कुणीही ती कुणीही तो

ती : तुझ्याशी बोलण्यात न् काही अर्थच नाहीय.तो : नको बोलूस न मग ठेव फोन.ती : तुला तेवढंच पाहिजे ना. कळलंय आता मला. तुला ना आधीसारखा इंट्रेसच नाही वाटत माझ्याशी बोलण्यात.

वेळ - रात्रीचे अकरा --------------------------------------------------------------------------------

ती : कधीपासून फोन करतेय मी. उचलत का नव्हतास. किती काळजी वाटली माहितय. कुठे ठेवला होतास फोन?

तो : जवळच होता. सायलेंट मोडवर ठेवलेला. दिसलेत मला तीस मिनिटांत पस्तीस मिसकॉल पडलेले. काही महत्वाचं बोलायंय का बोल पटकन.

ती : एकतर दिवसभरात एकही कॉल केलेला नाहीयेस. किंवा साधा एक मेसेजही केलेला नाहीयेस. आणि आता म्हणतोयस पटकन बोल म्हणून.

तो : तुला काल रात्रीच सांगितलेलं आज माझी महत्वाची मिटींग होती बॉस बरोबर. तुझ्या लक्षात कसं राहत नाही. आणि एखादा दिवस नाही केला मेसेज फोन तर काय बिघडलं.

ती : तुझ्याशी बोलण्यात न्  काही अर्थच नाहीय.

तो : नको बोलूस न मग ठेव फोन.

ती : तुला तेवढंच पाहिजे ना. कळलंय आता मला. तुला ना आधीसारखा इंट्रेसच नाही वाटत माझ्याशी बोलण्यात.

तो : दुसरी ही महत्वाची कामं असतात. आणि हो सारखं सारखं काय अस्तं बोलायचं.

ती :  माझ्यापेक्षा तुला काम महत्वाचं वाटतं. कामच करत बस.

तो : आता तू मला अधिकचं इरिटेट करू नको. झोपतो मी माझं डोकं दुखतंय.

ती :  काय झालं? वेळेवर जेवला नाहीस का? का पावसात भिजलास? तुला हजारदा सांगितलंय छत्री घेऊनच बाहेर पडत जा. गोळी घे असेल तर किंवा बाम लाव.

तो :  फक्त डोकं दुखतय गं. किती सूचना देतेयस. झोपतोय मी आता. तू ही झोप. बोलू सकाळी. बाय.

ती : बाय. टेक केअर. मिस यू. लव यू.

तो : हं. गुड नाईट. ---------------------------------------------------------------------------

वेळ - पहाटेचे तीन

ती : तू अॉनलाईन काय करतोयस. डोकं दुखतंय नं तुझं.

तो : हं. मित्राशी बोलतोय गं मिटिंगबद्दल. झोप तू.

ती : मित्राशीच नं नक्की.

तो : नाही मैत्रीणीशी बोलतोय. झालं समाधान?

ती :  तरीच

तो : तरीच काय तरीच. गैरअर्थ काढायची सवयच लागलीय तुला.

ती : आणि तुला खोटं बोलायची.

तो : काय खोटं बोललोय मी.

ती : हेच ना. झोपतो म्हणालास आणि जागा आहेस. ते ही अॉनलाईन.

तो : झोप नाही लागली त्याला मी काय करू?

ती : मला काळजी वाटते रे. तिथं नाहीये नं तुझी काळजी घ्यायला कुणी.

तो : मी लहान बाळ नाहीय. आपण आपली काळजी घ्यायला सक्षम असावं.

ती : हम्म. झालं का डोकं दुखायचं कमी. आणि प्लिज जागरण नको करूस ना.

तो : होईल कमी. तू झोप. बाय.

ती : टेक केअर.बाय. आणि जागू नकोस जास्त.

---------------------------------------------------------------------------

वेळ - दुसरा दिवस सकाळचे नऊ 

ती :  गुड मॉर्निंग. राहिलं का डोकं दुखायचं?

तो : गुड मॉर्निंग. नाही अजून कमी झालं.

ती : केलस नं जागरण. आता आल्याचा चहा घे. बरं वाटेल आणि आंबट किंवा अॉयली वगैरे काही खाऊ नकोस निदान आज तरी का मी घेऊन येऊ डबा अॉफिसवर.

तो : नको नको. मी खाईन लाईट काहीतरी. बरं. मला अॉफिसला उशीर होतोय निघतो मी. बाय.

ती : बाय. सी. यू.

---------------------------------------------------------------------------

वेळ - दुपारचा एक

ती : वाटतंय का काही कमी?

तो : काय?

ती : डोकं?

तो : हो आहे जरा कमी.

ती : खाल्लयंस का काही?

तो : हो समोसा खाल्लाय.

ती : काय हे? तुला सकाळीच सांगितलं ना. अॉयली काही खाऊ नको म्हणून.

