5G Auction : आजपासून देशात 5G स्पेक्ट्रमचा लिलाव सुरू, खरेदीदारांच्या शर्यतीत 'या' 4 कंपन्या

5G Auction : देशात 5G सेवा सुरू झाल्यानं हायस्पीड इंटरनेट सेवा देण्याचा मार्ग मोकळा होणार आहे. 5G सेवा सध्याच्या 4G सेवांपेक्षा सुमारे 10 पट वेगवान असेल. लिलावादरम्यान रिलायन्स जिओला अधिक खर्च अपेक्षित आहे.

5G Auction

Source : Getty

5G Auction : टेलिकम्युनिकेशन क्षेत्रात भारत आज प्रगतीचं आणखी एक पाऊल पुढे टाकणार आहे. आजपासून 5-जी स्पेक्ट्रमच्या 9 फ्रिक्वेन्सी बँडचा लिलाव (5G Auction) करण्यात येणार आहे. एअरटेल (Airtel), अदानी डेटा, जिओ आणि व्होडाफोन-आयडिया यासारख्या कंपन्या या लिलावासाठी शर्यतीत आहेत. 5-जी सुरू झाल्यास इंटरनेट सेवेचा वेग वाढणार आहे मात्र त्यासाठी ग्राहकांना अधिक किंमत मोजावी लागणार आहे. सध्या ट्रायकडून भोपाळ, नवी दिल्ली विमानतळ, कांडला पोर्ट आणि बंगळुरु या चार ठिकाणी 5 जीच्या पायलट चाचण्याही सुरू करण्यात आल्या आहेत.

देशातील 5G स्पेक्ट्रमचा लिलाव प्रक्रिया मंगळवारपासून म्हणजेच, आजपासून सुरू होईल. ज्यामध्ये रिलायन्स जिओ आणि भारती एअरटेलसह चार कंपन्या बोली लावतील. यादरम्यान 4.3 लाख कोटी रुपयांच्या 72 GHz स्पेक्ट्रमसाठी बोली लावली जाणार आहे. मंगळवारी सकाळी 10 वाजल्यापासून निविदा प्रक्रिया सुरू होणार असून सायंकाळी 6 वाजेपर्यंत चालणार आहे. दूरसंचार विभागाच्या सूत्रांनी दिलेल्या माहितीनुसार, लिलाव प्रक्रिया किती काळ चालते हे स्पेक्ट्रमसाठी येणार्‍या बोली आणि बोली लावणाऱ्यांच्या धोरणावर अवलंबून असेल. ऑगस्ट अखेरपर्यंत 5G सेवा देशात सुरू होईल, अशी आशा सरकारनं व्यक्त केली आहे. 

एक लाख कोटींची कमाई अपेक्षित 

5-जी लिलाव प्रक्रिया दोन दिवस चालेल आणि स्पेक्ट्रमची विक्री राखीव किमतीच्या आसपास होईल, अशी उद्योगांना अपेक्षा आहे. स्पेक्ट्रम लिलावाच्या या फेरीत, रिलायन्स जिओ, भारती एअरटेल आणि व्होडाफोन आयडिया व्यतिरिक्त, गौतम अदानी यांची कंपनी अदानी एंटरप्रायझेस देखील 5G ​​साठी बोली लावणार आहे. 5G स्पेक्ट्रमच्या लिलावातून दूरसंचार विभागाला 70,000 कोटी ते 1,00,000 कोटी रुपयांपर्यंत महसूल मिळण्याची अपेक्षा आहे. 

देशात 5G सेवा सुरू झाल्यानं हायस्पीड इंटरनेट सेवा देण्याचा मार्ग मोकळा होणार आहे. 5G सेवा सध्याच्या 4G सेवांपेक्षा सुमारे 10 पट वेगवान असेल. लिलावादरम्यान रिलायन्स जिओला अधिक खर्च अपेक्षित आहे. व्होडाफोन आयडिया आणि अदानी एंटरप्रायझेस यांच्या मर्यादित सहभागासह एअरटेलनेही या शर्यतीत आघाडी घेण्याची अपेक्षा आहे.