वीज बिलांबाबत सरकारने योग्य भूमिका न घेतल्यास रस्त्यावर उतरू, भाजप खासदार रक्षा खडसेंचा इशारा

जळगाव : वीज बिलात सवलत देण्याची भाषा करणाऱ्या राज्याचे ऊर्जामंत्री नितीन राऊत यांनी आता आपला शब्द फिरवला आहे. याविरोधात भाजप नेते पुन्हा आक्रमक झाले आहेत. राष्ट्रवादी काँग्रेसचे नेते एकनाथ खडसे यांच्या सूनबाई आणि भाजपच्या खासदार रक्षा खडसे यांनी तीव्र प्रतिक्रिया दिली आहे. वीज ग्राहकांना दिलासा देण्याची गरज आहे. मात्र, सरकारनं याबाबत योग्य भूमिका न घेतल्यास जनहितासाठी भाजप रस्त्यावर उतरणार असल्याचा इशारा देखील भाजप खासदार रक्षा खडसे यांनी दिला आहे.

खासदार रक्षा खडसे म्हणाल्या की, जेवढं बिल आलेलं आहे, तेवढं बिल ग्राहकांना भरावच लागेल असं वक्तव्य ऊर्जामंत्री नितीन राऊत यांनी केलं आहे. ऊर्जामंत्र्यांचं वक्तव्य सपशेल चुकीचं आहे. राज्यातील महाविकास आघाडी सरकारनं बिल माफ करू, असं राज्यातील जनतेला आश्वासन दिलं होतं. मात्र नितीन राऊत हे एक चांगले नेते आहे, त्यांनी आपला शब्द फिरवायला नको होता. संपूर्ण वीज बिल माफ करू शकले नसले तरी काही प्रमाणात ग्राहकांना सवलत द्यायला हवी, अशी मागणी रक्षा खडसे यांनी यावेळी केली आहे. राज्यात महाविकास आघाडीचे सरकार आल्यापासून भाजपला सातत्याने आंदोलन करण्याची गरज पडत आहे. कारण भाजप ही वैयक्तिक फायद्यासाठी नसून जनतेच्या हितासाठी आंदोलन करत आहेत, असं रक्षा खडसे यांनी सांगितलं.

वीज बिलावरून महाविकास आघाडी सरकार विरुद्ध भाजप; फडणवीसांच्या टीकेवर राऊतांचा पलटवार

वीजबिलात सवलत देण्याची भाषा करणाऱ्या ऊर्जामंत्र्यांनी आता आपला शब्द फिरवला. याविरोधात विदर्भवाद्यांनी आक्रमक भूमिका घेतली आहे. त्यामुळे हिवाळी अधिवेशनाच्या पहिल्याच दिवशी 7 डिसेंबरला विदर्भात प्रत्येक तालुक्याच्या ठिकाणी विदर्भवादी ठिय्या आंदोलन करणार आहेत. लॉकडाऊनच्या काळात ऊर्जा विभागानं अवास्तव बिलं पाठवली आहेत. यावर विरोधी पक्षांनी आंदोलन केली, संघटना रस्त्यावर उतरल्या. त्यामुळे वीज बिलात सवलत देऊ असा शब्द ऊर्जामंत्र्यांनी दिला होता. मात्र, आता अचानक ऊर्जामंत्र्यांनी शब्द फिरवला.

वीज बिल सवलतीवरून महाविकास आघाडीत नाराजी, काँग्रेस मंत्र्यांना अपेक्षित निधी मिळत नसल्याची भावना