
आंतरराष्ट्रीय बाजारपेठेत 'यूएस स्पॉट गोल्ड' १.२२ टक्क्यांनी घसरून ४८३६ डॉलर प्रति औंसवर आले आहे, तर 'स्पॉट सिल्वर' २.२५ टक्क्यांनी घसरून ७५.७५ डॉलर प्रति औंसवर पोहोचले आहे. त्याच वेळी, देशांतर्गत वायदा बाजार (MCX) वर सोन्याचा दर सुमारे १.५५ लाख रुपये प्रति १० ग्रॅम आणि चांदीचा दर घसरून सुमारे २.५० लाख रुपये प्रति किलो वर आला आहे.
'लेमन मार्केट डेस्क'चे रिसर्च अनालिस्ट गौरव गर्ग यांच्या मते, सोने आणि चांदीमधील या ताज्या चढ-उताराचे मुख्य कारण म्हणजे अमेरिकन फेडरल रिझर्व्हच्या निर्णयापूर्वी गुंतवणूकदारांनी स्वीकारलेली खबरदारीची भूमिका आहे.
मध्यपूर्वेतील सुरू असलेला तणाव आणि कच्च्या तेलाच्या किमतीतील वाढीमुळे महागाईबाबतची चिंता वाढली आहे, ज्यामुळे गुंतवणूकदार सावध पावले उचलत आहेत. विशेष म्हणजे, पश्चिम आशियातील तणावाला आता सुमारे तीन आठवडे पूर्ण झाले असून सध्या शांततेची कोणतीही स्पष्ट चिन्हे दिसत नाहीत. दुसरीकडे, अपेक्षेप्रमाणे फेडरल रिझर्व्हने सलग दुसऱ्यांदा व्याजदरात कोणताही बदल केलेला नाही, जरी यापूर्वी सलग तीन वेळा ०.२५ टक्क्यांनी कपात करण्यात आली होती.
कसे ठरतात सोने आणि चांदीचे दर?
सोने आणि चांदीचे दर दररोज ठरवले जातात आणि त्यामागे अनेक महत्त्वाचे घटक कारणीभूत असतात:
आंतरराष्ट्रीय बाजार आणि डॉलर: आंतरराष्ट्रीय बाजारात या धातूंच्या किमती अमेरिकन डॉलरमध्ये ठरवल्या जातात. त्यामुळे डॉलर-रुपया विनिमय दरातील (Exchange Rate) बदलाचा थेट परिणाम यांच्या किमतीवर होतो. जर डॉलर मजबूत झाला किंवा रुपया कमकुवत झाला, तर भारतात सोने-चांदी महाग होते.
कर आणि आयात शुल्क: भारत आपल्या गरजेचा बहुतांश भाग आयात करतो, त्यामुळे सीमा शुल्क (इंपोर्ट ड्युटी), जीएसटी आणि इतर स्थानिक कर देखील किमतींवर परिणाम करतात.
जागतिक अनिश्चितता: युद्ध, आर्थिक मंदी किंवा व्याजदरातील बदल यांचा सोन्याच्या किमतीवर थेट परिणाम होतो. जेव्हा जागतिक स्तरावर अनिश्चितता वाढते, तेव्हा गुंतवणूकदार शेअर्सऐवजी सोन्यासारख्या सुरक्षित पर्यायाला पसंती देतात.
सांस्कृतिक महत्त्व: भारतात सोने हे केवळ गुंतवणुकीचे साधन नसून ते परंपरांशी जोडलेले आहे. लग्नकार्य, सण आणि इतर शुभ मुहूर्तांवर सोने खरेदी केल्याने मागणी वाढते, ज्याचा परिणाम किमतींवर होतो.
महत्त्वाच्या बातम्या