तो : माझं डोकं दुखतय. मला खोकला नाही लागलेला. प्लिज तू माझी डॉक्टर बनू नकोस.

ती :  तरी काळजी घ्यावी आपण.

तो : हं.

ती : हं काय हं. मी मूर्ख म्हणून तुझी काळजी करतेय. घे तब्येत बिघडवून अजून.

तो : बाई माझं फक्त डोकं दुखतय मला ब्रेन ट्युमर नाही झालेला.

ती : अरे असलं काय अभद्र बोलतोयस. तुला काहीच कसं वाटत नाही असं बोलताना.

तो : आता रडून माझा मूड खराब करू नकोस. मला खूप काम आहे अॉफिसमध्ये.

ती : जा तुला नाही कळणार.

तो : बरं. ठेवतोय फोन मी. लंचटाईम संपला माझा. बाय.

---------------------------------------------------------------------------

वेळ -  सायंकाळचे पाच

ती : निघालास का अॉफिसमधून? झालं न पूर्ण कमी डोकं दुखायचं?

तो : हो बरचसं कमीय आता.

ती : अॉफिसवरुन जाताना मी येऊ का घरी?

तो : कशाला.

ती : कशाला म्हणजे काय? भेटायला.

तो : आज नको. मित्रांचं ठरलंय भेटायचं.

ती : हम्म. तुला मित्रांना भेटायला वेळ आहे आणि मला नाही.

तो :  तुला आठवत नसेल तर सांगतो. आपण भेटून दोन दिवसच झालेत. महिना दोन महिने झालेत असं का वागतीयस.

ती : हम्म. बरं.

तो : चल करतो कॉल रात्री. बाय.

ती. :  बाय. सी. यू. ---------------------------------------------------------------------------

वेळ - रात्रीचे दहा

ती : तू रात्री कॉल करतो म्हणालेलास ना. शेवटी मीच केला.

तो :  हो म्हणालेलो पण कामात विसरलो. आणि तू केलास तर बिघडलं कुठे?

ती : जावू दे काय करतोयस.?

तो : काम करतोय.

ती :  कामात तुला माझी आठवणही येत नाही नं?

तो : कॉन्सनट्रेशनने केलं तरच काम चांगलं होतं.

ती : माझ्याकडे लक्ष नाही दिलं तर चालतय नं?

तो : हे बघ माझा भांडणाचा मूड नाहीय. मला उद्या प्रोजेक्ट सबमीट करायचाय.

ती :  ओके ओके. नाही भांडतेय. झालं का डोकं दुखायचं कमी.

तो : होय. बऱ्यापैकी.

ती :  गुड. पण एखादी गोळी घे आजही. आणि होता होईल तेवढं लवकर झोप. उगाच जागत बसू नको. आणि थंडीत बाहेर नको जाऊस. थंड पाणी सुद्धा पिऊ नकोस.

तो : हे बघ. स्वतः इतकं पझेसिव व्हायची आणि मलाही इरिटेट करायची अजिबात गरज नाहीय. मी ओके आहे. मी उशीरपर्यंत काम करत बसेन. डिस्टर्ब करू नकोस बाय.

ती : हम्म. बाय.टेक केअर.

---------------------------------------------------------------------------

वेळ - पुढचा दिवस सकाळचे आठ

ती :  गुड मॉर्निंग. कसा आहेस?

तो : एकदम फ्रेश.

ती : आज जरा कणकणी वाटतेय अंगात.

तो : कालचं जरासं काम पेंडींग आहे. लवकर उठून करत बसलोय.

ती :  हम्म. ओके.

तो : बाय. बोलू दुपारी. -------------------------------------------------------------------------------

वेळ - दुपारचे दोन 

ती :  जेवलास का? काय करतोयस?

तो :  हो जेवलो. तू?

ती :  खाल्लं थोडं. काही खावंसं वाटेना. अंग दुखतंय सकाळपासून आणि आता डोकंही दुखायलंय.

तो : वेट मला मित्राचा फोन येतोय. बोलतो पुन्हा. ---------------------------------------------------------------------------

वेळ - रात्रीचे नऊ

ती :  कुठेयस ? काय करतोयस ? जेवलास का ?

तो :  हो जेवलो.. तू काय करतीयस ? जेवलीस का ?

ती  :  भूक नाहीय आज. खाईन काहीतरी थोडंफार. डोकं भणभण करतंय.

तो : माझं डोकं एकदम व्यवस्थित आहे आता. एखादी फिल्म बघत बसेन.

ती : माझं डोकं दुखतंय म्हणतेय मी. तुझं नाही विचारलं.

ती : दुसऱ्याचं डोकं कमी खावं नं मग.

ती:  तू नं खडूस आहेस. प्रचंड.

तो : शांत झोप आता. उद्या संध्याकाळी सहा. नेहमीचं कॉफी शॉप. बाय.

- कविता ननवरे.